Ndih tapui saong praong tagok di palei Cam Lạc Trị, xã Phú Lạc, huyện Tuy Phong, tỉnh Bình Thuận meng sit ong Dhiar Thường Xuân Hữu bac megru bruk ngak adat cambat tanarakun di agama Cam Ahier yau ye adat tame agama, adat ba tame kut…Kadha daok ngak ka ong mboh haduh hatai nan lac dom inem krung limo phi vật thể bangsa Cam dak harei dak lahik nao. Meng hatai anit saong takre ilamu di muk kei drei, 41 thun tapa ong duah pataom, vak veik dom adat cambat tanarakun dalam ndam dhi, ndam likhah, tagok tip, tagok dhar, Kate, Po Dam…Ong lac: “ Nan ilamu siam gheih di bangsa Cam njauk brei khik”. Tapa dom trun tagok dalam raidiuk, ong kham merat duah pataom , khik ramik biak rilo baoh tapuk hu makna biak praong vak di ba-ar dó, hala buông. Saong, meng tangin gheih ngak di ong, hu biak rilo tapuk Cam meng kan ytaok rituh thun daok khik tani tanat, ndung bak prein khang ilamu Cam.

Labaih 27 thun ini mai, ong Dhiar Thuong Xuân Hữu ndam gam saong bruk roh duah ini, ong lac: “ Dahlak biak uan tabuan, kayua dom baoh tapuk nan daong biak rilo ka bhap bini Cam. Hu akhar vak ye ilamu Cam meda hu patoa veik khang kajap di dom blah tapuk. Ini lac bruk ngak hu makna rilo di abih dahlak ngak hu ka bangsa drei”. Dom harei bilan padang ngak gilang tapuk klak, ong nao meng palei ini tapa palei diah duah  harak tư liệu, kong ka-ing vak veik biak rilo katap tui kadha di nyu, dom tapuk tamo ong brei ba tame piah karei, huac lahik. Lac urang naih joi akhar tapuk Cam, min hu rilo tapuk klak rilo akhar tapuk kan thau, ong brei roh duah tani tanat,  buh rilo pren yawa lauc thun meng vak abih. Brei ka khol dahlak iek tapuk hala buông karei di gauk, ong lac  kan kandah nan lac dom halau janeng bac kinh oh pandar akhar vak di hala buông meng kan bo vak veik tui Akhar Thrah yau nan ye oh bac hu dom akhar klak. Yau nan ye, piah hu 11 anek saih tui jalan ngak di drei, ong brei buh rilo prein yawa piah pato veik.

Dom thun tapa, hu bruk daong di Karja gam saong danak dak padang ngak palei pala, palei Cam Phú Lạc hu rilo salih birau. Mikva thei jeng lac, rik daong dak padang raidiuk ilamu birau di bhap bini Cam hu oh takik prein yawa di ong Dhiar ini. Ong lac, bruk roh duah yau dom takai yam, oh thei yaok hu. Njauk nao miat miat, tal harei hlei padeih takai, maong veik mboh jalan nao tapa blaoh hu rilo makna siam. Tui ong dom baoh tapuk klak di urang Cam, min ilamu birau hu mai tal grauk palei paje yau nan ye dom adat cambat oh daok lagaih, njauk brei salih tui raidiuk  birau. Lac ong dhiar saong dang kaok ngak dom adat cambat, rija roya…di palei, ong kham merat bak prein ngak bruk ilamu bangsa drei, ong pathau khan, pato tacei ka dom anek kamuan dalam palei saong bhap bini dom hagait siam, atah klak dom adat cambat klak, ngak khat jien khat padai, lahik rilo tukvak. Bruk ngak di ong hu pachreih mikva diukrai tui ilamu birau. Yau nan ye, rilo adat cambat hu ngak dalam patak pataom, bui sambai, oh palai pajua, min khik hu ilamu meng kan di bangsa Cam.

Likau la ong, dahlak jeng daok hadar kanal panuac ong lac : “ Luac rai dahlak tok caong khin hu ba dom hagiat drei duah pataom hu, bac megru hu piah daong ka mikva, palei negar”./.