Raong ikan 7 sambo hu jien tame yaok rituh triệu đồng

Bruk main ikan cảnh hu tabiak meng tuk Lễ ngak di sa jabat kanja. Meng hatai takre bruk raong ikan, mboh mbuan pabam pajaih, darak pasa daok takik hu, saai raong iek dom gu ikan pajaih blei meng Thái Lan. Dom gu ikan camriep hu ba mai raong mboh biak siam lagaih, mebaoh tani tanat nan ye ngak ka sai khang hatai buh jien tame 50 triệu đồng blei rilo ikan. Min, meng tuk blei tame rilo, ikan nyu ruak kik, metai meneing. Yaok harei, Lễ caik meta maong tame danao ikan, tui iek cambaih dom salih karei piah thau jalan diukrai di ikan. Langiu di nan, saai duah tal rilo urang hu ilamo piah bac magru. Tukvak nan, ilamo raong pabam pajaih ikan cảnh biak bahrau.

Tui Lễ, ruak di ikan cảnh bhian biak samar, tuk mboh, tuk thau ye ruak njom mbak tabiak abih danao raong ikan. Mboh yau nan, saai parabha jeng yaok khay raong, yaok khay dom rituh drei piah samar mboh ruak saong patakik njauk ruak kik. Hadei di rilo mbang khat, Lễ meng mboh lac ia raong hu makna biak praong, langiu di bruk khik tani tanat chất lượng njauk plaih bruk salih ia samar drah, ngak sốc ka ikan.

Eng drei roh duah, urang likei kỹ sư công nghệ thông tin ramik ngak jalan pabak ia, tathuak ia tanyoh sit sit. Dom janih sinh vật sit mek ngak pandap mbang ka ikan, Lễ jeng eng drei raong paih caga dahlau pandap mbang. Puac thun 2018, labik raong ikan 7 sambo mau kayua Lễ padang ngak hu peih pablei dom drei pajaih camriep abih. Saai eng drei quay video, ba tagok dom kapul nyaom piah yaih khan, ieu blei. Jien mek tame meng bruk pablei ikan, urang likei 9X xoay vòng, blei dom gu ikan mekre, parolo janih pajaih. Ikan 7 sambo mau tui janih hu parabha jeng rilo yaom karei di gauk, hu drei yaom dom pluh ribau đồng min hu drei yaom tal dom triệu, atau dom piluh triệu đồng.

Piah hu rilo drei ikan mekre, saai neh dom gu gheih ba tabiak raong karei meng tuk daok sit, hu jalan sangka raong karei. Meng yaok piluh khay raong, Lễ tagok tal 400 khay, janih ikan 7 sambo mau jeng tagok labaih 10 janih. Labik raong lac sang tôn praong 250 m2, hu pah 2 urang tra piah samu jao pandap. Puac thun 2019, jien mek tame meng bruk pablei ikan tagok yaok bilan lac 100 triệu đồng, laba labaih 60 triệu đồng. Darak pasa praong abih di Lễ lac dom labik raong ikan cảnh, urang main saong dom cửa hàng. Sa urang daok di Indonesia hu maong mboh kadha vak ndem ka ikan cảnh di Lễ di mangaok web hu sua tangi piah blei. Biak tatuak drei min mboh laba glaong jang rilo mbang, saai duah kapul pajeng ba. Patuah lac ikan 7 sambo mau oh tavak dom adat ka bruk pasang iek min bruk khik iek ikan brei tani tanat, plaih caik ka ikan sốc, kurang.

Hadei di dom đơn hàng camriep saong panuac yaih khan di urang blei, saai hu pablei tapa Hàn Quốc, Mỹ, Malaysia... Dom taneh ia ka oh hu jalan par tapak, Lễ duah gah trung gian taduan pandap, peih niêm phong, salih ia, pandap mbang blaoh patui jalan nao veik. Saai brei thau lac: "taeng di Malaysia tukvak ba tapa lahik abih 1 adit, jien pajeng 8 USD sa drei". Urak ini, yaok bilan saai pablei tabiak labaih 1.000 gu ikan, jien mek tame labaih 50 triệu đồng, laba 20-30 triệu./.

Urang lang: Thu Thao – 04/05