Khak eng drei ngak hu kein lagaih di labik lac yaom biar, pandap piah ngak khak mbuan duah, siam ka taneh

Hadei di rilo thun rilo meng pandar khak hóa học atau khak hữu cơ, jaik di ini, HTX pala, ngak saong pablei njam hacih sa-at Long Thuận hu jak ba, tacei pato urang nong ngak khak phân hữu cơ piah buh ka njam patam. Bruk ini hu daong ka urang dalam HTX patak pataom hu jien blei khak, dak harei dak tagok rilo khak hữu cơ eng drei ngak, takik pandar khak hóa học, jru khik caga phun pala. Ini lac jalan nao, jeng lac jalan piah ka HTX tabiak truh bruk having akaok meng yaom tagok srau kadau di khak saong pandap ngak nong.

Ong Dương Minh Sang, Yam ndok HTX pala, ngak saong pablei njam hacih Long Thuận brei thau, urang nong mek pandap hu dalam palei piah pa-auk ngak khak hữu cơ yau pong, dom janih hareik, khak limo saong chế phẩm trichoderma. Yaok mbang pa-auk khak hữu cơ ủ meng 3 tal 4 bilan lac meda ba tabiak buh hu ka phun pala, salih ka khak hóa học. Khak eng drei ngak hu kein lagaih di labik lac yaom biar, pandap piah ngak khak mbuan duah, siam ka taneh, daong ngak brei taneh tasaoh, pabak dinh dưỡng ka phun tamuh siam, takik hu ruak kik halak halin. Njam patam hu buh khak hữu cơ meda pabak ka darak pasar pandap mbang siam, hacih sa-at, pablei hu yaom glaong jang meng 10 - 20% duk saong pala ngak yau dahlau daih.

Hadei di tuk tame HTX, 2.000m2 taneh pala njam patam di urang ngak nong angan Nguyễn Hồng Dũng daok di xã Long Thuận pandar biak takik jru khik caga phun pala haong khak hóa học. Meng ngak taneh, trun pajaih, pruh ia, ngak hareik, paik mek… jeng pandar biak takik dom janih jru hóa học jhak ka prein yava. Bruk ngak jru pacang caga ruak kik halak halin jeng biak mbuan, pandar tỏi, baoh meriak, laya chai klik, tram haong ia saong alak blaoh pruh nyu tagok njam. Ong Dũng eng drei ngak saong pandar khak hữu cơ piah salih ka khak hóa học. Meng nan, abih takik jien buh tame ngak, njam patam jeng siam mekre hacih sa-at ka urang blei mbang, yaom pablei glaong jang yaom darak pasar.

HTX pala, ngak saong pablei njam hacih Long Thuận hu padang tagok di thun 2013, urak ini hu labaih 80 urang, 160 ha taneh pala haong khak hữu cơ pandar dalam pala, ngak lac meng 40 - 50%. Ini lac sa dalam dom bhum pala ba akaok nao dahlau di Đồng Tháp ngak tabiak khak hữu cơ saong daok brei mboh kein laba, padang hu hatai jia saong dui pachreih urang ngak nong hu mbaok tame.

Tui ong Dương Minh Sang, Yam ndok HTX pala ngak saong pablei njam hacih Long Thuận, anak tal, HTX daok hu panuac kakei urang dalam HTX patui bruk eng drei ngak saong pandar khak hữu cơ. Gam haong nan, pathau khan piah ka mikva urang nong thau ka bruk ngak nong hữu cơ, siam lagaih di khak hữu cơ ngan saong alam môi trường, phun pala, thau jalan ngak saong pandar khak hữu cơ dalam pala, drak. Tapa nan, daong salih bruk bhian randap meng kan mai lac pandar khak hóa học di urang ngak nong./.

                                                  Urang lang: M. Phuong – 18/05