Maong mboh pak ini hu rilo mbuan lagaih piah raong arieng tasik, saai Nguyễn Bửu Lộc, daok di puk Rạch Tràm, xã Bãi Thơm, ban Phú Quốc khang hatai pandar bruk raong arieng tasik dalam kadung nhựa mala halui glai tapen tasik. Saai Nguyễn Bửu Lộc khan lac: arieng tasik di Phú Quốc hu rup jhuk, ginraong bhong, ralaow khang, yamen bingi nan ye pablei hu tani tanat. Min, arieng tasik di Phú Quốc dak harei dak takik nao, nan ye dahlak brei raong arieng tasik dalam kadung nhựa, daong paglaong jien mek tame ka sang.

Rah tui dom baoh kraong nduac tabiak tasik di Phú Quốc, lavik lavik mboh hu arieng anek daok diuk nan ye saai Lộc sahaneng tabiak bruk raong iek arieng rah tui dom jalan ia nduac di kraong anak sang drei. Tuk camriep, saai Lộc raong labaih sa ratuh drei arieng, gam raong gam bac ilamo meng bruk raong, saai biak tatuak drei anak dom jak jeng ngak hu lac dom drei arieng lahik nao oh rilo saong ralaow arieng jeng oh lah hagait arieng di tasik.

Saai Lộc brei thau: kayua pandap mbang di arieng lac ikan tasik, bo drei raong di ia tasik mala halui glai nan ye labik daok di arieng jeng dreih yau di langiu tasik. Hadei di mbang raong iek hu jak jeng, dahlak raong veik 1.500 drei. Piah hu arieng raong patui veik, dahlak daok pacang halam raong pabak jaik 2.000 drei arieng sit; cang tal tuk arieng praong hu 3 - 4cm blaoh drei buh tame kadung nhựa raong veik, plaih ka nyu kapik gauk ngak jaoh ginraong saong lagaih ka drei tui iek.

Meng akaok thun tal ini, saai Lộc peih praong bruk raong saong pablei tabiak darak pasa labaih 500 drei arieng tasik. Urak ini, yaom arieng tasik ralaow hu urang blei salih mai tal labik blei, janih meng 5-6 con tame sa kg ngan haong yaom 300 ribau đồng; 4 drei/kg yaom 400 ribau đồng; janih 2-3 drei sa kg yaom 500 ribau đồng. Hadei di tuk kaoh abih jien buh tame raong, jien blei pandap mbang, saai Lộc daok laba hu meng 50-60%.

Tui saai Lộc: Raong arieng tasik biak mbuan, mikva njauk duah thau bruk mbang, daok di arieng tasik saong kham marat caik hatai, bac magru ilamo sangka ye meda raong hu siam. Mayah hu jak jeng meng mbang raong camereip ye urang raong meda mek hu phun jien buh tame chip. Kadung nhựa raong arieng di drei pandar hu rilo thun gam, nan ye bruk ngak ini meda pambak praong tabiak di dom bhum palei daok jaik tapen tasik. Langiu di nan, bruk raong arieng ini jeng jaik taphia haong  alam langik tasik jang nan ye meda trun hu rilo jien điện, pandap panda karei dut saong bruk raong arieng dalam kadung dalam sang yau rilo labik daok ngak. Saai Lộc kuhria lac, meda buh jien blei veik 4.000-5.000 kadung nhựa piah peih praong bruk raong arieng tasik ini. Taphia di nan, saai Lộc daok caong khin pambuak haong dom baoh sang raong di pak ini padang hợp tác xã atau kapul pambuak gauk raong arieng tasik piah bruk cak rok patagok khang kajap jang…

Ong Nguyễn Văn Quân, Phó akaok puk Rạch Tràm, xã Bãi Thơm brei thau: “Bruk raong arieng vèo mala halui glai tapen tasik urak ini daok biak bahrau di pak ini min tuk camriep mek hu siam lagaih. Tapa pasang iek bruk ini jeng mbuan ngak saong lagaih haong langik tasik di pak ini; kayua yau nan ye, mayah bruk ini hu peih praong meda daong pasiam paglaong jien mek tame ka sang. Gam haong nan, daong langyah bruk pabak kaya tasik pak di Phú Quốc”.