Lac urang hu ralo thun dalam bruk ngak kik, ong khang hatai klaak bruk ngak kiak kayua môi trường ô nhiễm, buh jien tame salih tapa raong menuk tauk đệm lót sinh học pambuak haong raong palao dalam bein. Bruk ngak ini ba mai kein laba glaong, yaok thun mek tame hu 300 triệu đồng. Dalam kadha “Urang ngak hamu caong thau” harei ini, khaol drei nao taom gaok urang nong ngak mbang naih jioy angan Lê Duy Đức daok pak xã Bình Nam, huyện Thăng Bình, tỉnh Quảng Nam.

Ong Đức brei thau: akaok thun 2010, dahlak pah taneh klaak saoh dalam glai praong 4.000 m2 piah peih mblang bein raong menuk. Hadei di tuk duah thau darak pasar, dahlak palih ruah menuk Kiến Thùng pak Bình Định kayua pajaih ini praong siam saong meda pacang hu ruak. Akaok mereip dahlak raong iek dom rituh drei, urak ini mblang bein dahlak hu 18 ribau drei, pablei ka darak pasar Quảng Nam, Đà Nẵng.

  Mboh bruk raong meUk di ong Đức hu laba, thun 2014 Huyện ủy saong Ủy ban bhap bani huyện Thăng Bình (tỉnh Quảng Nam) brei ong nao rivang iek dom bruk raong menuk hu laba di Hà Nội, bhum taneran kraong Cửu Long… piah bac megru ilamu. Hadei di mbang nao, ong Đức duah jalan pandar đệm lót sinh học ka mblang bein di drei. Meng nan bo tapol menuk di ong praong samar, takik hu ruak kik saong abih takik pren puh ramik van ro. “Siam lagaih akaok mereip tuk dahlak pandar jalan ngak ini nan lac oh daok mbau aih menuk. Lót đệm sinh học abih takik jien, mbuan pandar, urang raong abih takik pren puh ramik. Nan ye tapol menuk praong biak samar saong takik hu ruak. Abih di nyu nan lac, dahlak oh daok kuhria jien ndo piah patrun bruk ô nhiễm” ong Đức khan lac yau nan.

Karei jang ralo mblang bein raong menuk lót đệm sinh học karei, ong Đức brei tapul menuk di drei tự do nao mai dalam bein. Pabah mbang van ro tuk halei jeng hu peih laneng lanoi, caong plaih pandiak atau mahu aia ye tapul menuk meda tame var. Tui ong Đức, bhain di nyu hadei di 3 bilan raong, menuk teik trak jaik 1,7 kg sa drei, tui yaom kaom darak pasar min ong bhian pablei hu yaom 70.000 đồng sa kg, kaoh abih jien buh tame ong daok laba hu 300 triệu đồng sa thun. Ong Võ Huấn – Akaok Kapul urang nong huyện Thăng Bình ndom lac: “ong Đức lac sa dalam dom baoh sang urang nong naih gheih di huyện. Meng bruk raong glang đệm lót sinh học gam haong bruk raong palao dalam bein di ong hu ralo baoh sang raong glang karei mai bac megru ngak tui, meng jalan ngak nan, hu ralo baoh sang tabiak truh kathaot, yam tagok ngak kaya meda”./.