Tal urak ini, bruk bac megru saong ngak tui jalan hadah krah siam mekre di Wa hu pambak prong tal taong abih bhap bani dalam tỉnh Trà Vinh. Tui nan, dak harei dak hu ralo urang nong gam ngak kinh tế jioy, gam abih hatai hu mbaok tame dom bruk dalam puk palei. Dom rik daong di dom urang nan hu daong tame oh sit ka bruk cakrok patagok di puk palei. Ong Thạch Em daok di xã Hòa Tân, huyện Cầu Kè lac sa dalam dom kareih camin yau nan.

Meng lavik mai, ong Thạch Em biak takre puac saong roh duah dom kadha vak ndom tal Wa. Dom kadha vak ndom tal Wa hu njaom tame ong meng hatai saneng tal bruk ngak. Bac megru tui Wa, ong saneng lac, yaok harei nao tapa nan lac sa thử thách piah kham merat ngak biak ralo bruk siam saong abih hatai daong ka dom urang kan kandah.

Dalam angan lac urang dang akaok Kapul Chữ thập đỏ xã Hòa Tân, huyện Cầu Kè, labaih 10 thun tapa, ong Thạch Em tuk halei jeng saneng tal urang kan kathaot, anit ka dom urang rambah rambup. “Ndom nao gam haong ngak”, ong ba tabiak jalan ngak saong pok panuac tagok pakat ủy, Ủy ban bhap bani xã Hòa Tân padang ngak ralo mô hình daong ba gauk dalam rahra saong kham merat nao jak ba bhap bani hu mbaok tame. Yaom lac biak jar var, sang hu yaok pluh công kruac aik oh hu asar saong la-u sáp, ngak dịch vụ brei papah rạp, bàn ghế đám tiệc … min ong Thạch Em jeng caik tukvak ka bruk ngak pahla, ka kapul chữ thập đỏ. Kayua tui ong yaom lac abih hasit tukvak, min pabak veik ong duah hu bui sambai, haneim phul meng bruk ngak ini. “Dalam bruk ngak xã hội ye bruk ngak pahla lac bruk praong di abih ngan haong dahlak. Ralo baoh sang daok diuk rai dalam kan kandah kayua urang oh daok pren ngak bruk, daok sa drei, njauk ruak kik…Meng yaom jien, brah daong ka mikva oh hadom min nyu meda daong ka urang patrun kan kandah, kayua yau nan ye dahlak kham merat caik tukvak ngak ka nyu siam bruk ini”.

Kuhria meng tuk padang mô hình, yaok thun ong Thạch Em hu jak ba bhap bani alin brei labaih 250 phun pahala  (yaok phun samu 100.000 đồng), yaom jien pataom hu yaok thun ba nao daong ka meng 6 tal 10 baoh sang kan kandah, ralo meng lac dom baoh sang hu urang njauk ruak, urang taha daok sa drei, urang njauk jru mek Dioxin. Daok  mô hình khang brah anit ranam yaok thun jeng pataom hu yaok tấn brah piah daong ka dom urang kan kandah đột xuất saong ba brei 500kg brah ka Ghing mbang pahla di Sang iek ruak Đa khoa huyện Cầu Kè. Piah hu dom pok pandap daong ka mikva, ong abih hatai jak ba dom mạnh thường quân dalam saong langiu tỉnh. Kuhria meng akaok thun tal ini, ong jak ba hu labaih 200 pok pandap, yaok pok yaom 300 ribau đồng piah daong ka urang kathaot patrun kan kandah. Dom bruk ngak sahneng lac sit ini, min nyu hu makna biak prong, daong ngak ka rai diuk dak harei dak siam jang, meng nan hu ralo manuac urang hu mbaok tame jang. Amuk Trần Thị Lan sa dalam dom baoh sang hu mbaok tame mô hình phun pahala brei thau: “Pak ini oh lac hu ta-eng dahlak bo hu biak ralo urang rik daong phun pahla piah hu jien daong ka urang kan kathaot, daong ka dom anek saih kathaot hu nao bac”.

Langiu dom rik daong dalam bruk ngak pahla, ong Thạch Em daok lac urang sami samar dalam bruk patagok kinh tế di puk palei, abih di nyu nan lac urang ba akaok nao dahlau peih bruk pala la-u sáp pablak haong phun kruac aik oh hu asar angaok mblang taneh ngak padai oh kein laba. Piah ngak hu kein laba, ong nao tal Viện roh duah Phun hu menyek bal raya Hồ Chí Minh saong sở Khoa học-Công nghệ tỉnh Trà Vinh piah bac megru jalan iek glang, pacang caga ruak ka nyu njauk ilamu. Blaoh hadei di 3 thun peih ngak, mô hình hu ba jien tame jaik 100 triệu đồng sa công, hadei di kaoh abih jien buh tame, daok laba hu labaih  60 triệu đồng sa công. Yaom lac hu siam lagaih di labik lac urang nao dahlau nan ye kruac aik di ong hu yaom glaong min ong jeng abih hatai klah rabha ilamu saong daong phun pajaih piah ka dom baoh sang karei ngak tui. Kayua ong saneng lac, tuk ngak mbang hu siam laghaih meda daong ka urang paglaong jien mek tame, hu jien piah ngak pahla rilo jang. Dalam tuk nan, meng kein laba kinh tế ba mai, thun 2010 Sở Khoa học - Công nghệ Trà Vinh brei peih prong mô hình la-u sáp, kruac aik oh hu asar angaok mblang taneh 20ha di palei Chông Nô II, xã Hòa Tân piah ka urang nong bac megru, pambak prong. “Kadha bac megru di Wa labik halei jeng meda ba tabiak ngak tui hu. Luac rai Wa tok saneng tal bruk ngak habar ka manuac sia hu trei sil, haniem phol. Meng nan dahlak saneng lac daong ka mikva drei hu jalan ngak mbang siam di abih, pala drak hu kein laba saong tuk abih manuac urang hu ginup meda ye bruk ngak pahla hu siam jang”.

Ong Lê Quốc Thuận,  Phaok akaok UB bhap bani xã Hòa Tân brei thau: “Dahlau abih lac dalam tổ chức ong Thạch Em biak abih hatai, bui sambai haong adei sa-ai, dalam puk palei hu bhap bini anit ranam saong iek prong. Ong biak patak pataom, liêm chính saong chí công vô tư ngan haong bruk ngak. Ong nan lac sa dalam dom urang ngak siam bruk bac megru saong ngak tui jalanhadah krah siam mekre di Wa”

Njaom tame dalam rup jalan saneng di Wa, urak ini yaom lac umo prong, pren yava takik min tuk halei ong Thạch Em jeng abih hatai, nao dahlau dalam bruk ngak xã hội, bruk ngak mbang patagok kinh tế. Dom bruk ngak di ong hu rik daong haong karja  ba mai bui sambai, pachreih patagok bruk cakrok di bol bhap rahra. Kadha ini hu brei mboh lac: tuk bruk ‘‘Bac megru saong ngak tui jalan hadah krah siam mekre di Hồ Chí Minh’’ njom mbak tal halei ye nyu ba mai bui sambai,  cakrok patagok tal nan./.