Bein nho di saai hu rilo menuac urang mai rivang main 

Tapa mbáo, tapa rayo song mạng xã hội, saai Nguyễn Ngọc Thuần mboh dom tỉnh di miền Tây pala hu nho, min, rilo meng lac pajaih nho meng kan. Lac urang takre bac megru, takre boh kayau, saai blei 2 phun nho pajaih janih oh hu asar ( pajaih nho Hạ đen) meng Hà Nội mai pala iek di mangaok sân thượng.

Tal tuk praong, 2 phun nho hu baoh biak rilo jang hatai cong khin ngan song   20 chùm bak boh. Mboh lac meyah iek glang njauk ilamu, ye phun nyu tamuh siam song hu baoh biak rilo, saai Thuần khang hatai buh jien tabiak blei  240 gha nho mai pala di taneh praong labaih 1.000m2 di drei.

Kayua lac, pajaih blei meng Đài Loan, nyu karei jang dut song nho meng kan, nan ye, piah phun nho lagaih haong labik  hu hajan rilo di  miền Tây, saai Thuần brei me-om bein di drei meng blah cao su piah khik caga phun song plaih di halak halin. Dalam tuk pala, sa-ai pandar rilo khak hữu cơ, pandar biak takik jru khik caga phun pala . Ilamu pala jeng hu saai ngak njauk tui yaok tuk vak tamuh praong di phun. Phun jien buh tame ka bein lac labaih 150 triệu đồng.

Saai Thuần daok brei thau lac: “Yaom lac miền Tây hajan rilo, phun kan lagaih hu, min pabak veik, taneh di pak ni nyu biak siam. Prong di abih lac brei thau ka phun nyu yau habar, ngak njauk ilamu kỹ thuật song njauk tuk vak ye phun meng hu rilo baoh”.

Urak ni, hadei di labaih sa thun iek glang, bein di saai Thuần nyu tabiak boh biak rilo, năng suất tagok tui tuk vak, phun dak prong dak hu rilo baoh. Sa thun paik baoh hu 2 mbang song paik gam gam dalam labaih  10 thun. Vụ paik baoh camereip, tok paik hu 300kg, min nyu tagok biak rilo dalam dom vụ hadei. Yaok kg nho saai Thuần pablei yaom 150.000 đồng, phun pajaih lac 100.000 đồng sa phun.

Langiu di bruk paik nho piah pablei, saai  Thuần dok peih pabah mbang bein piah taduan raok tuai mai rivang iek. Dom baoh nho paik mbang camereip hu tuai blei abih  piah ngak pandap alin. Min saai Thuần jeng caik veik ka mbang hadei, saong caik ka dom mbang tuai hadei hu nho piah thaot, ngak ka tuai mboh oh damen pren yava tuk mai tal ini.

Saai Nguyễn Thị Cẩm Giang (umo 32 thun, dok di Trà Vinh)  mai rivang main song brei thau: “Nho biak bingi, pahe, yamen, kanduk kapan song racam, mbang mboh biak karei jang dom janih nho drei bhian mbang ”.Bruk hu rilo tuai mai ravang iek, lac prein pachreih ba piah tuk vak anak tal,  saai  Thuần peih prong taneh pala, gam haong pambuak bruk du lịch piah tuai damuai mai main sambai, padeih padei./.

Urang lang: Hanipha- 25/5