Pala njam di mangaok mbaok ia – bruk ngak biak karei di dalam bruk ngak nong saong jeng lac bruk ngak duy nhất di tỉnh Long An hu saai Nguyễn Văn Đắc peih ngak hu kein laba. Piah ngak hu bruk nan, saai Đắc pataom mek dom janih klaok katak, pandar halam papaok veik saong ngak khung krem piah khik catang ngak jeng dom baoh bè praong 1m, atah 3m. Dom bao hè ini hu pambuak haong gauk meng talei cáp piah kak tame ar. Gam haong nan, saai sraong njam baok di mangaok mbaok ia piah pabu, pa-auk haong dom janih khak hữu cơ saong pong. Hadei di an, tauk tagok bè, yau nan meng meda drak asal pala njam.

Tapa labaih 3 thun ngak, tal urak ini, saai Đắc hu jaik 400 bè pala njam angaok ia praong labaih 3000m² mbaok ia. Yaok harei, saai Đắc mek hu  300 – 400 kg njam, yau ye baoh kadaoh, baoh ploi, baoh lanaong, traong ndaiy, baoh paya, njam hijao dom janih, hu yaom pablei meng 40.000 đồng/kg tagok tui janih.

Saai Đắc khan lac: pala njam di mangaok mbaok ia tok gaok kan kandah tuk camriep. Hadei di rilo mbang ngak oh jeng, dahlak bac hu rilo ilamo saong mboh bruk ini mbuan ngak jang pala di mangaok mbaok haluk biak rilo, trun labaih 80% halak halin, oh abih tukvak pruh ia. Độ ẩm glaong nan ye njam racam saong yamen bingi, tukvak paik katut jang. Dom janih njam hijao mbang hala pala labaih 10 harei meda paik hu, katut harei jang dut saong pala di haluk labaih 1 adit. Urak ini, saai Đác hu pala hu njam xà lách Đà Lạt. Langiu di nan, saai daok caga pala bimao pong hacih.

Angaok jalan tame labik pala njam di saai Đắc, mbaok mata hu khik yau tamo, tok hu tuh hasit patau sit piah trun manieng glut baok tuk langik hajan. Dom janih bingu, hareik pahe pateok hu halak halin ye hu khik veik. Di mala danao, dom sruh ghe gilai sit, vỏ lãi hu urang ngak vah biak hanjul vil val dom bè njam piah pala, iek glang njam hu mbuan lagaih.

Langiu di nan, di mala danao saai Đắc daok raong ikan. Ikan di pak ini tok mbang njam theik mai ngak pandap mbang ka ikan, oh pandar pandap mbang kong nghiep saong dom janih pandap mbang karei. Nan ye, oh lac dom janih njam pahe bingi karei bo ralaow di ikan jeng bingi biak karei.

Taong abih bein njam saong traong ndaiy daok megei angaok mbaok ia, saai Đắc brei thau, njam oh pruh jru, biak hacih, tok uak thur mur lac meda mbang hu chip.

Saai Đắc khan lac anak tal, langiu di bruk peih praong bè njam njam ye dahlak jeng daok sahaneng tal bruk padang labik ini jeng labik sinh thái hijao – hacih – mekre piah duh ka rahra mai rivang iek, roh duah ka bruk ngak nong hacih jang yau bruk bè pala njam angaok mbaok ia ini. Gam haong nan, meda peih bruk pabak var mbang meng dom pandap daok hu dalam bein”.

Ong Nguyễn Thanh Truyền, yam ndok Sở Ngak nong saong patagok palei pala tỉnh Long An brei thau, bruk pala njam angaok bè mangaok mbaok ia di saai Nguyễn Văn Đắc yaom lac bahrau hu peih ngak min tuk camriep hu ba mai kein laba glaong. Urang blei mbang hu njam hacih piah pabak ka var huak di dalam sang. Jeng meng bruk ngak ini, gah chức năng daok pachreih rahra pandar dom danao hu ia atau dom bhum thaong ia dauk luac thun piah ngak bè pala njam hacih, gam pabak ka var huak di sang, gam tagok jien mek tame. Min, rahra njauk duah thau cambaih laih piah peih ngak hu tani tanat, salamat. Gam haong nan lac pambuak haong dom đại lý siêu thị piah hu labik pablei./.