Kadha “Urang ngak hamu caong thau” harei ini, kol dahlak hulin likau khan bruk raong lanung oh gluh pandar pandap mbang meng haleik kong nghiep ba jien tame glaong di tỉnh Kiên Giang. Kadha vak di Dễm Trang, di mangaok báo Nông nghiệp Việt Nam, da-a mikva saong taong abih gauk tui pang:

Mboh lac lanung hamu hu yaom kinh tế saong dinh dưỡng glaong, hu darak pasar blei biak praong, tukvak tapa, rilo sang peih bruk raong lanung ba mai kein laba glaong. Maong rah tapa, bruk raong lanung lac lagaih di labik oh cang hu taneh praong, lanung raong hu iek glang njauk ilamu kỹ thuật, samar praong siam, takik metai, pablei hu yaom glaong. Min dahlau daih, kayua urang raong oh ka pandar bruk raong oh gluh, pandar pajaih meng kraong ribaong, pandar pandap mbang that, matah ka lanung mbang ba tal lanung metai rilo, nerak tachauk alam môi trường, rilo khat lahik.

Thun 2022, Jabat ngak nong saong patagok palei pala huyện Vĩnh Thuận hu pambuak bruk haong karja palei peih bruk raong lanung oh gluh pandar pandap mbang kong nghiep di 3 labik haong 3 baoh sang di xã Bình Minh saong ban sit Vĩnh Thuận, yaok labik praong 12m2.

Tukvak palao pajaih harei 01/6/2022, raong 2.000 drei dalam 12m2 sa labik, raong dalam 12 bilan. Danao raong hu ngak glaong 0,8m, mbat saong daning gah dalam danao hu tauk gạch men glaong 40cm. Ia ba tame danao dalam 0,3m, hu độ pH, nhiệt độ, oxy lagaih.

Dalam tuk raong, mikva bhian pasang iek danao saong ngak hacih sa-at danao raong 2 harei sa mbang. Lanung dalam 1 bilan camereip brei mbang haleik kong nghiep hu độ đạm 40%, praong 0,5mm pambuak haong 10% laneng, meng bilan ka 2 brei mbang pandap mbang kong nghiep hu độ đạm 35%. Bhian pasang iek rami ramik pandap mbang lagaih haong teik trak di lanung raong, harei brei mbang 2 mbang pandap samu 3% teik trak di lanung.

Dalam adit camereip palao lanung pajaih, mikva hu pabak vitamin C tame pandap mbang gam gam piah tagok prein pacang ruak ka lanung (lac 3g dalam sa kg pandap mbang). Taong kẻng tuk brei ka lanung mbang piah ngak jeng bhian randap ka lanung mbang pataom gauk veik di sa labik piah mbuan tui iek prein yava yaok harei di lanung. Tui iek tuk brei ka lanung mbang piah rami ramik veik pandap mbang yaok harei, tagok atau trun tui langik tasik, tui prein yava di lanung piah ramik veik pandap mbang ka nyu lagaih, meyah labaih pandap mbang ye mbuan njauk nerak tachauk, kurang pandap mbang lanung suai praong.

Dalam tuk raong tal bilan ka 2, ia dalam danao hu pandap mbang labaih saong chất thải di lanung ngak brei mambeik ia saong sambo ia salih karei, njauk salih ia dalam danao raong.

Hadei di tuk raong iek 2 bilan di 3 sang ye mboh lanung diuk hu 87,5%, taong abih lanung di dom sang raong jeng diuk hu samu saong tapa tanut ba tabiak kayua dalam tuk iek glang, urang jakar kỹ thuật saong sang raong tuk halei jeng tui iek kajap bruk praong tagok di lanung, samar langyah tuk lanung mboh yau khin ruak nan ye lanung takik metai. Lanung raong hu di 3 sang hu labaih 323kg, rilo jang tanut ba tabiak. Kein laba kuhria rah tapa di 3 sang lac jaik 8 triệu đồng yaok sang.

Bruk raong lanung oh gluh ini lagaih haong jalan patagok di puk palei, daong ka urang ngak nong pandar hu mbaok taneh dalam bein, var raong pabui klak piah raong lanung, lagaih haong sang urang ngak nong raong di mbaok taneh sit./.