Tukvak jaik ini, bein chanh leo (daok ieu lac chanh dây) di ong Nguyễn Hữu Công (daok di xã Song Phụng, huyện Long Phú, tỉnh Sóc Trăng) daok dui pachreih bruk sangka di mangaok dom nyaom biai ngak nong, mang xa hoi kayua dom clip brei thau ka janih chanh leo biak karei ini. Langiu di nan, ong Công daok lac sa dalam dom urang nong camriep abih di tinh pandar hu jak jeng bruk pruh ia tự động, caga hu dahlau bruk pacang ia mbak dak harei dak khang yau urak ini.

Ndem ka bruk duah tabiak janih chanh leo yamen bingi biak karei di drei, ong Công brei thau nan lac sa bruk biak patuah. Labaih 8 thun dahlau, dalam sa mbang puac harak mbao, ong thau tal chanh leo lac janih baoh biak siam ka prein yava, nan ye hu kakei blei 10 asal pajaih mai pala. Hadei di tukvak pala, hu 5 phun praong siam, dalam nan hu 3 thun brei baoh. Yaom lac biak takik min jeng lac bruk bui sambai piah ong hu pabak preinpala iek chanh leo bahrau. Rilo bilan sangka, cang iek piah paik baoh camriep, kein lagaih mboh biak tatuak drei. Hu sa phun brei mboh pahe bingi, rilo ia, yamen la-an, oh deih yau dom janih chanh leo karei.

Dalam sa mbang nao rivang bein, ong mboh baoh darang tathak blaoh paik mbang chip. Dalam tuk mbang, urang nong ini sahaneng tabiak bruk, pagam mata baoh chanh leo tagok dhar phun darang.

Tui ong Công, phun darang mbuan tamuh dalam taneh oh lagaih, oh ruah taneh. Mayah ba dua phun ini pagam haong gauk meda brei tabiak janih phun biak karei haong siam lagaih biak rilo.

Sahaneng ye ngak, meng bruk pato tacei ilamo pagam phun di gru pato pak Sang bac Đại học Cần Thơ, tapa rilo mbang ngak iek, tal thun 2019, mbang chanh leo dhar darang (chanh leo yamen) camriep hu brei baoh.

Ong Công khan lac: “Mbang iek bo mboh bui sambai, haniem phul, baoh bingi yamen njauk haong hatai caong. Baoh sambo kanjik jangaih, yamen bingi, mbau pahe di baoh darang”, hadei di nan ong daok brei pagam phun, khang hatai peih praong mblang taneh pala 200 dhar phun chanh leo mek baoh.

Pabam hu jak jeng janih phun bahrau, ong Công jeng khang hatai tagok mang piah bac magru, duah thau jalan pandar ilamo kong nghe tame bruk ngak.  

Ong Công brei thau: “Lac urang nong nan ye dahlak abih biak rilo tukvak  duah thau ka kong nghe, dahlak eng drei blei pandap panda saong ramik ngak jalan pruh ia tự động pandar meng atah meng phone par tangin. Meng nan, dahlak meda pruh ia ka bein phun di yaok tuk, yaok labik. Oh lac phun jien buh tame ngak trun biak rilo bo daok caga hu bruk njom ia mbak”.

Meng labaih 5.000 got phun chanh leo yamen, ong pablei tabiak darak pasa meng 2,5 – 3 tấn sa mbang haong yaom meng 80.000 – 120.000 đồng/kg. Langiu di bruk pablei baoh, yaok thun ong Công pagam pablei labaih 6.000 phun pajaih (yaom meng 80.000-100.000 đồng sa phun).

Urak ini ka oh tal mbang paik baoh min urang kakei blei jaik abih. Langiu di dom đại lý pak TP.HCM saong Cần Thơ, ong Công daok livestream pablei baoh tapa mạng xã hội. Meng taneh pala di urak ini, yaok thun sang ong laba hu jaik 2 tỷ đồng. Bruk bo ong Công caong khin di abih lac anak tal hu Kanja daong, pambuak haong doanh nghiệp, ba baoh chanh leo yamen bingi hu pablei tabiak negar langiu./.