Ong Lê Văn Hải, daok di palei Thanh An, xã Láng Dài dahlau daih tok pala tangei saong tabau, yaok vụ mek jien tame hu biak takik saong labik pablei oh tani tanat. 10 thun dahlau, mboh dom sang daok jaik taphia pala phun khoai môn, ong bac megru piah pala tui. Meng 1-2 sào taneh pala tuk camereip, tal urak ini, ong peih praong taneh pala tagok 1,2ha, yaok thun ong pala hu 2 mbang. Meng phun pala ini bo jien mek tame di sang ong hu tani tanat jang.

Tui ong Hải, phun khoai môn takik ruak kik, tamuh hu dalam ia dauk saong oh abih rilo prein iek glang, nan ye lagaih haong taneh riya saong ilamu pala ngak di rahra. Piah ka phun hu rilo baoh, kein laba glaong, urang pala brei sangka ngak hacih hareik, khik ginup ia mangaok mbaok hamu piah phun tamuh siam, takik hu halak palai kaik. Urak ini, yaok vụ, ong Hải mek tame hu  20 tấn, yaom pablei meng 18-20 rabau đồng/kg, yaok vụ, hadei di kaoh abih phun jien buh tame ngak, ong daok laba hu 100 triệu đồng/vụ.

Mboh phun khoai môn ba jien tame tani tanat jang dom janih phun pala karei, ong Trần Sơn jeng daok di palei Thanh An khang hatai ba 4 sào taneh pala tabau tapa pala janih phun ini. Meng ngak njauk tui ilamu pala, nan ye taneh pala khoai môn di sang ong tamuh siam, mek hu 8 tấn/vụ. Tui jalan pala dahlau - hadei patui gauk, khoai môn brei baoh gam gam. Oh lac lagaih haong taneh riya, khoai môn urak ini daok hu darak pasar biak takre. Kayua yau nan ye, khoai môn di sang ong buac mek tal halei hu urang mai blei tal nan, hu tuk oh ginup piah pablei. Jien mek tame meng phun khoai môn di sang ong hu meng 100-120 triệu đồng/thun.

Urak ini, dalam xã hu labaih 22 sang pala jaik 15ha, rilo meng daok di palei Thanh An saong palei Cây Cám, haong sản lượng labaih 250 tấn/thun. Langiu di lagaih haong taneh riya di palei, rilo baoh, khoai môn daok hu rilo chất dinh dưỡng.

Piah paglaong siam mekre, ngak jeng bhum pala praong tui tanut VietGAP jeng yau padang angan pandap OCOP di palei, thun 2021, xã Láng Dài hu padang kapul pambuak gauk pala khoai môn Láng Dài.

Meng ini, kapul hu karja palei daong palagaih piah hu mbaok tame dom tal pato pasram, thau cambaih ilamu piah ngak pasiam pandap OCOP yau ye: taong yaom bruk siam mekre salamat ka alam môi trường vil val saong labik pala, chứng nhận salamat pandap panda; tem brei thau labik pala, jalan tame kadung, khik piah tui njauk jalan di pandap OCOP...

Ong Lê Ngọc Hiền, Phaok akaok kapul pala khoai môn Láng Dài, huyện Đất Đỏ khan lac, khoai môn Láng Dài mek hu angan OCOP pakat tỉnh thun 2022, chất lượng di pandap jeng pabak hu hatai caong di darak pasar. Tapa nan, urak ini biak mbuan pablei, urang blei jeng biak takre. Urak ini khoai môn Láng Dài hu pok brei angan pandap 3 patuk OCOP pakat tỉnh; rik daong ka baoh bei khoai môn meng pandap mbang me-in hu paglaong chất lượng saong angan je, paglaong prein meriak gauk di mangaok darak pasar saong cakrok patagok khang kajap./.