Meng sit ong Bùi Đăng Núi ngak bruk gleih glar piah duah jien. Oh oh taduan lah thar vak, ong kham merat duah dom jalan ngak bahrau piah salih thar vak di drei song cong khin hu dong ka dom urang nong karei karei gam ngak kaya meda.

Dom thun 1990, ong Núi nao tal dom tỉnh Nghệ An, Hà Tĩnh, Bạc Liêu, Cần Thơ … bloh tapa tal Thái Lan, Trung Quốc piah pasram megru ilamu rong glang ba mai kein liba KT glong. Hadei di labaih 4 thun nao grauk labik, rivang iek dom trang trại, pataom hu rilo ilamu, ong Núi khang hatai peih bruk rong kiuk, ba ba di sang. 

Ong kuac raok veik danao, caik karei ba ba song kiuk, ngak saat ia song palao dom candaih papan xi măng ka ba ba song kiuk tagok cambu pandiak, nyaik liar. Mbang rong ba ba, kiuk thun nan oh jeng, min meng tari taring song sahneng duah, dom thun hadei, bruk raong glang di ong Núi jeng hu jien mek tame biak ralo. Meng trang trại prong jiak   3.000 m2, yaok thun ong Núi pablei hu dom pluh tấn kiuk song rilaow ba ba. Darak pasa di ong peih praong tal dom tỉnh gah barak. Tukvak camereip raong kiuk saong ba ba, ong Núi liba hu meng 100-200 triệu đồng yaok thun.

Yaom lac hu mintri ngak nong song patagok palei pala pok brei angan lac sa urang nong joi, hu hatai sahaneng hadah piah ngak kaya meda, min ong Núi jeng biak pabiar rup drei. Ong bhian ndom lac, jak jeng di drei mai meng rilo kadha hu yaom glong. Tui ong, rong glang tuk halei jeng nao gam song patuah atau oh. “Mboh tapon athur rong prong siam yau nan, min meyah lingik oh siam hasit ye nyu labuh ruak bloh metai bih. Dom bruk meng dahlau mai hulin hu nan lac ilamu bac megru labik ni labik deih, gam saong bruk sahneng duah di drei nan ye bruk raong glang mbuan gaok rủi ro” ursng nong tỷ phú khan lac yau nan. 

Daok jalan ngak di anak tal, ong lac “ urak ni hulin taha ye, nan ye oh khin peih prong bruk rong glang yau dahlau deih. Min hulin mboh drei lac urang khang hatai salih janih rong piah pabak ka drak pasa. Ngan song hulin, bruk jak jeng lac tuk khol drei thau mong iek atah song tantu jang. Bruk nan jeng lac jalan piah khik ramik tani tanat labik ngak mbang sit sot ni./.