Kadha “Urang ngak hamu caong thau” adit ini, kol halak hulin likau khan bruk raong arieng tasik ba mai kein laba di Trà Vinh. Kadha vak di Phương Nghi angaok báo Bangsa & Patagok.

Rilo thun ini mai, mikva daok di dom huyện tapen tasik Châu Thành, Duyên Hải, Cầu Ngang, ban sit Duyên Hải pilih ruah arieng tasik piah raong tui rilo jalan, yau ye raong quảng canh, raong haong hadang sú, haong ikan, raong dalam labik glai dauk ia mbak, năng suất hu meng 800 tal 1 rabau 200 kg arieng sa ha sa vụ.

Tui yaok pataom di gah ngak nong tỉnh Trà Vinh, meng akaok thun tal ini, Trà Vinh hu labaih 32.000 sang raong hadang, arieng haong gauk di mangaok mbaok taneh praong 23.000ha, dalam nan hu labaih 11.420 sang raong arieng tasik quảng canh di mbaok taneh praong labaih 7.000ha. Meng yaom arieng glaong, nan ye urang nong laba hu meng 100 - 150 triệu đồng sa ha sa thun.

Urak ini, kayua anek pajaih dalam tasik daok takik, nan ye piah hu ginup pajiah piah raong, rilo sang raong arieng di Trà Vinh pilih ruah pajaih menuac raong. Dom drei pajaih bhian hu pabak mai meng tỉnh Bạc Liêu saong Cà Mau. Meda lac, kein laba di bruk raong arieng tasik ba mai ka dom sang bhum dauk ia mbak tapen tasik di Trà Vinh lac biak glaong, kuhria rah tapa lac 1.000 drei arieng pajaih palao raong, hadei di 4 - 5 bilan raong meda mek jien tame hu meng 13 - 15 triệu đồng. Dalam tuk nan, jien buh tame raong arieng oh rilo, dalam nan rilo meng lac jien blei arieng pajaih.

Tukvak tapa, bruk raong arieng quảng canh hu daong ka rilo urang ngak nong di dom huyện tapen tasik Trà Vinh yam tagok ngak kaya meda. Ong Huỳnh Văn Sáng daok di ấp Hồ Tàu, xã Đông Hải, huyện Duyên Hải brei thau: kayua caga hu arieng pajaih menuac raong, nan ye dom arieng raong diuk suai jang arieng pajaih di tasik. Bruk raong arieng haong dom janih kaya ikan karei phun jien jeng biar, takik khat lahik dalam tuk raong, tok brei mbang pabak pandap mbang meng parương, ikan sit sot… tuk jaik mek pablei nan ye labik raong oh njaom nerak tachauk, arieng, hadang takik metai. Abih di nyu lac yaom arieng di mangaok darak pasar tuk halei jeng tani tanat.

Bruk raong hadang haong arieng dalam glai dauk ia mbak gam khik kajap jien mek tame saong cakrok khang kajap, gam nao gam haong bruk khik caga môi trường sinh thái, hadang raong palao lipih, praong samar, hacih ruak, oh hu rilo kháng sinh, di mangaok mbaok ia praong 2 ha, ong Sáng raong 100.000 drei hadang sú pajaih haong 30 - 40 kg arieng pajaih (3 - 4 mbang sa thun). Meng jalan raong ini, yaok bilan sang ong jeng hu jien mek tame rilo meng hadang - arieng, hadei di kaoh abih phun jien buh tame raong, daok laba hu meng 150 - 200 triệu đồng sa thun.

Daok ong Trần Văn Út, ấp 4, xã Mỹ Long Nam, huyện Cầu Ngang ngak kaya meda haong bruk raong pablak arieng tasik, hadang sú meng thun 2018. Tal urak ini, meng bruk raong ini, yaok thun ong Út hu laba labaih 100 triệu đồng. Ong Út khan lac: “Piah ka arieng raong hu gạch pablei hu yaom glaong, dalam tukvak arieng raong hu labaih 4 bilan, cap mek arieng tano, pilih ruah arieng binai pajaih buh tame lồng raong. Piah ka arieng gạch praong samu gauk, njauk pilih ruah arieng pajaih samu gauk gah chấm gạch, hadei di nan brei arieng mbang pabak rilo pandap mbang dinh dưỡng, abih di nyu lac ba khía arieng meda tagok bak gạch.

Piah ka bruk raong arieng tasik cakrok khang kajap, urang nong raong arieng khik hu kein laba, tỉnh Trà Vinh bahrau hu harak brei buh tabiak labaih 600 triệu đồng jao ka Sở Khoa học saong Công nghệ tỉnh peih ngak bruk tut angan bảo hộ khik ramik saong yaih khan nhãn hiệu chứng nhận ka arieng tasik Trà Vinh. Tapa nan, paglaong chất lượng pandap, pabak hatai caong di darak pasar, rik daong jhul tagok bruk raong saong pablei arieng tasik Trà Vinh, ba bruk ngak saong paglaong jien mek tame ka rahra bhum tapen tasik./.