Hu rilo menuac thau tal lac akaok kapul urang ngak nong xã, abih drei ka bruk Đoàn di palei, sa-ai Trần Văn Phương daok di xóm Mới, xã Nam Hòa, huyện Đồng Hỷ, tỉnh Thái Nguyên daok lac kreih camin ngak kinh tế joi. Dalam kadha ‘kreih camin palei negar” harei ini, da-a mikva saong taong abih gauk pang kadha vak di Cổng Thông tin Điện tử di Trung ương Hội Liên hiệp Thanh niên Việt Nam yaih khan ka kreih camin ngak mbang naih joi ini.    

Trang trại di sa-ai Trần Văn Phương daok angaok baoh mbon atah labik daok di bhap bini palei Con Phượng, xã Nam Hòa. Tal labik raong pabui di sa-ai, kol dahlak mboh tatuak drei kayua nyu praong saong hacih, hu rami ramik biak siam, lagaih. Trang trại hu padang dalam mblang bein praong 2.000m², taneh ngak var ro lac 1.560m² hu 4 khu raong, yaok khu hu parabha jeng 5 labik, hu hệ thống pabak ia menyum saong máng parabha pandap mbang tự động, điện hadah, kadik bluh ngin hiện đại.

Ba kol dahlak rivang iek trang trại, sa-ai Phương brei thau ka dom harei camereip tuk bahrau peih bruk ngak mbang di drei. Sa-ai menek tabiak saong praong tagok dalam sa baoh sang ngak nong, hu rilo adei sa-ai nan ye sang biak kan kandah. Bac bloh hệ Trung cấp bruk ngak pachreih nong, pachreih glai di sang bac Cao đẳng nghề Công nghệ saong Nông lâm Đông Bắc (Lạng Sơn), sa-ai mai palei ngak kinh tế. Meng hatai tari taring, sa-ai kham merat duah thau dom jalan ngak kinh tế nông nghiệp di rilo labik. Meng dom harei camereip peih xưởng mộc, tal raong menuk, palao ikan… bruk hagait sa-ai jeng sahneng duah, jeng ba tangin tame ngak. Bilan 10/2012, hadei di sa tukvak duah thau cambaih ka bruk raong pabui gia công pambuak bruk haong doanh nghiệp, sa-ai khang hatai nao mesraiy jien di Gilang pariak piah blei taneh saong pambuak bruk haong Công ty cổ phần C.P Việt Nam - Dhar gia công Thái Nguyên padang trang trại raong pabui saong yaom phun jien buh tame tuk camereip labaih 1 tỷ đồng. Hadei di 5 bilan padang ngak, trang trại di sa-ai hu ngak salah bloh, hu var raong praong 780m², dahlau di abih sa-ai ba 500 drei pabui pajaih tame raong. Sa-ai Phương brei thau: "Tui jalan ngak yau ini, gah Công ty hu trách nhiệm pabak anek pajaih, pandap mbang, jru pacang caga jit ruak, blei veik taong abih pabui raong di drei, hu menuac tui iek ruak kik saong klauk vắc xin định kỳ ka pabui… Daok kol dahlak hu trách nhiệm buh jien tabiak padang ngak dom kadha tui tiêu chuẩn kỹ thuật, nan lac: var raong, sang sát trùng, kho caik pandap mbang, bể ia, pandap caik pandap mbang, ia menyum, hệ thống điện, xử lý chất thải… taong abih janih brei khik hu siam mekre, oh ngak brei ô nhiễm alam môi trường. Tui sanya, kein laba hu parabha tui tỷ lệ tăng trọng di pabui ralo, kaoh abih dom chi phí nan lac 3.000 đồng sa kg ralo pabui daok diuk. Dalam tuk yau urak ini, meda lac ini sa jalan cakrok kinh tế ba jien tame tani tanat ka sang dahlak”.

Meng jak jeng di mbang raong camereip, sa-ai daok padang sa var ro tra, patagok abih tih taneh padang var ro jeng 1.560m². Dom mbang hadei, sa-ai khik hu 1.000 drei pabui pajaih yaok mbang. Sa thun raong hu 2 mbang, yaok mbang hu labaih 160 tấn pabui hơi, kaoh abih phun jien buh tame bloh daok laba hu 400 triệu đồng yaok thun. Lingiu di nan, trang trại di sa-ai daok ba bruk ngak gam gam ka 7 urang saong ba bruk ngak tui tukvak ka 4 urang tui yaom jien bilan meng 2 triệu meteh tal 4 triệu đồng yaok urang yaok bilan.

Oh lac pataom tame patagok kinh tế sang, dalam angan lac kaok kapul urang ngak nong, lac urang dalam mBan Chấp hành kapul dam dara xã Nam Hòa  vaktu 2010-2014, sa-ai tuk halei jeng abih drei ka bruk Đoàn, tuk halei jeng sangka duah bruk ngak ka dam dara dalam palei. Sa-ai bhian klah rabha ilamu ngak kaya meda di drei tal dom urang đoàn, dam dara dalam xã, peih dom tal pasram, tacei jalan ngak mbang ka dam dara, daong phun jien, ilamu, padang mô hình patagok kinh tế saong ba bruk ngak mbang ka dam dara dalam bhum./.