Chồn hương lac athur glai, ralow nyu hu pandar yau sa janih jru siam takik hu. Langiu di nan, chồn hương daok lac janih pandap mbang pahe bingi hu urang takre dalam dom nhà hàng. Chồn hương rup atah, bilau panak katut sambo xám jhuk, rah tui talang raong hu dom inem sọc dưa sambo xám jhuk atah jeng meng bara trun tal taok, akaok cambuai haluak, takai katut panak, iku atah saong hu 7 vòng mbong patih pablak haong 7 vòng jhuk. Hu dalam glai min kayua urang caong blei rilo saong hu yaom gah kinh tế nan ye urak ini bruk raong chồn hương dak harei dak mboh rilo di dom puk palei.

Sa-ai Trần Quốc Khánh daok di ấp Thới Thạnh, xã Giai Xuân, huyện Phong Điền (TP Cần Thơ) lac sa dalam dom sang camereip abih raong chồn hương dalam var ro. Tuk camereip sa-ai raong jaik 50 drei praong, sit. Kayua oh hu taneh praong nan ye sa-ai Khánh mek mbaok danao raong ikan padang sang tual ngak var ro piah raong chồn. 

Sa-ai Khánh khan lac: Var ro raong chồn hương ngak meng kayau, vil val pacang halam, gah angaok tauk tôn. Mbaok taneh raong brei praong, laneing, lahơi piah ka chồn amaik ame nduac nao mai, kayua nyu nduac nao mai rilo nyu dak khang kadang, caih rilo. Gah dalam var ro caik sa talok haluk, daong ka chồn mboh yau nyu daok di gah langiu langik tasik.

Urak ini, bruk raong chồn di sa-ai Khanh yaok harei tok abih 100.000 đồng jien blei pandap mbang saong abih meteh mon piah ngak hacih var ro. Yaok harei, tok brei ka nyu mbang 1 mbang di tuk mesup, pandap mbang lac ikan haong baoh kayau. Yaok thun, sa-ai Khánh mek tame hu jaik 300 triệu đồng meng pablei anek pajaih saong ralow chồn.

Sang ong Trần Văn Vui jeng daok dalam ấp Thới Thạnh, xã Giai Xuân bahrau raong chồn hương hu labaih 2 thun min hu kein laba glaong, meng sang kan kathaot, urak ini hu tabiak truh kan kathaot, dom anek hu nao mbang bac. Ong Trần Văn Vui brei thau: “Urak ini, kuhria abih drei tano haong drei binai, var raong di sang dahlak hu 12 drei. Duk haong dom bruk raong karei, mboh bruk raong chồn hương ba mai kein laba glaong. Meyah thau iek glang, chồn hương meda caih hu 3 mbang yaok thun. Yaok drei chồn hương ba jien tame hu jaik 25 triệu đồng sa thun”.

Dom urang raong chồn hương di huyện Phong Điền khan lac, chồn hương diuk hu labaih 10 thun. Chồn hương raong meng sit tal 9 bilan atau 11 bilan ye nyu trak hu 4 - 5kg lac meda brei juak gauk hu piah metian, caih anek. Chồn metian dalam 2 bilan saong nyu raong anek jeng dalam 2 bilan. Tui nan, yaok thun chồn hương caih anek hu  2 - 3 mbang saong yaok mbang caih meng 2 - 4 drei, hu tuk hu 5 - 6 drei. Chồn hương hadei di tuk caih hu meng 2 bilan tagok meda pablei hu drei anek. Raong meng 6 - 7 bilan praong hu meng 2,8 - 3,5kg sa drei. Urak ini yaom drei pajaih meng 5 - 11 triệu đồng sa drei, daok chồn pablei ralow yaom meng 1,5 - 2,2 triệu đồng sa kg, hu tuk yaom nyu tagok glaong jang.

Chồn hương takre daok ta-eng nan ye njauk ngak var ro karei ka yaok drei saong tok kreik drei tano haong drei binai haong gauk piah ka nyu juak gauk dalam tukvak katut panak tuk mboh drei binai yau khin tano. Njauk thau lac, chồn anek hadei di tuk caih oh ka peih meta, mikva brei sangka iek glang nyu, khik ka nyu ấm saong brei ka nyu menyum ginup ia tasau.../.