Hadei di phun tabau, bei java, urak ini, bhapbini bhum taneran kraong CL daok huyn akaok kayua baoh cam sành yaom pablei daok trun hamiet. Kadha vak di Tấn Phong- urang vak di rayo sap ndom VN daok di tỉnh Hậu Giang brei thau ka bruk cam sành yaom pablei bier di abih kuhria meng dahlau mai ngak ka urang nong khat trak.

-Di tukvak ini, cam sành daok tame bilan paik baoh, min urang nong di tỉnh Hậu Giang oh mboh bui sambai tuk yaom cam sành trun hamiet taok daok 3-4 rabau đồng /sa kg min biak takik hu menuac mai duah blei. Ông Trần Hoàng Tân daok di ấp Đông Thuận, xã Đông Thạnh, huyện Châu Thành duh hatai brei thau: Ông hu jaik 5 công cam sành pala hu labaih 6 thun. Dom thun dahlau, ngan saong năng suất meng 2 tal 2 tấn meteh baoh sa công saong pablei hu yaom glaong nan ye bein cam di ong laba hu yaok ratuh triệu đồng min thun ini yaom cam yau ini, ong mboh lac khat trak : “Dahlau daih yaom glaong, jaik 20 rabau đồng. Dom thun hadei jeng daok labaih 10 rabau min thun ini biak lap, 3-4 rabau min. Yaom 3-4 rabau lac urang nong lah paje kayua phun cam sành urak ini biak kan kandah, hu rilo ruak kik”.

-Dom thun dahlau, tuk cam sành hu yaom glaong, urang nong di Hậu Giang jeng ye dom puk palei di bhum taneran kraong CL ba gauk pala janih phun ini. Kayua kurang pajaih, urang nong rilo meng blei pajaih oh thau asal di nyu, tal tuk pala, mikva pala biak kapan jaik 500 phun sa công, saong daok pandar biak rilo jru khik caga phun pala, khak drak piah ngak ka phun tabiak baoh drah samal. Njauk di nyu, hadei di 5 thun pala, phun cam sành meng hu baoh tani tanat. Min, anak meta mboh lac, kayua caong mek jien tame drah samal, urang nong pala phun cam tok labaih sa thun ye kateik ka nyu tabiak baoh.

Ông Trần Hồng Đức- Phó trưởng Phòng ngak nong saong patagok palei pala huyện Châu Thành brei thau: Bruk pala phun cam sành biak rilo, tui hatai di drei, oh pang tui panuac kakei pala tui quy hoạch di gah chức năng saong di urang alamu ba tal ngak tayah quy hoạch, kan si pasang iek, palagaih ka rilo janih ruak njom mbak, dalam nan hu ruak kanyik hala, urak ini oh ka hu jru pasiam ruak. Bruk ini ngak brei rilo urang nong dalam dom thun jaik di ini biak glaih glar saong abih rilo jien padai glang iek bein phun di drei. Tui yaom cam sành trun biar yau urak ini, urang nong khat trak jang dom janih phun karei kayua hu rilo sang buh jien tame biak praong ka phun cam sành:“ Dom mikva drei oh hu taneh sang ye nao pah taneh piah pala. Lingiu di nan jien buh tame ka khak drak, jru halak blaoh pah urang ngak…Dom mikva urang nong oh hu jien ye nao mesraiy jien di gilang pariak, bruk nan jeng rik tame chi phí. Dom mikva mboh urang pala cam hu laba biak rilo nan ye nao blei cam hala ye bayan jien ka bein cam hala, jien buh tame nan jeng praong. Yau nan ye urak ini tui yaom ini, mikva drei khat”.

       -Tỉnh Hậu Giang hu labaih 37 rabau ha phun mbang baoh, dalam nan phun hu pasiu meblah jaik 17 rabau ha, rilo meng lac phun cam sành pataom rilo di dom huyện Châu Thành, Châu Thành A, Phụng Hiệp saong ban sit Ngã Bảy. Tui yaom pablei urak ini, kaoh abih jien buh tame, yaok công cam sành sang bein khat meng 4 triệu đồng tal labaih 10 triệu đồng, tui tanut đầu tư. Yaom cam sành trun tagok, jit ruak di phun cam sành patuh tabiak dak harei dak rilo, ngak ka rilo sang bein pala cam sành di Hậu Giang njauk klak bein kayua huac đầu tư ye meda khat. Ông Nguyễn Văn Thọ daok di ấp Mỹ Hưng, xã Hiệp Hưng, huyện Phụng Hiệp brei thau: Ông daok kaoh klak labaih 5 công cam sành piah pala phun karei:”Mboh jien jru, jien khak nyu abih  biak rilo bo cam oh hu yaom. Sang bein drei ngak sa thun hu sa mbang bo meyah ngak tui huac oh patoah urang oh blei lac drei lihik, oh hu phun jien.”.

-Meng livik mai, sang bein pala cam sành di bhum taneran kraong CL oh ka hu labik pablei tani tanat, rilo meng pablei ka urang pablei salih. Kayua yau nan ye, bruk ba tabiak urak ini lac dom puk palei dalam bhum njauk pasang iek piah hu jalan quy hoạch, salih taneh pala cam sành habal ka nyu lagaih. Taphia bruk blei pajaih hacih oh hu ruak kik halak halin, pala njauk ilamu kỹ thuật piah trun takik jien buh tame, bruk praong di abih lac mikva njauk duah labik pablei tani tanat. Plaih bruk pala phun nduac tui phong trào piah tal tuk “cung” tapa “cầu” ye laik tame bruk srau kadau pala –kaoh, kaoh –pala./.