Dalam kadha urang ngak hamu caong thau harei ini, kol dahlak hulin likau yaih khan bruk raong ula ini biak jak jeng di urang nong daok di huyện Cái Lậy, tỉnh Tiền Giang. Bruk ngak ini hu yaih khan tapa kadha vak di urang vak Nguyễn Trinh hu ba tagok mbao Cần Thơ.

Saai Trần Thanh Long umo 55 thun, daok di xã Mỹ Thành Nam, huyện Cai Lậy, tỉnh Tiền Giang dalam sa mbang caik dớn mek hu 3 drei ula ri voi anek blaoh ba mai sang raong iek. Oh saneng lac, meng nan janih athur bò sát ini lac pambuak haong saai tal urak ini, yaok bilan ba jien mek tame tani tanat. Urak ini, saai hu labaih 10 drei ula ri voi tano, binai saong brei jien mek tame jaik 100 triệu đồng sa thun kayua pablei anek ula pajaih. Thun 2019, dalam sa mbang saai caik dớn njauk 3 drei ula ri voi anek. Mboh janih ula ini salut mbut, siam nan ye saai Long caik raong dalam pakaong. Hadei di sa tukvak raong, yaom lac takik sangka iek glang min ula jeng caih baoh, praong tagok siam, meda lac manek dom drei ula sit, yaom lac hu raong dalam pakaong sit.

Hadei di tuk duah thau ka darak pasa, mboh drei ula ri voi lac athur angan je, hu yaom glaong di mangaok darak pasa, tuk halei jeng daok di tanut glaong, dalam tuk nan janih ula ini di langik tasik oh daok rilo. Meng nan, blei veik drei pajaih meng var raong angan je mai raong, caih baoh, pandar var raong pabui klaak ngak pasiam veik piah raong ula. Min, hadei di tukvak raong hu jak jeng tal 300 drei ula tano, binai, ula di saai matai biak rilo tuk sa mbang salih ia, kayua oh thau lac ia di mangaok ribaong njauk tachrauk nerak nan ye njuk ia tame labik raong ngak ka ula matai biak rilo. Hadei di nan, saai duah tal Pasak pachreih nong bac magru ilamo raong saong pasiam veik tapon ula tal urak ini. 

Saai Long brei thau lac, bruk hu makna praong lac labik raong ula ri voi brei lanieng lanoi, hacih saat, salih gam gam. H yau nan, ula meng praong tagok samar saong takik njom ruak kik. Sa bruk ngak hu makna praong veik lac yaok bể xi măng raong ula njauk caik paok talei ni lông piah daong ka ula hu labik daok kandauk. Pandap mbang takre di ula lac ikan kan. Tui drei ula praong, sit meda palao ikan praong sit ka nyu lagaih. Ikan kan dahlau di tuk palao tame labik raong ula ye njauk brei mbang pandap mbang cong nghiep piah tuk ula mbang ikan jeng njam tame hu dom pandap mbang công nghiệp, daong ka ula praong samar.

Yaok labik raong ula ri voi atah labaih 2m saong praong 1m, palao raong hu labaih 300 drei ula ri voi tano, binai. Bruk palao ula lac 10 drei ula binai, 3 drei ula tano. Ula raong dalam labik sit nyu takik nao mai, mbuan mbang pandap mbang. Mbang ginup nan ye praong samar jang raong dalam labik praong. Ula ri voi biak mbuan raong, takik buh prein tame sangka. Hadei di 2 thun raong meda caih baoh. Ula ri voi caih baoh meng bilan 4-6 saka ia bilan yaok thun, tui kuhria yaok mbang meng 10-30 drei. Ngan haong ula binai ye trak  labaih 2kg meda caih hu 40 drei sa mbang.

Urak ini saai Long hu labaih 100 drei ula binai, tano, yaok drei trak meng 2-4 kg. Yaok thun,  manek hu jaik sa rabau drei ula anek. Ula pajaih hu ong pablei yaom meng 70.000-200.000 đồng sa drei tui yaok drei praong sit. Bruk raong ula dalam labik xi măng di saai Long gam mbuan ngak, patak pataom hu labik raong, mek prein ngak laba, ba mai kein lagaih kinh te glaong, nan ye hu urang nong dalam bhum bac megru, ngak tui./.