Bruk kapal haoh oh hu menuac peih duh ka bruk ngak nong di Hậu Giang

Meng hatai caong khin ba ilamu công nghệ glaong tame bruk ngak nong piah paglaong năng suất, chất lượng kaya nong, abih takik prein ngak, khik caga prein yava ka bhap bini. Bahrau ini, Bilai pachreih nong ban sit Ngã Bảy hu pambuak bruk haong Pasak pachreih nong saong Dịch vụ ngak nong tỉnh Hậu Giang peih ngak iek bruk kapal haoh oh hu menuac peih pruh jru angaok phun padai saong phun mbang baoh di Bhum 4, Bhum 7 saong phường Hiệp Thành, dui pachreih hu rilo mikva urang nong mai tui iek.

Siam lagaih di janih kapal haoh ini brei mboh lac asar jru tuk tabiak truh béc pruh nyu biak sit, lamin, daong patak pataom hu tal 90% ia saong trun hu meng 20 tal 30% jru khik caga phun pala hu pandar. Bruk pandar janih kapal haoh oh hu menuac peih dalam ngak nong daong patak pataom menuac ngak, tukvak pruh tok lac meng 15 tal 20 minit di mangaok sa hecta ba mai kein laba glaong jang 20 mbang duk haong pruh jru meng tangin takai yau dahlau daih.

Lac 1 urang ngak nong kak kajap haong phun padai meng dom saman ini mai, ong Phan Thiên Hoàng daok di bhum 4, phường Hiệp Thành biak chreih chrai tuk hu mboh di anak meta bruk ngak iek nan. Ong Hoàng khan lac, urang ngak nong meng dahlau mai pruh jru meng tangin, pagam pambak tame prein menuac. Bruk pachreih nong Hậu Giang pandar kapal haoh pruh jru meda langyah hu rilo bruk dalam pala drak saong ini lac jalan ngak di sang ong Hoàng  anak tal.

Ong Nguyễn Văn Nhị daok di bhum 7, phường Hiệp Thành brei thau, urak ini sang ong jeng daok ngak padai tui jalan meng kan, yaok mbang pruh jru ong bak angaok ka-ing baoh bình jru trak tal 20kg nan ye abih rilo prein yava. Bruk pandar kapal haoh oh hu menuac peih tame bruk ngak nong biak mbuan, mikva dang meng atah jeng ngak hu, nan ye pruh biak samar, oh glaih glar rilo, saong praong jang lac khik siam prein yava saong trun takik nerak tachauk môi trường.

Tal akaok bilan 7 meng bloh, dalam tỉnh Hậu Giang hu labaih 30 sruh kapal haoh oh hu menuac peih hu ba tame duh ka bruk ngak nong. Tukvak tapa, Pasak pachreih nong saong dịch vụ ngak nong tỉnh padang hu 1 kapul vận hành kapal haoh pruh jru khik caga phun pala piah pato pasram ba brei ilamu pandar kapal haoh pruh jru saong peih bruk pruh jru tuk mikva caong khin./.

Urang lang: M. Phuong – 07/09