Thun 2017, yaom lac daok hu bruk ngak tani tanat, min sa-ai Quốc jeng khang hatai nao palei kuac raok danao raong ikan. Meng phun jien dalam tangin hu labaih 150 triệu đồng, sa-ai nao mesraiy di gilang pariak 500 triệu đồng piah peih bruk raong ikan tui hatai caong di drei. Sa-ai buh jien tame kuac raok 3 danao raong ikan praong abih tih 3.000 m2.

Tuk bahrau raong, sa-ai oh hu rilo ilamu raong ikan, bo ngak tui harak tapuk tacei pato. Mbang camereip ikan lahik kayua labik raong daok jaik kraong, craoh.

Dalam thun hadei di nan, sa-ai Quốc khang hatai buh tabiak labaih 150 triệu đồng blei 20.000 drei ikan ging saong 5.000 drei ikan halăng pajaih. Hadei di jaik 1 thun raong, sa-ai mek tame hu labaih 9 tấn ikan. Kaoh abih phun jien buh tame ngak, sa-ai daok laba hu labaih 300 triệu đồng. Dom thun hadei di nan, bruk raong ikan ini ba jien tame ka sang sa-ai meng 400-500 triệu đồng jien laba yaok thun.

Piah trun jien sahui saong khik ka ikan praong siam, khang kadang, 3 thun tapa, sa-ai Quốc blei ikan ging pajaih hadei di tuk caih hu 6-7 harei mai raong. Nan ye, langiu di bruk caga hu pajaih siam, sa-ai pablei ikan pajaih tabiak dom tỉnh jaik taphia haong yaom 5.000-6.000 đồng sa drei.

Abih di nyu nan lac, akaok thun ini, sa-ai Quốc daok buh tabiak 200 triệu đồng blei 60.000 drei ikan jarôt ia taba raong dalam danao haong ikan ging. Hadei di dom bilan raong, ikan jarôt ia taba praong siam dalam labik ia nduac megei, thoáng khí meng jamriak ngak ôxy bhian hu peih nduac. Meng dom ikan daok hu dalam danao, tui kuhria mboh dahlau, tal bilan 10 thun ini meda mek tame hu 1,2 tấn.

Sa-ai Quốc khan lac: “Thun ini drei bahrau raong janih ikan ini, kayua ini lac janih ikan palei nan ye meda ba mai rilo jien laba. Phun jien drei buh tabiak blei pajaih biak rilo min jien mek tame jeng biak glaong lac jaik 500 triệu đồng sa tấn saong jien laba jeng hu meteh hadei di kaoh abih dom jien sahui”.

Urak ini, ikan jarôt ia taba hu raong rilo di dom tỉnh miền Tây. Tukvak raong 10 bilan lac mek pablei hu. Ikan trak 40 drei sa kg, yaom pablei jeng biak glaong, meng 450-500 rabau đồng/kg, hu tuk tagok tal 800-900 rabau đồng/kg.

Akaok kapul urang ngak nong xã Lộc Hiệp Nguyễn Văn Hà brei thau, tapa tui iek, duah thau, kapul mboh lac bruk raong ikan di sa-ai Quốc daok ba mai kein laba. Urak ini darak pasar daok caong hu rilo janih ikan ini. Anak tal, kapul urang ngak nong brei pambak praong bruk raong ikan di sa-ai Quốc ka mikva urang ngak nong dalam bhum mai bac megru ilamu piah ba gauk yam tagok ngak kaya meda.

Bruk raong ikan halăng, ikan ging, ikan jarôt ia taba di bhum tapen negar bahrau bahrang di sa-ai Nguyễn Hoàng Anh Quốc hu ba mai kein laba glaong. Abih di nyu nan lac, raong ikan jarôt ia taba lac sa dalam dom janih ikan hu yaom glaong, ini jeng lac bruk bahrau rik daong parilo janih raong kaya ikan di dalam tỉnh./.