Pataom abih usaha ameh mai meng lakhah ba nao pablei piah mek jien buh tame raong ula ri ikan, Muk Lê Thị Minh Thư (umo 26 thun, daok di Huyện Lấp Vò, Đồng Tháp) hu jien mek tame jaik 800 triệu đồng dalam sa thun.

M’ Thư brei thau lac dahlau di tuk raong ula ri ikan, drei jeng rilo mbang raong manuk, raong tapa ba ba, raong arieng oh mboh jeng … Mbang khat lahik abih kayua jia tame sa labik di gah bhum Pai negar lac duah jalan pablei tabiak, drei hu buh tame raong 1.000 drei arieng đinh, min hadei di nan kol nan lahik mbaok oh thau pak halei, M’ Thư njauk pablei lap piah mek hu hasit jien tame pabak ka jien buh tame raong.

Minh Thư ndem mayai lac: "Hatai takre raong min dahlak khat lahik. Abih phun jien, dahlak kuhria si nao tal tỉnh Bình Dương ngak kong ngak apah duah jien piah duah jalan peih mbang ngui bahrau. Patuah jamo, drei thau hu bruk raong ula ri ikan, ri voi ít buh takik prein sangka iek glang, kein laba glaong nan ye drei ba hatai jai pataom abih ameh lakhah ba nao pablei saong buh jien tame ngak mbang meng di thun 2017 tal urak ini".

Yaom hu cagait var ro hu blaoh meng di tuk daok raong arieng, M Thư padang pasiam veik var ro saong blei anek ula pajaih ba mai raong. Tuk camriep, kayua ka oh hu ilamo barau, M Thư blei ula ri voi rilo jang ula ri ikan, nan ye dalam 1 bilan raong min mboh ula ri voi metai abih. Maong mboh ula ri ikan hu prein pacang caga haong ruak siam jang, M Thư khang hatai raong tok sa janih ula ini. Kayua tari tareng roh duah ilamo, meng dom gu ula amaik ame tuk camriep, urak ini saai Thư parilo tapon ula veik ngan haong labaih 2.000 gu.

M Thư brei thau lac ula ri ikan mbuan si raong, prein khang diuk di nyu jaik 90%. Ula hu prein pacang caga haong ruak kik biak glaong, nyu takik ruak. Min tapi tuk langik salih bilan, ula mbuan njauk njom ruak pandiak nao tal bruk mbang oh ralai. Tuk nan, tok njauk lai sarau tapai men tiêu hóa tame pandap mbang di ula.

Ula ri ikan mbuan si raong yau nan ye meda pandar ia dang atau ia kraong piah raong. Bruk raong palao ngan haong ula amaik ame ula lac 200 drei sa 10 m2. Kayua raong takik mbiah yau nan ye oh njauk salih ia yaok harei, pruh jru ngak hacih danao raong labaih 15 - 30 harei sa mbang. Janih jru pametai anek ruak bhian pandar janih pandar ka ikan, hadang, ngan haong khang di nyu.

Ula ri ikan biak mbuan si ieik mbuan si raong glang sangka, tuk daok sit njauk brei salih ia yaok adit sa mbang. Tuk ula praong ye 15 harei meng salih ia. Tui kuhria, ula sit ye 3 tal 4 harei brei mbang sa mbang; janih praong meng 7 tal 10 harei sa mbang. Pandap mbang rilo meng lac janih ikan sarau kadau, parabha tabiak ka pagap cambuai di ula, oh njauk ngak atau pacaoh sit.

Bilan caih baoh di ula ri ikan camriep akaok mati meng bilan 3 tal bilan 4 saka ia bilan. Di tukvak masa ini juai mek ula amaik kayua mbuan labuh lahik anek. Yaok mbang mabaoh, ula amaik mada mabaoh caih baoh hu meng 20 tal 40 drei anek ula.

Urak ini, ula ri ikan hu umo 2 bilan labaih, hu yaom pablei meng 45.000 - 120.000 đồng sa drei (tui drei praong sit). Ula ralaow trak labaih 1 kg sa drei hu yaom jien 400.000 - 450.000 đồng/kg. Yaok thun, var raong di Thư pablei tabiak darak pasa meng 1 - 2 tấn ralaow ula saong jaik 15.000 drei ula pajaih. Kayua yau nan ye, Thư hu jien mek tame jaik 800 triệu đồng sa thun. Urak ini, M Thư daok pabak ula pajaih saong daong duah jalan pablei tabiak ka jaik 300 baoh sang raong ula di dom tinh, ban gah bhum Pai negar drei.

Ong Dương Văn Hùng, Phaok akaok Kapul ngak nong xã Vĩnh Thạnh (H.Lấp Vò, tỉnh Đồng Tháp) brei thau lac, urak ini dalam xã hu dom sang raong ula ri ikan, tuk camriep mek hu kein laba glaong. Bruk yaih khan, daong duah jalan pablei tabiak ka dom urang raong ula dalam saong langiu di bhum palei di M Thư hu ba bruk ngak saong jien mek tame sang tani tanat ka urang ngak nong di dalam bhum palei./.