Ong Nguyễn Hoàng Tuấn, daok di palei  Nhơn Thọ 1A, xã Nhơn Ái, huyện Phong Ðiền, ban Cần Thơ lac kareih camin urang nong ngak mbang naih joi haong bruk raong pabe binai saong pabe ralow. Meng tari tarieng bac megru saong pandar dom ilamu tame raong, urak ini baoh sang ong Tuấn duah jien tame 100 trieu dong sa thun. Ong Tuấn pandar 250 m² taneh bein daok saohsaong 60 trieu dong ngak var raong pabe. Thun 2018, var ro raong pabe do ong tok hu 7 drei pabe tano saong binai, dalam nan hu 4 drei kayua Pasak pachreih nong Ban Cần Thơ daong brei. Hadei di tuk brei pabe menek, mbiah tal ini, taphon pabe di sang ong Tuấn hu jaik 50 drei praong sit. Tui ong Tuấn, pabe mbuan raong, praong drah, tok mbang dom janih hareik, hala panat, pa-ok, baoh panat meda, njam puan dalam bein nan ye oh abih jien blei pandap mbang.

Ong Phạm Văn Cơ, daok di xã Nhơn Ái, huyện Phong Ðiền hu 2 ha bein pala durian saong makhut, gam raong 10 drei pabe rilo saong pabe menek. Ong Cơ brei thau: Ramik tukvak ngak bein di sang gam raong pabe hu jien tame ralo. Langiu di nan, khak pabe hu buh tame ka phun mbang baoh dalam bein nan ye patak pataom hu jien padai biak rilo.

Piah daong ka gauk dalam bruk raong glang saong mbuan lagaih dalam bruk pambuak haong dom labik blei, tukvak tapa, urang raong pabe di xã Nhơn Aí hu pambuak gauk padang kalup kapol raong pabe. Kalup kapol nan pachreih hu 20 baoh sang raong pabe ngan haong jaik 200 drei. Dom pajaih pabe hu mikva raong yau: Bách Thảo, Boer, Hà Lan.  Ini lac dom pajaih pabe blei tame mai meng negar langiu, ralow rilo, urang takre blei saong pablei hu yaom.   

Tui dom baoh sang urang raong pabe, pabe anek meng tuk padeih mam maik trak hu meng 13 tal 15 kilo sa drei, raong labaih 6 bilan meda trak meng 25 tal 30 kilo. Yaom pablei meng 100 tal 150.000 sa kilo. Ta-eng pabe binai labaih 2 bilan meteh pablei hu labaih 3 trieu đồng sa drei.

Tui ong Trần Thái Bảo, Phaok Akok Kapol urang ngak nong xã Nhơn Ái, xã daok pambuak bruk saong dom pakat kapul urang nong saong gah ngak nong Ban Cần Thơ patagok bruk pato pasram ilamu ky thuat, tacei pato urang ngak nong palih ruah jalan raong lagaih. Gam haong nan padang hu Dhar kapul Urang ngak nong raong pabe Nhơn Ái pambuak haong brein phun mbang baoh hu 60 baoh sang hu mbaok tame. Tapa nan hu ba mbuan lagaih ka mikva hu mesre phun jien yaom laba lap piah cak rok patagok bruk raong glang gam haong bruk ngak bein duah jien tame./.

Urang lang: Ai Nghiem - 14/9/2022