Dahlau deih, saai Võ Văn Thuận ngak biak rilo bruk, meng ngak thợ hồ, peih radaih jalan atah, thợ điện,… min thu ia huac lac abih jien. Hadei di rilo mbang sahaneng kuhria, njauk ngak kaya mada di bhum taneh palei drei, saai duah thau, bac magru di mangaok harak mbao, internet ka ilamo raong chồn hương. Thun 2015, saai tame sa trang trại di Bình Phước blei 20 drei chồn hương mai raong, dalam nan hu 13 drei binai saong 7 drei tano. Raong hu sa thun, chồn nyu manek. Min, hadei di dom bilan, tapon chồn njauk ruak aih traoh metai nao, tok daok veik chồn maik ame.

Saa Thuận brei thau: “Kayua ka oh thau cambaih ilamo, ka oh thau kambuan khanat di chồn, abih di nyu nan lac chồn nek, nan ye raong hu hadom adit ye nyu metai abih”. Yaom lac adei sa-ai dalam sang ieu sa-ai  pablei abih chồn hương, duah bruk karei ngak, min Thuận khang hatai khik veik piah padang tapon. Tuk harei, saai daong diuk pablei tạp hóa, melam mai saai tagok mạng, blaoh blei tapuk mai duah thau jalan taong ruak aih traoh ka tapon anek chồn.

Saai Thuận brei thau: “hadei di rilo thun raong chồn, urak ini dahlak thau hu kambuan khanat, jalan mbang manyum, manek di janih chồn dalam labik raong kareik saong thau padang ngak dom labik brei daok karei oh caik ka anek chồn daok haong gauk, brei hu labik pajaih, labik piah manek saong labik raong tui yaok mbang. Langiu di nan, njauk caik hatai tal bruk klauk vaccine saong jru taong ruak cầu trùng aih traoh piah chồn oh njauk aih traoh saong praong siam”.

Taphia di bruk brei ka tapon chồn mbang trei, ginup dinh duong, chồn biak iek praong bruk hacih saat alam môi trường; var raong saong labik caik ia hu rao hacih 2 mbang sa harei. Yaok adit, saai pruh jru pametai anek ruak piah patakik bruk tamuh jit ruak. Yaok 6 bilan atau 1 thun, saai klauk jru vaccin ka tapon chồn. Meng nan bo tapon chồn takik njauk ruak, tagok prein pacang caga ruak, praong  siam. Meng 20 drei chồn, tal urak ini, labik raong di saai Thuận hu labaih 125 drei chồn manek tabiak saong 50 drei chồn anek.

Tui saai Thuận, chồn hương asal di nyu lac athur glai nan ye hu prein pacang caga ruak glaong, takik ruak. Chồn mbuan raong, oh abih rilo tukvak iek glang, pandap mbang mbuan duah. Dalam tuk nan, bruk caong blei ralaow chồn hương di darak pasa biak glaong nan ye oh huac pablei oh hu. Chon manek siam, hadei di 12 tal 14 bilan raong nyu manek. Dalam tukvak ini, chon manek hu pabak ginup dinh duong, abih di nyu nan lac canxi, piah patakik bruk chon amaik hadei di tuk manek kurang dinh duong meda mbang anek di drei. Anek chon amaik yaok thun manek meng 1 tal 3 mbang, yaok mbang hu meng 2 tal 4 drei. Hadei di 60 harei menek tabiak, chon anek hu caik karei saong raong meng pandap mbang mbiah tal tuk khang padang meng pablei.

Urak ini, chồn hương bahrau brei daok karei di amaik, saai Thuận pablei hu 9 triệu đồng sa gu, daok chon pajaih caga manek pablei hu 40 triệu đồng sa gu. Langiu di bruk pabak ka dom var raong dalam tinh, saai daok pablei tabiak dom tỉnh Nghệ An, Gia Lai, Đắk Lắk,... Kaoh abih phun jien, saai laba hu jaik 800 triệu đồng sa thun. Langiu di nan, saai daok pablei chon ralaow ka dom nhà hàng dalam saong langiu  tỉnh, jien laba hu veik 600 triệu đồng./.