Ngak bimao pong 20 thun ini mai, saai Trần Văn Việt, daok di quận Thốt Nốt, Cần Thơ brei thau, yaom lac ngak bimao pong biak glaih glar min pablei hu yaom, nan ye dom urang nong oh hu taneh piah ngak meda pah taneh piah ngak bimao pong. Mblang taneh ngak bimao dak harei dak tagok, tui nan bruk cuh mblang hamu, klaak pong jeng hu trun.

Mboh bruk pandar pong di bhap bini piah raong glang, pala drak tagok glaong, thun 2020, Hợp tác xã ngak nong Toàn Phát (huyện Cờ Đỏ, Cần Thơ) buh jien blei 8 mac cuốn pong, blei pong meng dom mblang hamu di Cần Thơ, Đồng Tháp, An Giang... cuốn jeng paok pablei. Yaok thun, hợp tác xã cuốn hu 350.000-500.000 paok pong, dom pong ini jeng oh ginup pablei. Meng di tuk hu mac cuốn pong, bhap bini pambuak haong hợp tác xã pablei rilo jang nan ye bruk cuh mblang hamu jeng trun daok takik.

Gam haong nan bahrau ini, Viện roh duah ilamo padai Dunya (IRRI) pambuak haong Đại học Nông lâm TPHCM, Sang bac Đại học Tiền Giang saong gah ngak nong Cần Thơ ba brei công nghệ pa-auk khak hữu cơ meng pong pandar jamriak piah daong ka bruk paralai pong hu siam lagaih saong paglaong siam mekre ka khak hữu cơ, tagok kein laba ka bhap bini saong patrun nerak tachrauk alam môi trường.

Bruk pandar jamriak piah pa-auk khak hữu cơ meng pong hadei di tuk ngak bimao pong, pambuak haong khak limo, bimao vi sinh meda dui katut veik tukvak jeng khak (labaih 45 harei) dut saong pa-auk pong mek tapak meng mblang hamu. Pandar jamriak piah srau khak hu năng suất glaong jang ngak meng tangin (3 tấn sa maong). Chất lượng khak hu taong yaom lac siam bo yaom lap jang labaih mateh dut saong darak pasa.

Kapul pambuak gauk ngak nong hijao (quận Thốt Nốt) – labik hu daong mac srau khak hữu cơ ngak hu khak hữu cơ meng pong piah pablei tabiak darak pasa. Dahlau di tuk ba khak hữu cơ tabiak darak pasa, saai Đồng Văn Cảnh, Akaok kapul pambuak gauk ngak nong hijao hu pandar khak hữu cơ buh ka bein maraik di sang drei. Urak ini bein maraik di sang saai bak baoh, 1m2 taneh pala maraik paik hu 4kg maraik. Urak ini dom urang dalam kapul pambuak gauk ngak jeng njauk gauk rik jien tame piah ngak khak hữu cơ meng pong, pandar hu dom pong klaak, gam trun hu bruk cuh mblang hamu.

Ong Nguyễn Thanh Hồng urang dalam kapul pambuak gauk ngak nong Toàn Phát brei thau, meng pandar khak hữu cơ nan ye ong Hồng trun hu khak vô cơ, trun hu jien buh tame ngak padai. Dahlau deih, urang nong jeng pa-auk khak hữu cơ meng pong min srau meng tangin, kayua khak takik nan ye tok pandar piah buh ka phun.

Tui ong Lê Thanh Tùng, Phó akaok Cục pala drak, bruk pandar pong pa-auk khak hữu cơ meng pong hu daong ngak ka mblang hamu gam tathuak tabiak khí  sang kreih, gam tagok kaya siam ka mblang padai. Abih di nyu nan lac, dalam tuk yaom khak tagok glaong, bruk ngak tabiak khak hữu cơ meng pong hu daong ngak brei patrun yaom ngak tabiak padai brah. Ngak padai hữu cơ meng khak hữu cơ meda mek hu tanut chuan siam ka alam môi trường, padai mek hu tanut  chuan salamat pandap mbang, oh ngak tathuak tabiak khí sang kreih./.

Urang lang: Thu Thảo