Di pasak pala tamekai huyện Krông Pa dom harei ini, urang nong daok jar var cakak dhar saong pilih ruah baoh biak hu makna praong. Tuui ilamo di dom urang pala tamekai, kuhria rah tapa 1 ga meda hu 3 talei saong tamuh tabiak rilo baoh mada. Tuk nan, sa gar tok hu pilih ruah 2 baoh tamekai siam di abih, daok veik njauk cakak klak piah khik ginup dinh dưỡng saong daong ka baoh praong siam jang.

Dom thun dahlau, dom baoh tamekai mada cakak klaak hu rahra klaak bal glai bal glo di mblang hamu. Min thun ini, dom baoh tamekai mada nan, hu urang blei mai blei biak rilo. Hu tuk, urang blei 2.000 đồng, glaong jang baoh tamekai pablei di bilan tamekai thun blaoh.

Hu rilo thun pala tamekai di huyện Krông Pa min ka oh mboh thun halei bo amuk Trương Thị Mười (xã Phú Cần) mboh bruk urang blei  mai tal hamu pala piah blei dom baoh tamekai mada klak nao. Uan tabuan kayua pablei hu jaik 2 triệu đồng meng dom baoh tamekai mada klaak nao, amuk Mười brei thau: “Yaok thun, dom baoh tamekai mada cakak klaak bak hamu, oh hu thei mai mek. Hu tuk, sang dahlak njauk pah manuac mai pataom mek blaoh ba nao klaak. Oh thau habar thun ini, urang blei mai blei haong yaom 2.000 đồng/kg, yaom yau nan lac biak glaong”.

Jeng tui amuk Mười, kuhria rah tapa 1ha, dom tamekai mada cakak klaak nao meda tagok tal jaik 2 tấn, jien mek tame jeng hu dom triệu đồng.

Atah di mblang hamu tamekai di amuk Mười oh tah lac mblang hamu di ong Lê Văn Nở (palei Thắng Lợi, xã Phú Cần) jeng bahrau pablei hu labaih 1 triệu đồng meng dom baoh tamekai mada klaak nao. Sang ong Nở pala hu 2ha tamekai, dalam nan dom baoh tamekai mada klaak nao tagok tal dom tấn. Ong Nở chreih chrai brei thau: “Dom baoh tamekai mada ini klaak nao ye oh thei mek mai ngak hagait, min oh thau habar thun ini hu urang mai blei. Duah hu dom triệu đồng meng dom baoh tamekai klaak nao, jeng daong hu jien mek tame, sang dahlak biak uan tabuan”.

Anak meta brei mboh, yaom lac pablei hu jien triệu meng dom baoh tamekai klaak nao min rilo po pala jeng oh mbak carak piah pataom mek. Makna lac, daok dom pluh harei tra lac tal bilan paik baoh tamekai nan ye dom po pala tamekai pataom prein tame sangka, cacak dhar. Ngan haong dom po pala tamekai, bilan paik baoh anak tal, mayaih lagaih meda duah hu yaok rituh triệu đồng, nan ye oh kayua dom triệu meng dom baoh tamekai mada klaak nao bo var klaak bilan tamekai praong.

Tui duah thau di urang vak, dom baoh tamekai mada klaak nao hu pablei ka 1 urang blei salih duy nhất lac amuk Trần Thị Tuyên mai meng ban Kon Tum, tỉnh Kon Tum. Amuk Tuyên brei thau, bruk blei tamekai mada hu amuk ngak dalam rilo thun saong nao blei di rilo labik, meng Đăk Lăk, Gia Lai, Kon Tum. Ini lac mbang camriep amuk Tuyên mai Krông Pa piah blei. Tui amuk Tuyên, labaih 1 adit dahlau, amuk blei tamekai mada yaom 2.000 đồng/kg, daok urak ini yaom daok 1.500 đồng/kg. dom tamekai mada ini amuk pablei veik ka 1 blei salih di TP.HCM. amuk Tuyên brei thau: “Kuhria rah tapa yaok harei, dahlak blei yaok piluh tấn tamekai mada di rahra huyện Krông Pa blaoh pajeng mai ka urang blei salih di TP.HCM. Daok bruk dom urang ini ngak hagait haong dom baoh tamekai mada ini, dahlak oh thau”./.