Urang nong iek glang phun nho kiểng piah pablei tết 

Ngan haong rilo kadha biak karei, bahrau, takai dang biak khang, hu hala, dhar meda, baoh hijao, baoh tathak bhong, pataom ginup abih sambo màu ka sa thun piah brei mboh ka bruk trei sil, kaya meda; langiu di nan nho cảnh hu vaktu iek ma-in suai jang labaih dua bilan, meyah mong iek ka nyu siam meda ba phun nao pala piah mbang baoh, ngak jeng halui. Kayua yau nan ye dut haong bingu đào, bingu mai...ye nho cảnh jeng pachreih hu rilo manuac urang ma-in. Hu mbaok di bein nho cảnh Sáu Lang, khu phố 2, phường Mỹ Hải (Tp.Phan Rang-Tháp Chàm) khaol dahlak mong mboh urang ngak di labik ini thei jeng jan van haong bruk ngak di drei, urang ini cakak hala, urang diah mbeik uak dhan ka yaok rituh chậu nho cảnh piah samu jao brei ka urang blei. Daok cakak klak meneng dom dhan nho cảnh dalam bein, ong Nguyễn Thường Lang po bein brei thau: kayua jit COVID-19, darak pasa nho cảnh thun ini yaom lac oh pandiak yau dom thun dahlau min mai meng angan je meng lavik mai dalam bruk ngak nan ye dahlak jeng khik hu urang blei tani tanat.

Tok dalam pluh harei tapa, dahlak pablei tabiak hu 550 chậu nho cảnh ka urang blei di dom tỉnh Tây Ninh, Đồng Nai, TP. Hồ Chí Minh. Urak ini, bein jeng daok hu labaih 800 chậu daok sroh bingu, hu dom chậu daok tabiak baoh piah samu pablei Tết. Yaom lac hatai caong khin blei pandar tagok glaong min thun ini kayua langik tasik oh laghaih, hajan rilo gam haong langik la-ar nan ye ngak ka nho njauk bimao hala, jruh bingu, jruh hala saong phun praong suai jang. Anak bruk langik tuk pandiak tuk hajan, dahlak brei metham bạt pacang hajan, cakak angin, suai cakak dhan... ngak jeng labik siam laghaih ka phun nho tamuh praong saong samu tabiak baoh njauk  tuk tết tal, thun bahrau mai.

Di Hợp tác xã (HTX) nho A8, Phước Thuận, Ninh Phước, dom urang daok ngak pak ini thei jeng jan van, sami samar mong iek ka dom phun nho daok tal tuk cang harei tabiak bingu ndam baoh, piah ba pablei Tết. Sa-ai Lê Ngọc Cường, urang dalam HTX nho cảnh A8 ndom lac: urak ini dalam bein hu labaih 3.000 gha nho cảnh prong sit ngan haong rilo thaik thaok piah ka urang ma-in palih ruah. Langiu di dom thaik thaok nho cảnh yau dom thun dahlau, ye thun ini HTX nho A8 daok hu dom chậu nho cảnh mini yaom pablei laghaih haong kadung jien urang blei dalam tuk jit ruak COVID-19. Yaok chậu nho cảnh hu dak ramik jeng talei haong rilo thaik thaok yau: blah pin năng lượng aia harei, gul vin, tapak…

Langiu di nan, HTX nho A8 daok hu dom chậu Bonsai dom pajaih nho bhong Red Cardinal, nho hijao NH-0148, nho NH01-152, nho kẹo 01-26... Tui hatai caong khin di urang ma-in, yaok chậu nho cảnh hu yaom pablei meng 300 ribau đồng tal 1,5 triệu đồng. Yaom lac nho tok bahrau tabiak bingu min HTX taduan hu panuac kakei blei meng dom tỉnh ban yau: TP.Hồ Chí Minh, Đồng Nai, Khánh Hòa…Bahrau ini, HTX pablei tabiak hu 250 chậu nho cảnh ka urang pablei salih pajeng ba tame dom tỉnh ban gah Meraong.

Tui kuhria mboh dahlau di dom po bein nho cảnh, thun ini kayua langik tasik oh lagaih nan ye phun nho cảnh pablei tabiak darak pasar biak takik, saong oh siam yau dom thun dahlau. Meng bruk oh ginup pablei, mbuan rah tabiak bruk tagok yaom, abih di nyu lac dalam tuk jit COVID-19 jeng daok, nan ye yaom kaom pajeng ba jeng biak glaong. Bhian di nyu tuk tame adit akaok di bilan 12 saka aia bulan nan lac tukvak tabung glaong ka dom urang pablei salih duah blei nho cảnh pablei Tết, yau nan min, urak ini lac bahrau akaok vụ ye hu urang kakei blei, tui nan yau mboh di anak meta sa thun bahrau bui sambai, chreih chai saong trei sil./.

Urang lang: Jasi -26/12