Di mangaok mbaok hamu praong 1,5 ha, ong Nguyễn Út Em, xã Hòa An, huyện Phụng Hiệp, palao raong 30kg ikan pajaih dom janih, salih ka klaak mblang hamu saoh kayua ia dauk. Ong Út Em brei thau: “Bhum taneh ini lac bhum dhaong nan ye urang nong huac lac ngak padai tuk ia ndik tuh mai, oh yuak hu kayua padai oh ka tathak ba tal khat lahik. Nan ye, thun halei sang dahlak jeng palao raong ikan, hu kein laba, bo abih takik prein ngak, takik jien sahui jang dut saong ngak padai bilan Thu Đông. Hadei di tuk kuac mek ikan, jeng oh cang ngak hacih mblang hamu, tok njuk ia tabiak lac pala drak hu veik bilan padai Đông Xuân”.

Daok di xã Vĩnh Trung, huyện Vị Thủy, ong Nguyễn Văn Vũ, hadei di tuk yuak padai Hè Thu hu palao raong 30 kg ikan chép kanjik saong ikan mè bingu di mbaok taneh praong labaih 1 ha taneh hamu di sang. Ong Vũ brei thau lac: “Dom thun dahlau, sang dahlak palao raong 20 kg ikan pajaih di mblang taneh praong 6.000 m2, tal tuk cap mek, hu meng 1 - 1,2 tấn ikan dom janih, yaom pablei meng 20.000 - 60.000 đồng/kg, kuhria tabiak yaok mbang raong, sang dahlak jeng hu jien mek tame labaih 20 triệu đồng”.

Hadei di tuk yuak padai Hè Thu, mikva blei ikan pajaih mai palao dahlau dalam danao dalam bein labaih sa bilan piah ka ikan bhian randap haong ia saong ikan ginup praong dahlau di tuk palao tabiak mblang hamu. Jalan ngak ini hu daong patakik bruk metai ikan pajaih. Hadei di nan, cang tal tuk ia ndik mai dauk dom mblang hamu padai chét (padai eng drei tamuh hadei di tuk yuak blaoh), mikva palao ikan pajaih tabiak mblang hamu piah raong. Langiu di dom janih ikan yau ye: ikan kan, ikan chép kanjik, ikan mè bingu, ikan chim trắng, sặc rằn,… mikva daok dui pachreih hu ikan kuak, ikan dhoc gah langiu tame mblang hamu piah raong, piah patagok dom janih ikan saong sản lượng tuk cap mek.

Tui kuhria 1.000 m2 taneh hamu, urang nong palao meng 2 - 3kg ikan pajaih, hadei di  3 bilan palao raong meda mek hu meng 50 - 60kg ikan ralaow. Tui rilo baoh sang, bruk palao raong ikan di dalam mblang hamu abih takik prein sangka, phun jien buh tame takik, bruk pablei hu tani tanat. Mikva tok abih jien blei ikan pajaih saong pandap mbang di tukvak palao ikan dalam danao bein saong jien blei halam pacang vil val mblang hamu. Dalam luac tuk palao raong, ikan eng drei duah pandap mbang dalam mblang hamu yau ye rong rêu, pong nerang, padai chét di vụ dahlau saong dom janih halak halieng. Halam pacang vil val hamu meda pandar meng 3 tal 4 thun. Dalam tuk raong, mikva tok nao pasang iek ar hamu, halam vil val piah ngak khang kajap veik piah pacang ikan plaong tabiak langiu. Hadei di jaik 3 bilan raong di mblang hamu, urang nong mek ikan piah caga taneh pala padai Đông Xuân. Sang halei oh hu danao bein piah khik piah ikan ye pablei chip ka urang mai blei, daok sang halei hu danao khik piah raong veik ye cang tal jaik Tết Nguyên đán piah pablei tabiak hu yaom glaong jang.

Ngan dom kein laba yau nan, gah ngak nong tỉnh Hậu Giang  daok pambak praong bruk ngak piah lagaih haong bilan ia ndik, pandar siam di abih dom mblang taneh ngak takik kein laba./.