HTX hu pandar dom ilamo kỹ thuật bahrau, sangka pala rilo janih njam patam tui hatai caong di darak pasa

Hadei di tuk yuak padai đông xuân 2021-2022, ong Trần Văn Chính daok di phường Trung Kiên, quận Thốt Thốt oh tam drak padai bilan hè thu 2022 bo salih tapa pala phun lange di mangaok mblang taneh praong 13 công. Urak ini, phun linge di ong daok tamuh siam, caong lac mek hu rilo asar lange. Ong Chính brei thau: "Pala linge oh lac daong paglaong kein laba dalam bruk pala ngak di bilan hè thu bo daok dang ngak brei siam taneh saong cakak klaoh halak halin, ba siam lagaih ka bruk ngak padai dom bilan hadei. Bilan hè thu thun dahlau dahlak jeng pala linge, năng suất mek hu labaih 9 giạ sa công, linge pablei yaom 35.000 đồng/kg, kuhria tabiak dahlak laba hu labaih 2 triệu đồng/công, glaong jang dua mbang dut saong rilo baoh sang pala padai bilan hè thu. Phun linge diuk di langik pandiak biak siam, pala dalam katut panak harei, 75 harei lac paik hu nan ye biak hanjul jien buh tame”.

Gam haong phun linge, urak ini urang nong di dom quận, huyện dalam ban Cần Thơ jeng hu ba rilo janih njam patam karei yau ye baoh kadaoh, baoh ploi, tangei, baoh tamun ia, maraik…trun pala pablak di mbang taneh hamu saong di dom takai puh daong ba mai kein laba kinh tế glaong, rik daong cak rok patagok kinh tế puk palei. Ong Trần Ngọc Ðông daok di puk Ðông Mỹ, xã Ðông Thắng, huyện Cờ Ðỏ, brei thau: “taphia di bruk pala padai, dahlak daok hu 2,5 công taneh pala njam patam, dalam nan rilo meng pala lanon. Tui yaom lanon meng 6.000-9.000 đồng/kg yau tukvak tapa, năng suất mek hu 1,5 tấn/công, urang nong laba hu meng 4-10 triệu đồng/công/vụ dui atah meng 3-4 bilan".

Tui ong Lê Hữu Lộc daok di puk Ðịnh Thành, xã Ðịnh Môn, huyện Thới Lai, dom janih njam patam bhian hu tukvak pala katut panak harei, nan ye urang nong meda pala hu rilo vụ dalam thun, nan ye hu tagok hu jien mek tame, abih di nyu nan lac dom sang hu takik taneh pala drak. Piah paglaong kein laba bruk pala dom janih njam mbang hala di yaok công taneh, urang nong parabha jeng rilo ô, trun pajaih dahlau hadei di gauk sa harei piah hu njam paik gam gam, hu jien mek tame yaok harei. Meng jalan ngak ini, yaok công taneh pala njam mbang hala, urang nong meda mek tame hu yaok piluh triệu đồng, gaok mai lac yaok rituh triệu đồng yaok thun. Min, pala dom janih njam mbang hala abih biak rilo tukvak saong prein kayua dom bruk ngak jeng hu ngak meng tangin.  

Piah pabak ka bruk cak rok patagok bruk ngak tui jalan ngak praong, hu rilo kaya pandap, taphia di bruk pambuak gauk padang dom hợp tác xã (HTX), kapul pambuak gauk pala njam patam, urang nong daok jhul khang bruk pandar jamriak, pandar dom ilamo kỹ thuật tame bruk pala, ngak. Saai Nguyễn Tuấn Thanh daok di xã Ðông Thắng, huyện Cờ Ðỏ, brei thau: “Urak ini, dahlak hu pandar dom jamraik tame bruk ngak taneh saong pruh ia, jang yau bruk pandar dom bruk pruh ia patak pataom saong kein laba, abih di nyu lac pruh ia njom tame taneh. Tuk pala njam patam di mblang taneh praong angaok taneh hamu, dahlak jeng pandar blah tauk ngak nong piah pacang taneh plaih di bruk buh tame rilo prein ngak hareik saong takik pruh ia”. Tui ong Nguyễn Sơn Hà, Yam ndoc HTX Njam salamat Long Tuyền, quận Bình Thủy, HTX oh lac sangka tal bruk rami ramik bein pala njam biak tani tanat, hu ilamo piah ba mai kein laba dalam bruk iek glang saong paik mek bo rilo mbang taneh pala njam di HTX jeng hu ngak dom jalan pruh ia tự động piah patak pataom tukvak saong prein iek glang. Piah paglaong kein laba bruk pala drak, HTX hu pandar dom ilamo kỹ thuật bahrau, sangka pala rilo janih njam patam tui hatai caong di darak pasa, tui đơn đặt hàng di dom doanh nghiệp, siêu thị saong ghing lisei praong ka rilo manuac./.

Urang lang: Thu Thao – 08/06