Bruk raong ula ri voi dalam sang lầu di sa-ai Trương Thành Ngôn

  Atah di ini 6 thun, sa-ai Trương Thành Ngôn daok di ban sit Cây Dương huyện Phụng Hiệp, tỉnh Hậu Giang hu buh tabiak jaik pluh triệu đồng blei 5 yau ula ri voi mai raong iek. Yau nan min, kadha biak karei di bruk raong ini di sa-ai Ngôn nan lac ula hu raong dalam lồng kareih camin caik angaok tal 3 di baoh sang sa-ai daok, salih ka bruk raong dalam bingun, ribaong, xô chậu atau dalam hồ xi măng yau dom urang nong karei. Sa-ai Ngôn brei thau: “Dut haong hồ ximăng ye hồ kareih camin ini drei mong mboh hu nyu saong samar mboh nyu hu hagait karei piah drei xử lý samar drah. Daok hồ xi măng ye drei oh mong mboh nyu, tal tuk nyu njauk ruak trak blaoh roi tagok ye kan taong ruak lô.”

Meng 5 yau ula ri voi akaok mereip raong dalam dom baoh lồng kareih camin, tal harei ini sa-ai Ngôn hu labaih 100 lồng kareih ngan haong labaih 600 drei ula ri voi amaik ame. Sa-ai Ngôn brei thau: Yaok baoh lồng kareih camin hu sa-ai padang ngak atah 1,2 m, glaong saong prong 0,5 m. Di gah ala hu pagam van tathuak aia neriak nan ye mbuan salih aia bahrau. Jien buh tabiak piah ngak sa baoh lồng jaik 1 triệu đồng. Kuhria rah tapa yaok lồng raong 3 drei ula binai saong 2 drei ula tano. Daok ula sit hu palao raong rilo jang. 

Yaok thun, sa-ai Ngôn tok brei ka ula caih menek piah pablei drei pajaih. Tok kurhia dalam thun blaoh, tapol drei ula di sa-ai caih menek hu labaih 2.000 drei ula ri voi anek saong hu pablei abih ka urang raong dalam palei, ngan haong yaom pablei kuhria rah tapa meng 90- 100 ribau đồng sa drei. Kaoh abih phun jien buh tame, sa-ai Ngôn daok laba hu labaih 200 triệu đồng, oh ka kuhria jien mek tame meng di bruk pablei ula binai jaik caih menek.

Tui sa-ai Trương Thành Ngôn, ula ri voi lac janih athur meng langiu glai, yau nan min nyu biak mbuan raong, bhin di nyu meng 5-7 harei meng brei mbang sa mbang. Pandap mbang di ula nan lac dom janih kaya ikan dalam aia yau: ikan kan, lanung, kiuk... Piah ka ula samar prong, takik kaik gauk saong hu labik kandauk, dalam lồng raong sa-ai Ngôn hu palao dom janih karei yau: talei ni lông, hala patei thu... Dom hồ raong ula hu sa-ai salih aia sa mbang sa adit, dahlau di tuk brei ka ula mbang. Ula ri voi hadei di 12 bilan raong meda pablei ralow hu, hadei di 18 bilan raong nyu meda caih menek. Ula ri voi anek hadei di 1 thun palao raong meda teik trak meng 600gram tal 1kg.

Kayua jalan raong yau ini oh abih rilo labik, oh abih rilo pren mong iek, bo hu laba glaong nan ye hu rilo urang nong dalam bhum mai bac megru, blei anek pajaih ba nao raong.  

Tok di labik praong 60m2 angaok tal 3 baoh sang di drei daok, min meng hatai takre saong tari tareng roh duah, bac megru, sa-ai Ngôn mek hu jien tame yaok rituh triệu đồng meng bruk raong anek ula ri voi dalam lồng kareih camin. Jalan ngak mbang ini daok hu biak rilo urang nong dalam palei, abih di nyu lac dom urang hu takik taneh pala drak bac megru, ngak tui piah cak rok patagok kinh tế baoh sang./.

Urang lang: Jasi – 11/05