Kadha “Urang ngak hamu caong thau” harei ini, kol dahlak hulin likau khan bruk pala kruac aik oh hu asar di Trà Vinh tapa kadha vak di Hồ Thảo angaok báo Nông nghiệp Viet Nam.

Ong Phan Đức Tài, Yam ndok HTX pala kruac aik oh hu asar Thành Trí di huyện Càng Long tỉnh Trà Vinh lac menuac ba akaok nao dahlau dalam bruk pala kruac aik oh hu asar. Ong roh duah biak tani tanat ka kruac aik oh hu asar saong duah hu jalan pablei tapa châu Âu. Tapa bruk pala – ngak njauk tui dom tanut chuẩn dunya, HTX pala kruac aik oh hu asar Thành Trí hu padang talei pambuak bruk di dom urang ngak nong haong dom doanh nghiệp pablei tapa negar langiu. HTX hu mbaoh tangin pambuak bruk pablei tapa negar langiu kruac aik oh hu asar haong sa Cty di Hà Lan, yaok thun 100 tấn.

HTX pala kruac aik oh hu asar Thành Trí hu pandar tanut chuẩn GlobalGAP saong dom urang nong tame HTX hu daong yaom tuk blei khak saong jru halak, oh tapa trung gian. Urak ini mikva daok hu mbang tui yaom meng 10 rabau đồng tagok ka yaok kg kruac aik.

Ong Phan Đức Tài khan lac: “Kruac aik oh hu asar hu kanduh lapih, ia takik mesam jang saong oh phik. Kruac aik oh hu asar hu pandar piah lai ia menyum mbau pahe saong trun pandiak, trun mahu ia, nan ye darak pasar biak takre. Piah paglaong kein laba bruk pablei salih, HTX daok hu jalan peih praong bruk ngak mbang kinh tế meng pambuak haong bruk ngak bein, danao, var ro. Taphia nan, pambuak bruk haong dom doanh nghiệp praong piah peih praong bruk pala đậu bắp haong lahong, piah hu jien mek tame rilo jang ka dom urang dalam HTX”.

Mboh lac pala kruac aik oh hu asar ba mai kein laba glaong, rilo mikva urang nong di xã Huyền Hội ba gauk pala iek. Rilo sang khang hatai salih meng pala la-u tapa pala phun kruac aik oh hu asar. Urak ini, dom sang pala kruac aik di HTX Thành Trí tagok tal 100 baoh.

Pagap yau sang ong Nguyễn Văn Danh daok di ấp Sóc, urang hu blei pajaih meng HTX Thành Trí saong pala di taneh sang praong 4.000m2. Ong Danh khan lac: Phun kruac aik oh hu asar tok iek glang njauk jalan ye 17 bilan nyu tabiak baoh, ilamu pala jeng mbuan jang duk haong janih phun karei. Yaom pablei tani tanat meng 20 - 30 rabau đồng/kg, tuk lap yaom jeng hu meng 15 - 20 rabau đồng/kg. Dua adit, meda paik hu sa mbang saong jien mek tame yaok thun di ong Danh hu 400 triệu đồng meng 4 công taneh pala kruac aik. Pala kruac aik tok kan di labik paik baoh, brei pah urang paik baoh haong yaom 200 rabau đồng sa urang sa harei.

Jak jeng di bruk pala phun kruac aik oh hu asar di xã Huyền Hội, huyện Càng Long lac sa bruk brei mboh ka hatai sahneng duah saong pambak tame jalan lagaih di urang ngak nong Việt Nam. Tapa bruk pambuak gauk, ngak njauk tanut chuẩn dunya saong peih praong darak pasar pablei tapa negar langiu, mikva mek hu jak jeng saong ba mai kein laba kinh tế ka bhap bini.

Urak ini bruk jak jeng di pala kruac aik oh hu asar oh lac ba jien tame glaong ka rilo sang, bo daok daong paglaong  raidiuk di bhap bini. Mikva urang ngak nong dalam bhum brei mboh bruk palgaih haong salih karei saong pambak tame dom siam lagaih bahrau piah pasiam raidiuk di drei. Tapa bruk pablei praong tapa châu Âu, kruac aik oh hu asar Trà Vinh brei mboh hu chất lượng saong angan je angaok darak pasar dunya./.