Ong Nguyễn Minh Trân, daok di xã Mỹ Sơn, huyện Ninh Sơn, hu bein kreim tứ quý praong 1,6 ha hijao mekre, tabiak rabung luac thun. Ong Trân khan lac diuk pasang ong hu pala rilo janih phun yau medar, panat, súp lơ... min kein laba oh glaong. Bilan 4/2021, tapa duah thau mangaok báo mboh bruk pala kreim tứ quý di tỉnh Bà Rịa-Vũng Tàu biak siam nan ye ong nao blei pajaih mai pala iek.

Tuk camereip ong blei 2.000 phôi pajaih mai pala tui tacei pato. Yaok 1.000m2 pala 100 phun kreim, yaok phun atah di gauk 3m, yaok talei atah di gauk 3m. Kreim tứ quý pala 8 bilan lac mek hu rabung mbang camereip, tal bilan ka 10 nao, yaok mbu kreim meda mek hu 10 phun rabung dalam 1 bilan, yaok phun rabung trak meng 1,5 tal 1,7kg.

Phun kreim tứ quý tabiak rabung dalam 10 bilan gam, tok padeih dalam 2 bilan salih hala. Bruk iek glang phun kreim tứ quý oh kan hagait, urang pala tok kaoh klaak dhar labaih, pok gha ka nyu glaong, khik pasah ka gha kreim piah pachreih tabiak rabung mada. Yaok thun njauk kaoh klaak dom phun kreim taha dalam bein piah rabung mada praong tagok, yaok mbu kreim tok khik veik meng 2-3 phun piah mbu kreim samar brei rabung praong.

Dalam 3 harei, ong Trân kaoh mek sa mbang rabung, hu meng 320-350kg pablei ka urang blei salih haong yaom meng 10.000 -15.000 đồng sa kg, tuk suan bilan meda pablei hu yaom meng 25.000-30.000 đồng sa kg. Tui yaom pablei 10.000 đồng sa kg, ong Trân hu jien mek tame labaih 1 triệu đồng sa harei.

Ndom ka kein laba di bruk pala kreim tứ quý, ong Trân brei thau, janih phun ini phun jien buh tame takik, prein iek glang jeng takik, kreim oh pilih ruah taneh, tok buh khak lân, vi lượng, khak var ro saong pruh ia ginup ye phun praong siam, pala kreim tứ quý sa mbang mek  rabung hu labaih pluh thun.

Ong Đoàn Nhật Vương, akaok UB bhap bini xã Mỹ Sơn, huyện Ninh Sơn brei thau, bruk pala kreim tứ quý di sang sa-ai Trân lac sa dalam dom bruk bahrau di palei. Rilo mikva urang ngak nong mai bac megru ilamu, blei phun pajaih mai pala, peih tabiak jalan nao bahrau rilo siam lagaih ka mikva dalam xã. Anak tal, xã brei pambuak bruk haong po labik pala piah tui iek, pasiam ilamu iek glang, roh duah,  pambak praong bruk pala phun kreim tứ quý di dom labik taneh lagaih.

Urak ini, gam haong bruk pataom tame cakrok kinh tế, padang bein kreim tứ quý jeng labik ravang me-in oh mek jien, ong Nguyễn Minh Trân jeng halan hatian tacei pato ilamu, pambuak gauk peih praong bruk pala phun kreim tứ quý haong dom sang urang ngak nong. Caong khin di ong Trân lac dalam tukvak anak tal, gam haong mikva dalam palei cakrok janih phun ini, yam tal padang hợp tác xã nông nghiệp pala, ngak, pablei rabung hacih pabak ka darak pasar, ba rilo bruk ngak, paglaong jien mek tame ka urang ngak./.