Sa-ai Trần Minh Quan hu danao raong anek pajaih saong 3 danao raong “ba ba Nam bộ”

Sa-ai Trần Minh Quan brei thau, tuk camereip diuk pasang sa-ai raong ba ba, min tapa rilo thun jeng oh tagok hu, kayua yaom darak pasar tuk trun tuk tagok. Dalam sa mbang daih, sa-ai Quan hu gauk gar brei thau ka “ba ba Nam Bộ”, mboh lac ini janih raong meda ba mai kein laba glaong. Meng nan, sa-ai khang hatai buh prein tame ngak.

  Sa-ai Quan khan lac: “Thun 2011, dahlak hulin pataom abih jien dalam sang hu 20 triệu đồng, nao mesraiy di gilang pariak hu 30 triệu piah blei “ba ba” pajaih. Tuk nan, sa drei pajaih yaom tal 500.000 đồng, yaom lac bahrau praong 1 bilan. Mboh yau nan, thei jeng huac, hu menuac daok duh hatai brei dahlak hulin”.

Meng siam lagaih di labik lac, ba ba Nam bộ hu prein pacang caga ruak glaong, raong takik metai, samar praong saong trak kilo. Raong meng thun ka 2 tagok, yaok thun nyu tagok hu meng 2 - 3kg. Meyah raong lavik thun, yaok drei ba ba trak tal 50kg. Pandap mbang ka ba ba biak mbuan, lac: pruac menuk, tung ada, baoh bao, lục bình…Yaok harei tok brei mbang 1 mbang. Yaok thun, ba ba mebaoh meng 3 - 4 sruh, yaok sruh meng 10 - 18 baoh, saong caih hu jaik abih. Ba ba Nam bộ pajaih praong 1 bilan yaom 400.000 đồng sa drei, ba ba ralow hu darak pasar blei tame yaom meng 500.000 - 600.000 đồng sa kg.

Sa-ai Quan jeng khan lac: “Urang raong jeng brei caik hatai, ngan saong ba ba ralow (praong meng 1 thun tagok) dalam 15 harei salih ia danao raong 1 mbang. Daok tuk nyu daok sit, ia hu harei salih harei padeih. Meyah mboh rup nyu hu bimao, urang raong njauk blei “thuốc tím” mai tram meng 10 - 15 harei lac thit ruak”.

Meng hadom drei pajaih urak ini labik raong di sa-ai daok hu, nyu ka oh pabak ginup bruk caong blei pajaih di mikva daok di dom tỉnh yau: Cà Mau, Hậu Giang, Vĩnh Long, Tiền Giang, Đồng Tháp…

Ong Dương Tấn Tài – akaok puk Tân Thành, xã Nhơn Nghĩa brei thau, sang sa-ai Trần Minh Quan lac sang brei mboh ka bruk urang ngak nong tabiak truh kan kathaot meng bruk raong cua đinh Nam Bộ. Yaok thun, sang urang ngak nong ini pabak pajaih ka darak pasar meng 1.800 - 2.000 drei, ba jien tame jaik 1 tỉ đồng yaok thun. Ini lac bruk ba mai kein laba glaong, bahrau ini, Jabat ngak nong saong patagok palei pala huyện Phong Điền hu trun pasang iek piah padang HTX raong cua đinh Nam Bộ hu 10 baoh sang pataom mbaok tame. Anak tal, karja jak ba mikva pambak praong bruk ngak ini piah salih harau kinh tế baoh sang. Gam haong nan, tacei pato mikva ngak harak likau adat raong “động vật hoang dã” tui njauk adat hukum./.

Urang lang: Hani Pha – 05/10