Urang nong taha Cam dak padang gilang tapuk duh ka bhapbini kathaot

Caong khin meng lavik mai di rilo anek saih bangsa Cam kathaot di palei Cakleng, ban sit Phước Dân, huyện Ninh Phước, tỉnh Ninh Thuận ka sa labik nyim tapuk piah pagalong ilamu urak ini hu jeng biak. Ông Quảng Đầm, sa urang dalam palei hu padang sa gilang tapuk dalam sang piah pabak bruk caong khin puac tapuk ka dom adei. Gilang tapuk praong 25 met vuong min hu ba mai rilo bui sambai saong kein laba oh lac ka dom anek saih bo daok hu duh ka mikva urang nong dalam palei Cam…Daa mikva saong grauk yut nao ravang gilang tapuk ini tapa kadha vak ala ini di Aí Nghiêm, urang vak di rayo sap ndom VN daok di ban raya Hồ Chí Minh:

Dahlau thiah, sang kan kandah oh hu jien blei tapuk, rilo anek saih palei Cam Cakleng, ban sit Phước Dân, huyện Ninh Phước, tỉnh Ninh Thuận njauk nao takai jaik pluh mbaik jalan, tal gilang tapuk huyện duah tapuk piah puac. Thun 2007, tuk hu mbaok tame danakdak sa kadha caong khin di angaok rayo papar binguk, saai Quảng Đại Hoàng Băng, anek likei ông Quảng Đầm caong khin padang hu gilang tapuk piah duh brei saoh ka urang kathaot dalam palei. Pabak caong khin sit sot nan, danakdak hu daong 14 trieu dong ka ông Quảng Đầm peih praong sang pakat 4 praong jang 25 m2 ngak gilang tapuk. Gilang tapuk hu jaik 100 baoh tapuk hu : tapuk  giáo khoa meng tan bac 4 tal tan bac 12; tapuk ka adat hukum; truyện thiếu nhi ; ine lang Pháp-Việt, Anh-Việt… Taong abih jeng lac tapuk klak kayua ong Đầm saong danakdak ieu pataom hu. Ông dak tapuk tapak angaok kệ tui asal kadha: ilimo – sajarah, alamu thường thức, nông-lâm-ngư-nghiệp, ngoại ngữ, tin học, tapuk giáo khoa.

Yaom lac umo taha, thun praong, min ông Đầm jeng daok kham merat juak radaih meng palei ini tapa palei thiah piah likau yaok baoh tapuk, yaok blah báo ba mai ka tủ tapuk di gilang tapuk. Hu harei gaok hajan praong, ông caik ao hajan cuk ka tapuk plaih pasah. Tangin ong yuh megei  kayua li-an min jeng kham merat khik ka tapuk oh pasah. Ông Đầm khan lac: " Pang pak halei hu tapuk dahlak nao likau, hu tuk dom urang nan payua di jalan bu dien, dahlak juah ridaih juak nao piah mek ba mai sang. Dahlak caong khin hu tapuk veik piah duh ka bhapbini kathaot"

Urang puac tapuk di “gilang tapuk ông Đầm” rilo meng lac anek saih, urang nong  nan ye tukvak thất thường. Kayua oh hu bhan kik, yau nan ye thei mai gilang tapuk puac tapuk njauk daok ala di  nền sang. Thei takre tapuk hagait ye nao tal giá tapuk duah eng, puac blaoh caik veik labik klak. Rilo urang nong oh hu tukvak puac di gilang tapuk ye ông Đầm brei nyim tapuk ba nao sang. Dom harei hè ini, dom adei anek saih jak gauk nao gilang tapuk ông Đầm biak rilo, hu adei puac  truyện tranh, hu adei tranh thủ cih, vak tư liệu meng tapuk. Adei Vạn Nữ Hồng Kim, anek saih tan bac 4, sang bac Tiểu học Mỹ Nghiệp ndom lac : "pahdeih hae, amaik adei oh hu jien blei tapuk, truyen ka adei puac; hu gilang tapuk adei nyim tapuk tieng viet tan bac 4 piah puac dahlau, tame thun bac meng bac mbuan jang

Ong Phú Văn Ngòi, akaok mban khik ramik khu phố Mỹ Nghiệp, ban sit Phước Dân, huyện Ninh Phước, tỉnh Ninh Thuận jeng lac sa dalam dom urang bhian puac tapuk di gilang tapuk, ong ndom lac :  " Kol dahlak tuk ha;ei jeng pachreih sang saong kham merat patak pataom di drei, kapul nyoam piah ba tame jang tapuk barau daong ka dom adei jeng ye mikva labik ini hu tapuk piah nyim puac, paglaong bac daa

Tapa jaik  8 thun peih tabiak, gilang tapuk di ông Quảng Đầm hu 2.600 baoh tapuk. Ngan haong dom urang taha praong thun, urang nong, dom anek saih oh tagok gilang tapuk huyện hu, ye gilang tapuk sang ong Đầm  lac labik jiak taphia saong siam lagaih abih di dom urang nan./.

Thúy Linh