Meng bruk cakrok khang gah raong glang, urak ini xã Hưng Điền, huyện Tân Hưng hu jaik 1.200 drei menuk, 17.000 drei ada nduac hamu, jaik 600 drei pabui, 180 drei pabe, abih di nyu nan lac xã hu jaik 1.800 drei kubao, limo raong palimek. Bruk raong kubao, limo palimek hu maong lac athur raong ba jien tame praong di xã.

Ong Hoàng Đình Minh, Akaok kapul urang ngak nong xã Hưng Điền brei thau, dom thun mai ini,  xã peih praong bruk raong kubao, limo palimek haong dom trang trại praong, raong tui ilamu công nghệ glaong. Urak ini xã hu 5 trang trại raong kubao, limo ralow, meyah raong abih công suất lac meng 100 – 150 drei sa trang trại. Limo hu blei mai meng Thái Lan. Rup limo hu bilau sambo màu mbong – patih, tuk bahrau blei mai nyu trak 250 - 300 kg sa drei. Hadei di 4 bilan raong, tuk pablei yaok drei trak meng 370 - 400 kg, drei praong trak jaik 500kg. yaom blei 1 drei limo pajaih meng 22 - 23 triệu đồng, tuk pablei veik yaom jaik 40 triệu đồng sa drei. Pandap mbang ka 1 drei lac 80.000 đồng sa harei.

Meng tuk hu trang trại raong kubao, limo, hu tamuh tabiak dom bhum pala tangei ngak pandap mbang ka limo. Urang raong limo hu mbaoh tangin pambuak bruk blei veik abih tangei di po bein pala tangei, meng phun, baoh tal hala. Hadei di tuk jaoh tangei, mikva brei chai pandih mesam saong srau haong pandap mbang thu ngak jeng pandap brei kubao, limo mbang.

Bilan Đông Xuân meng bloh, dalam xã Hưng Điền pala 45 ha tangei. Janih tangei ini takik hu halak halin ruak kik, năng suất hu meng 40 - 45 tấn sa ha, yaom pablei meng 800-900 đồng sa kg. Tangei meng tuk trun pajaih, buh khak tal tuk jaoh mek lac meng 75 - 80 harei, abih takik prein iek glang, rilo meng lac tui iek ka phun praong yau gauk, hu năng suất glaong. Anak tal, xã Hưng Điền kuhria peih praong bhum pala tangei rilo jang 100 ha.

Tui ong Nguyễn Thành Hưng, Bí thư Đảng ủy xã Hưng Điền, bruk raong kubao limo palimek daok lac jalan nao njauk, lagaih haong puk palei saong ba mai kein laba glaong ka mikva. Anak tal, xã daok brei peih praong jang rilo trang trại raong kubao, limo, abih di nyu lac patagok bruk raong praong, pandar ilamu công nghệ glaong, dui pachreih, ieu da-a dom doanh nghiệp, trang trại buh jien tabiak peih praong bruk raong, gam cakrok kinh tế sang, gam ba bruk ngak ka urang ngak dalam xã./.

Urang lang: M.Phuong