Meng 1.000m2 mbaok haluk ngak var ro mala halui phun amriak kalu, mek dhar phun amriak kalu pak di bein amriak kalu praong 2ha ngak pandap mbang ka pabe, yaok harei sang sa-ai Nguyễn Văn Định daok di ấp Phú Sơn, xã Hòa Hiệp, huyện Xuyên Mộc, tỉnh Bà Rịa - Vũng Tàu ba tabiak pablei labaih 500 drei pabe, laba hu mangaok mala sa tỷ đồng. Kadha “urang ngak hamu caong thau” harei ini, da-a mikva saong taong abih gauk duah thau bruk ini tapa kadha vak di Hoàng Trọng mangaok Báo Nông nghiệp Việt Nam:

Sa-ai Định khan lac, praong tagok di bhum palei Hà Tĩnh, thun 2004, saai tui sa urang krein randap tame Meraong duah jalan ngak mbang, salih bahrau raidiuk. Di ấp Phú Sơn, xã Hòa Hiệp, huyện Xuyên Mộc (tỉnh Bà Rịa-Vũng Tàu), sa-ai pah sa sào taneh pala drak, raong glang. Tuk thau lac tỉnh Ninh Thuận hu bruk raong pabe cakrok patagok, sa-ai nao ravang iek, bac megru jalan iek glang, kakei blei drei pajaih mai raong. Meng dom pluh drei, tal thun 2016, tapon pabe di sa-ai hu tagok tal sa ratuh, hu gam pabe ralow saong pabe pajaih. Hu phun jien patak pataom, sa-ai Định buh tabiak blei taneh pala amriak kalu, pambuak haong pandar dhar kayau (lac got amriak kalu diuk) piah ngak pandap mbang ka pabe.

Thau lac bruk raong pabe cakrok khang kajap, pabe ralow saong pabe pajaih hu darak pasar blei khang, yaom kaom tani tanat, sa-ai salih bruk raong, meng raong ka sang salih tapa raong piah pablei. Tal urak ini, tapon pabe di sang sa-ai hu jaik 500 drei. Hu tuk tagok tal 700 drei hu raong kreik di labik taneh praong 1.000m2 var ro. Yaok thun sang sa-ai laba hu jaik 1 tỷ đồng.

Sa-ai Định brei thau lac raong pabe biak mbuan. Var ro ka pabe meda ngak meng kreim atau kayau, gar 1 mét 8, atah 2 mét meteh; ngak glaong jang mbaok haluk meng 5 tấc tal 8 tấc. Var ro hu ngak brei ka pabe ndih tapui, pabe raong anek saong pabe palimek.  Var ro ngak di labik glaong, thu, hacih, oh njauk pandiak saong oh pasah. Nền var ro tapak, jangaih piah mbuan puh ramik. Khak pabe hu pataom mek caik dalam mbao pa-auk haong bimao Trichoderma ngak khak buh ka phun amriak kalu.

Hadei di rilo thun raong pabe, sa-ai Định mboh lac sa kadha praong dahlau di abih lac brei hu drei pajaih siam. Kayua yau nan ye bo labik di sa-ai tok raong pajaih pabe lai di pabe Boer tano hu asal meng Mỹ haong pabe binai Bách Thảo di Việt Nam, hu prein praong samar, drah ndih tapui, ralow siam, hu darak pasar takre blei. Pandap mbang ka pabe rilo meng lac hala kayau got diuk di phun amriak kalu di bein, hu cakak sit. Daok bilan thu, sa-ai pala pabak cỏ dứa. Pandap mbang ka pabe brei pabak dom janih pandap mbang hu tapung yau kam brah, tapung ikan, chế phẩm sinh học…., lavik lavik brei pabak vitamin piah pabe ginup dinh dưỡng, prein yava siam.

Tui amuk Nguyễn Thị Kim Thủy, Phaok akaok kapul urang ngak nong xã Hòa Hiệp, bruk raong pabe pambuak haong pala amriak kalu meng got diuk di sa-ai Định ba mai kein laba mboh cambaih di anak meta. Phun amriak kalu tamuh siam, takik ruak kik halak halin. Hala, dhar di got amriak kalu hu cakak brei pabe mbang, gam daong ka bein amriak kalu laneing lanai. Khak pabe, chất thải dalam raong pabe hu pa-auk ngak khak hữu cơ, buh veik ka phun amriak kalu. Ini lac jalan ngak hadah krah, bruk ngak nong tuần hoàn, siam ka alam langik tasik, phun jien biar, khang kajap, hu laba glaong./.