Urak ini, kayua ikan bluan saong ikan ging dalam kraong hu takik nan ye dom ikan raong di mikva urang nong jeng hu urang blei salih mai blei abih. Piah pabak ka darak pasa saong cak rok patagok bruk ngak mbang di sang, rilo sang bhap bini daok di Đồng Tháp hu roh duah, palao raong hu 2 janih ikan ini dalam danao haluk.

Meng thun 2020 tal urak ini, ong Nguyễn Văn Châu daok di ấp 4, xã Phú Lợi, huyện Thanh Bình, tỉnh Đồng Tháp hu raong haong gauk ikan ging haong ikan bluan ku bhong, ba mai kein laba kinh tế biak glaong.

Tui ong Nguyễn Văn Châu, akaok thun ini, ong palao raong 200 kg ikan bluan ku bhong pajaih saong 10.000 drei ikan ging. Urak ini danao ikan daok dalam tukvak mek pablei. Tui kuhria mbang ini, ong mek hu 4 tấn ikan piah pablei. Dut saong thun dahlau, yaom 2 janih ikan ini thun ini glaong jang. Urak ini, urang blei salih mai blei ikan ging yaom 250.000 đồng/kg, ikan bluan yaom 500.000 đồng/kg. Kaoh abih phun jien buh tame, ong Châu daok laba hu labaih 500 triệu đồng.

Ong Châu brei thau, yaok thun, dua janih ikan ini tok raong sa mbang, dui atah dalam 10 bilan meng pablei hu. Tuk nan, ikan ging trak labaih mateh kg sa drei, ikan bluan meng 22 - 25 drei sa kg. dua janih ikan ini raong haong gauk biak lagaih, patak pataom hu jien blei pandap mbang.

Dua janih ikan ini, lac ikan ia taba, diuk saong praong siam di labik hu ia nduac. Yaom lac oh kan raong min tuk raong dua janih ikan ini dalam danao haluk, urang nong njauk caik hatai ngak brei labik raong nyu dreih yau di langiu kraong, ngak brei ia nduac gam gam saong danao ia hacih piah daong ka ikan khang kadang, samar praong jang. Kayua yau nan ye, urang raong njauk caik mac ngak brei ia nduac, bhian  salih ia dalam danao raong.

Daok pandap mbang ka ikan, mikva meda brei mbang dom janih pandap mbang kaya ikan hu đạm glaong atau eng drei sarau pandap mbang ikan meng dom janih ikan sit haong pandap mbang công nghiệp piah patak pataom phun jien.

Ong Nguyễn Thành Hợp, Akaok Kapul urang nong xã Phú Lợi brei thau, ong Châu lac urang nong sami samar, tarieng bac megru saong ngak hu bruk raong ikan ging pagam haong raong ikan bluan ku bhong dom thun ini mai. Ini lac bruk ngak bahrau di pak ini saong ba mai kein laba glaong. Tukvak anak tal, pak ini pachreih ba dom sang bhap bini khang hatai palao raong./.

Urang lang: Thu Thảo – 02/11