Yaom lac langik daok hajan khang, min dom bein  nho di palei Thành Sơn, xã Xuân Hải, huyện Ninh Hải, bruk paik baoh di mikva jeng daok rah tabiak. Mbang akaok meti salih tapa ngak nho tui jalan me-aom papaok baoh, baoh sang amuk Nguyễn Thị Hoa, palei Thành Sơn, xã Xuân Hải, huyện Ninh Hải, mboh jalan ngak ini biak siam tuk dom mon nho hu pacang, papaok, palaih hu ruak thán thư, siam la baoh saong pablei hu yaom glaong jang. Tui yaom nho hijao pablei di bein labaih 40 ribau đồng/kg, hadei di kaoh abih phun jien buh tame, 3 sào nho hu daong ka  sang amuk Hoa hu laba labaih 100 triệu đồng.“Akaok thun bloh jeng hu nho yau nan bo kayua oh hu pacang papaok, nho nyu khut abih oh paik hu baoh halei nan ye thun ini drei blei mbao mai papaok ka baoh nho gam hacih sa-at, gam hu nho pablei saong drei jeng hu jien mek tame.”

Ilamu papaok nho hu urang ngak nong Ninh Thuận pandar ngak meng rilo thun ini mai. Jien buh tabiak blei mbao piah papaok mon nho jaik 17 triệu đồng/sào, urang nong meda pandar veik mbao piah tapaok baoh nho dalam 2 vụ. Yaom lac jien buh tabiak akaok mereip glaong, min jalan ngak ini hu brei tabiak baoh nho hacih sa-at, nho mek hu tiêu chuẩn VietGap saong paglaong năng suất kayua pacang cakak hu dom janih ruak bhian gaok dalam bilan hajan. Amuk Nguyễn Thị Huyền, palei Thành Sơn, xã Xuân Hải, huyện Ninh Hải khan lac: “Bilan hajan ini meyah dom sang bein papaok baoh veik ye baoh nho jeng daok hu siam mekre, tathak saong hu yaom di phun nho, biak yamen min njauk buh jien tabiak blei mbao tapaok baoh veik. Meyah oh tapaok baoh caik langiu langik ye khut abih oh paik baoh hu. Drei tapaok veik nan ka meng siam.”

Tui ong Huỳnh Thanh Hòa, akaok Hội đồng quản trị HTX Nho Evergreen tỉnh Ninh Thuận, HTX  hu 82 urang, ngan haong mblang taneh pala nho jaik 30ha. Dalam nan, hu 20 baoh sang pandar ilamu papaok baoh, ngan haong mblang taneh 11,7 ha. Langiu di bruk papaok baoh, urang pala nho jeng ngak njauk tui jalan Vietgap piah ka nho hacih sa-at saong siam mekre.“Urak ini 20 baoh sang urang hu mbaok tame bruk ngak tabiak nho Vietgap ye grap tanat gah sản lượng, oh khat lahik dalam bilan hajan. Bhian di nyu dom urang oh hu mbaok tame Vietgap dalam bilan hajan mek hu jaik 30% min tuk hu mbaok tame danak dak ye tagok 80%. Meng nan, paglaong jien mek tame ka baoh sang.”

Tuk papaok baoh, aia hajan oh taom gaok hu mon nho nan ye baoh ra-ai talah biak takik. Meng bruk papaok baoh, urang pala nho Ninh Thuận daok pamaong tal bruk ngak tabiak nho hacih sa-at, khik hu  vệ sinh siam mekre pandap panda saong kadha prong lac urang pala nho hu jien mek tame tani tanat pak di dalam bilan hajan. Meng nan, daong paglaong yaom baoh nho angaok darak pasar./.