Hadei di tuk bac tamat đại học, yaom lac hu bruk ngak haong jien bilan labaih pluh trieu dong yaok bilan min meng takre ngak kaya meda meng bruk ngak nong, sa-ai Nguyễn Công Vinh likau padeih bruk mai pablei padang labik raong laneng.

Sa-ai Vinh brei thau, bruk raong laneng jeng biak mbuan. Akok meti lac brei thau padang var ro. Var ro brei padang ngak glong meng 4 tal 6 cm, ala tuh cuah 5cm, di ala cuah hu tauk halam. Piah raong laneng sa-ai Vinh palih dom baoh kayau khut, tabaram ba tame ngak tui cong nghe lignin piah mek đạm thực vật ngak pandap mbang ka laneng. Gam haong nan, brei pandar pabak men vi sinh blei meng negar Israel  gam haong saradang tabau pa-uak labaih 3 adit ka laneng mbang. Labik raong di sa-ai Vinh bhian pandar khak limo piah ngak pandap mbang ka laneng.

Khak laneng meda hu pandar yau sa asar di taneh pabam, bein pabam atau khak hữu cơ pabak dinh dưỡng ka phun pala saong pasiam taneh. Khak laneng meda ngak brei patagok bruk pacah meta di asar, daong ka phun anek praong samar saong diuk hu rilo.  Khak laneng daok hu pandar piah ngak pasiam taneh, daong ka taneh tuk halei jeng siam pachoh.   

Urak ini, ralow laneng pablei ka dom labik raong hadang, arieng, lanung, ikan, ba ba…saong dom c.ty blei ngak pandap mbang ka athur. Ta-eng khak laneng hu pablei ka dom bein pala phun tui cong nghe glong dalam sang camin  dalam dom tỉnh, ban dalam negar. Kayua bruk pandar laneng dak harei dak glong, nan ye yaok bilan, labik raong  di sa-ai Vinh  pablei labaih 500 tấn khak laneng saong yaom 3 triệu meteh tal 5 trieu đồng  sa tấn, albaih 15 tấn laneng ralow yaom meng 50.000 - 60.000 đồng sa kilo. Meng nan, jien mek tame  yaok bilan hu labaih 4 tỷ đồng.   

Bruk ngak kaya meda di sa-ai Vinh oh khik ka ta-eng drei, tukvak tapa, yaok ribau dam dara, ralo meng lac sinh viên takre padang mbang ngui meng bruk raong glang di rilo labik hu mai tal labik di sa-ai Vinh piah rivang iek, bac megru. Kapol urang ngak nong xã Thân Cửu Nghĩa jeng hu peih bruk brei ka urang dalam kapul mai ravang iek, bac megru bruk ngak ini piah patagok bruk ngak mbang ka baoh sang di drei. Sa-a Vinh ndom lac, tuk halei jeng halan hatian klak rabha ilamu raong laneng ka urang. Langiu di nan, sa-ai daok hu pambuak bruk saong labaih 200 baoh sang urang nong raong laneng di dom tỉnh, ban gah Pei negar, saong brei peih chi nhánh praong piah patagok bruk ngak ini./.

Urang lang: Ai Nghiem – 01/06/2022