Meng jalan ngak ini, nyu ba mai kein laba, saong daok ngak brei taneh hu siam jang, abih takik jien blei khak buh ka dom bilan padai patui di nan. Kadha “urang ngak hamu caong thau” adit ini, hu kadha vak brei thau bruk pala njam puan mek asar,  di Ánh Nguyên hu ba tagok báo An Giang.

Ba akaok dalam bruk pala njam puan mek asar di xã Bình Mỹ lac sa-ai Nguyễn Quốc Thịnh haong labaih 10 thun pala. Tukvak camereip, yaok vụ sa-ai Thịnh tok pala dom pluh công taneh, urak ini tagok labaih 10ha saong tok pala dalam bilan đông xuân.

Piah caga ka bilan pala bahrau, meng tuk daok ngak padai bilan thu đông, sa-ai Thịnh hu pambuak haong urang blei salih, hu pabak asar pajaih gam haong sarak daong 2 triệu đồng sa công, meng jien daong ini, sa-ai Thịnh blei khak, pah menuac ngak… Tal tuk mek pablei, yaom jien ini hu kaoh bayar veik. Dahlau di tuk pala, asar pajaih brei hu pabam dahlau 1 bilan, hadei di tuk yuak padai bilan thu đông ye brei ngak taneh, pah menuac tam angaok hamu.

Sa-ai Thịnh khan lac: “Dahlau saong hadei di tuk tam, brei hu ia dauk glaong jang mbaok hamu hasit piah lagaih ka njam puan tamuh, tabiak caduk bak mblang hamu. Tukvak ini, urang nong parai khak, pruh jru pacang hareik, plaih bruk pacang jalan tamuh di njam puan. Tal tuk njam puan pacang sre mbaok hamu, brei cakak ia chip, mbaok taneh thu, bingu tabiak rilo. Ini lac ilamu daong ka njam puan hu rilo asar saong hu năng suất glaong”.

Hadei di 3 bilan pala, njam puan brei mek asar, min meyah khik tal 4 bilan, asar nyu thu saong mek hu chất lượng, năng suất glaong jang. Kuhria rah tapa, yaok công taneh mek hu 400kg asar. Yaom pambuak bruk meng akaok vụ sanya pablei ka urang blei salih lac 39.000 đồng/kg, hadei di kaoh abih phun jien buh tame, urang nong laba hu meng 6-8 triệu đồng sa /công.

Tui sa-ai Thịnh, dahlau di tuk pala, brei thau dom ilamu ka dom bruk yau ye: langyah daong ka njam puan tabiak bingu, ndam baoh rilo… Tuk njam puan me-om sre mbaok haluk, mikva oh brei ia tame, kayua lac hu ia ye njam puan tamuh phun, oh tabiak asar. Caik ka haluk dak thu, asar njam puan dak hu rilo. Bhian di nyu, tuk ia bilan bak baoh bilan 2, dom hamu njam puan mek asar di xã Bình Mỹ hu mek asar. Dahlau daih, urang nong bhian pah urang cakak meng tangin, min dom thun jaik ini pandar jamriak nan ye tukvak kaoh mek asar hu samar jang.

Njam puan hadei di tuk cakak blaoh hu pambu tapak di mblang hamu, hadei di 10 - 15 harei brei tame mac tuốt piah laik mek asar saong jao ka urang blei. Tuk salih tapa pala njam puan mek asar, gam daong ka urang nong hu laba tapak meng bruk ngak, gam pasiam taneh, daong ka urang nong abih takik jien blei khak buh ka dom bilan padai patui di nan. Ini lac bruk ngak ka urang nong bui sambai chreih chrai tuk salih bruk ngak.

Dahlau daih mikva urang ngak nong di xã Bình Mỹ bhian ngak padai 3 vụ, min dom thun jaik ini rilo sang hu salih meneing taneh ngak padai tapa pala njam puan mek asar. Rilo mikva brei thau, hadei di vụ ini, meyah hu kein laba, ye brei ba dom taneh daok veik tapa pala njam puan mek asar dalam bilan đông xuân. Cakak njam puan mek asar blaoh, tapa ngak padai dalam dom vụ hadei di nan./.