Urang nong pala bimao bao ngu tui cong nghe glong 

Bimao bào ngư lac janih pandap mbang siam ka prein yava, mbuan pala, samar kaoh mek hu. Meng dom siam lagaih nan, muk Góp pala iek, hadei di nan mboh mek hu năng suất glong, rilo tuai damuai takre, muk salih tapa pala bimao. Tapa 5 thun pala ngak, urak ni, muk  Góp hu 2 trại bimao  prong labaih  120m2, song 10.000 phôi bimao, hu mek pablei yaok harei.

Tui muk Góp, bimao bào ngư mbuan si iek glang, kaoh mek hu rilo mbang, phun jien buh tame tuk camereip oh glong. Min, urang pala bimao  brei thau ilamu   kỹ thuật ye bimao meng hu năng suất. Tal urak ni muk jeng dok bac megru, paglong ilamu  kỹ thuật piah paglaong năng suất saong chất lượng bimao.

Muk Góp brei thau: Sang pala bimao brei lanieng lanoi, pandiak lagaih song khik hu độ ẩm siam. Gheng tual kadung brei kajap piah khik hu dom kadung phôi. Nền sang brei khik pasah, min brei pruh cuh, piah tẩy trùng.

Phôi bimao hadei di tuk ba mai caik ka nyu tagok meo labaih 2 bilan, peih samlei tabiak, bloh gum tuk veik labaih 10 harei, hadei di nan peih tuk tabiak. Urang pala brei pruh ia, piah bimao mbuan tamuh (pruh meng 1-2 mbang dalam sa harei). Tabung sang pala bimao brei tauk hala, piah mek lahơi ka phun bimao. Sa dalam dom bruk prong ngan song bimao lac độ ẩm, brei daok di tanut 80%.

Tuk mboh taom dar canuk klaok hu rak sit ye taok canuk, 6 harei hadei, bimao tamuh tabiak, iek nyu prong atau sit bo kaoh mek. Bimao bào ngư meng tuk pala tal tuk kaoh mek lac 85 harei. Kaoh bimao bloh rao canuk phôi hacih sa-at, bloh gum tuk  phôi veik, pruh ia, tui iek phôi bimao. 15 harei hadei kaoh mek mbang patui di nan  . Bimao hu kaoh mek di tuk melam song saboh avar, piah khik ka nyu that bingi, pablei hu yaom glong. Urak ni, muk Góp dok pandar jalan phun sương tự động , piah khik siam ia pruh song tuk vak ka nyu lagaih.

Bimao bào ngư oh kan pala, min mbuan njauk ruak  mốc xanh, nấm hồng song côn trùng. Kayua yau nan ye, hadei di yaok mbang kaoh bimao brei pruh cur  pametai anek ruak, rao song cambu thu. Tuk vak kaoh bimao bào ngư dui atah  4 bilan, song 8 -10 mbang kaoh. Urak ni, di darak pasa kaya nong song labik đô thị pasak praong, bimao  bào ngư pablei rai yaom meng  55.000-60.000 đồng/sa kg; urang pablei salih mai blei di sang  yaom meng  40.000-50.000 đồng/sa kg. Piah khik hu ginup bimao pablei ka darak pasa, muk  Góp brei kaoh pablah tui harei, yaok harei labaih 30kg. Yaok mbang kaoh bimao, muk Góp laba hu yaok pluh triệu đồng.

Tui urang pal akaok UBND xã Phú Lộc, pala bimao bào ngư dalam sang lac  bruk ngak bahrau, hu urang nong di bhum tapen negar pala, piah patagok  kinh tế boh sang. Xã bhian brei urang jakar pachreih nong trun  trại bimao di muk Góp piah dong ilamu kỹ thuật, dong langyah dom bruk mblo tabiak. Tuk vak anak tal, palei daok daong ka urang nong phun jien, ilamu kỹ thuật, piah patagok bruk ngak mbang hu kein laba./.

Urang lang: Hanipha- 21/9