Sa-ai Đặng Hữu Nghĩa menek tabiak saong prong tagok dalam sa baoh sang ngak nong di tỉnh Tây Ninh. Thun 2012, sa-ai bac tamat Đại học Nông Lâm TP.HCM, blaoh ngak roh duah di sa pasak roh duah saong cak rok patagok bruk ngak nong công nghệ glaong di ban raya. Meng ilamu ka bruk ngak nong kong nghệ glaong, thun 2018, sa-ai mai veik palei, mek mblang bein dalam sang daok di xã Trà Vong (huyện Tân Biên) piah pala dưa lưới kong nghệ glaong.

Hadei di rilo mbang gam ngak, gam bac megru ilamu, dom baoh dưa lưới akaok mereip di sa-ai Nghĩa jeng hu ba tabiak pablei. Sa-ai Nghĩa brei thau, salih ka bruk padang ngak sang màng blaoh pala angaok giá thể xơ la-u yau dom urang nong karei daok ngak, sa-ai pala dưa lưới tapak angaok taneh. Sa-ai Nghĩa langyah, pala dưa lưới angaok taneh oh lac abih takik phun jien buh tabiak ngak, yau aia pruh, patrun khak buh, bo daok hu baoh racam saong yamen jang dut haong pala angaok giá thể.

Hadei di dua vụ pala dưa lưới angaok mbaok taneh, taneh hu metham bạt nilon piah ngak pasiam. Bruk pasiam taneh jeng abih rilo pren yava. Hadei di tuk metham bạt nilon piah patakik hareik saong halak halin ngak khut phun dưa lưới, sa-ai Nghĩa daok pandar dom chế phẩm vi sinh piah pametai anek ruak dalam taneh saong pabak khak van ro ủ hoai saong khak trùn quế ka taneh. Sa-ai Nghĩa brei thau, taneh pala dưa lưới hadei di tuk ngak pasiam blaoh ba tame pandar njauk hacih janih ruak, hu rilo dinh dưỡng, pacoh, mbuan tathuak aia…

Tui sa-ai Nghĩa, kadha prong di abih tuk pala dưa lưới nan lac tuk phun anek tal vaktu brei baoh (jaik 25 harei). Dalam tukvak ini, dưa lưới bhian njauk bọ trĩ, bọ phấn mbong mai palai kaik. Tuk phun raak tabiak (23-25 harei), sa-ai Nghĩa palao danko tame mblang taneh pala piah daong ka bingu thụ phấn glaong jang, ndam baoh rilo jang. Tuk dưa lưới ndam baoh, meng ba sruh dangko tabiak langiu.

Urak ini, sa-ai Nghĩa hu padang angan dưa lưới Fagri saong ba dưa lưới OCOP 3 patuk ka baoh dưa lưới di drei.

Langiu di bruk pala dưa lưới, sa-ai Nghĩa hu pambuak bruk haong dom sang dalam saong langiu tỉnh Tây Ninh pala dưa lưới. Yaok adit, dom baoh sang pala dưa lưới salih gauk trun pajaih atau paik baoh pabak brei ka hệ thống parabha jaik 70 tấn baoh sa bilan tui harak pambuak bruk.  

Kapul urang nong xã Trà Vong taong yaom, bruk pala dưa lưới angaok mblang taneh di sa-ai Nghĩa lac bruk ngak mbang biak hu kein laba. Yaok thun, sa-ai Nghĩa hu jien mek tame jaik 2 tỷ đồng. Langiu di nan, sa-ai Nghĩa daok ba bruk ngak ka rilo urang ngak./.