Labik raong anek dui, don saong thuh di saai Nguyễn Văn Chúc daok di quận Bình Thủy, ban Cần Thơ praong labaih 1.000m2. Saai Chúc khan lac: Dahlau di tuk raong dom drei ini, dahlak ngak gah padang ngak. Atah di ini labaih 9 thun, dalam sa mbang nao ngak di Tây Bắc, dahlak hu mbang ralaow dúi, don pahe bingi. Hadei di nan, tuk dahlak nao ngak sang ka sa ayut saabat ye thau tal bruk raong athur glai ini nan ye dahlak duah jalan raong iek.

Tapa tukvak pasang iek saong duah thau tapa harak gar ka dom athur glai yau ye anek dúi, don, thuh, saai Chúc khang hatai blei 10 gu anek dúi pajaih mai raong iek. Saai Chúc eng drei roh duah ilamo raong anek dúi, don, thuh meng dom urang raong blaoh saong duah thau di mangaok mạng Internet.

Hadei di labaih 1 thun, tapon dúi di saai Chúc praong siam, jaik manek. Tuk ini, saau meng khang hatai blei anek thuh, anek don pajaih mai raong. Saai Chúc hu 3 labik raong praong daok di gah barak tame tal gah maraong. Taeng labik raong di Cần Thơ praong 1.000m2, hu parabha jeng 3 labik, lac labik raong dúi, labik raong anek thuk saong labik raong don. Abih tih dalam labik raong hu labaih 1.000 drei.

Labik raong di saai Chúc jeng kayua adei saai dalam sang tui iek. Yaok harei, tuk dah page, adei saai caik tabiak labaih 1 maong brei ka tapon anek dúi, don, thuh mbang saong sa maong di bier harei piah rami ramik ngak hacih var raong. Pandap mbang di anek dúi biak mbuan duah, lac kreim, tabau saong tangei. Yaok thun, 1 drei dúi amaik ba jien tame hu labaih 6 triệu đồng. Daok anek thuh raong biak mbuan, pandap mbang rilo meng lac patei tasak. Jeng dreih yau nan, anek don jeng mbang patei tathak, bei java, bắp cải,...

Anek don, dúi saong anek thuh raong labaih 1 thun meng manek. Dúi manek 3 mbang sa thun; don saong thuk yaok thun manek 2 mbang. saai Chúc brei thau: Anek thuh raong labaih 1 thun lac pablei hu, tuk nan nyu trak meng 7-8 kg sa drei; pablei yaom meng 1,8-2 triệu đồng/kg. Thuh manek meng 3-5 drei sa mbang. Anek thuh jeng mbuan raong, tuk praong trak tal 15kg.

Anek dúi mốc saong dúi má đào raong labaih 1 thun trak meng 3-5 kg sa drei. Dúi mốc hu yaom meng 500.000-600.00 đồng/kg; daok dúi má đào meng 800.000 đồng tal 1 triệu đồng/kg. Anek don lac họ nhím, saai Chúc raong labaih 1 thun ye trak hu labaih 5kg, yaom pablei meng 1,4-1,6 triệu đồng/kg. Var raong hu ginup ia harei ye dúi, don, thuk meda praong siam.

Tui saai Chúc, dom drei athur ini lac janih mbuan raong, mbuan  iek, prein pacang caga ruak kik glaong, takik ruak. Daok anek don, thuh, melam hu brei mbang pabak bu ikan, bu maneu. Var raong anek don saong thuk jeng biak mbuan, mikva tok pacang halam piah raong. Taeng var raong anek don brei ngak dreih yau dom lubang dalam glai piah nyu tame ndih saong manek.   

Meng tari tareng, takre bac megru saong hatai caong ngak kaya mada, saai Chúc hu jak jeng haong bruk raong anek athur glai. Meng 3 labik raong praong, yaok thun, kaoh abih phun jien, saai Chúc mek tame hu meng 5-6 tỷ đồng. Dalam nan, taeng di labik raong di ban Cần Thơ saai mek tame hu labaih 1,5 tỷ đồng. Min saai Chúc hu panuac kakei mikva lac, anek dúi, don, thuk lac athur glai, nan ye mikva caong raong njauk likau adat kanja palei saong ba tabiak harak gar brei mboh cambaih asal njauk adat hukum di drei athur./.