Urang par akaok Đảng, karja hu tame Lăng rivang Chủ tịch Hồ Chí Minh 

Pahadar 75 thun Cách mạng bilan 8 saong Harei negar 2/9, dah page ni, dom urang par akaok Đảng, karja hu tame Lăng rivang Chủ tịch Hồ Chí Minh. Meng hatai thau dhar phor praong glaong, dom urang par akaok Đảng, Kanja ba gauk hadar tal Chủ tịch Hồ Chí Minh - Anh hùng peih paha bangsa, Urang dane angan ilamo dunya; urang ba abih rai di drei brei ka bhap bini, ka taneh ia, tacei ba Đảng saong bhap bini ngak hu dom jayah hadah hadai. Patui di nan, kapul hu nao caik bingu, cuh gilau, pahadar dom Anh hùng liệt sĩ di labik pahadar di mangaok jalan Bắc Sơn. 

Dalam tuk lễ  2/9, tui kuhria mboh dahlau tuai meng  ban raya HCM nao dom  tỉnh jiak tapen song tuai meng dom tỉnh jaik taphia mai ban raya HCM meda hu rilo, Sở jalan mbak pajeng ba ban raya hu panuac ieu dom mblang radeih, doanh nghiệp pajeng ba tuai jalan mbak caga siam bruk duh ka tuai damuai nao mai song pasang iek catang bruk pacang caga  jit  Covid-19. Dom sang radeih oh tagok yaom dalam tuk  lễ, rami ramik veik mblang radeih, patagok bruk khik caga siam mekre salamad dalam mblang radaih,  pambuak bruk  song jabat y tế dong bruk iek glang pren yava dalam tuk vak duh ka tuai damuai.  Gah chức năng hu tui iek song tong phạt meyah ngak suan.

UBND tỉnh Bình Dương bahrau tabiak sarak brei mek viek jaik 346 ha taneh pala phun cao su daok di phường Uyên Hưng saong xã Hội Nghĩa (ban sit Tân Uyên) paih ngak danak dak Khu công nghiệp Nam Tân Uyên peih praong vaktu 2. Taong abih taneh njauk mek viek bhian hu UBND tỉnh Bình Dương brei harak chứng nhận quyền pandar taneh ka Công ty cổ phần cao su Phước Hòa (di Tập đoàn Công nghiệp Cao su Việt Nam) piah pala phun cao su di thun 2010. Min, rilo thun tapa phun cao su di mangaok taneh ni brei năng suất oh glaong, njauk salih bruk pandar taneh.

Anak bruk langik tasik kan kandah di biến đổi khí hậu, bilan padai hè thu ni, rilo urang nong di tỉnh Bến Tre oh tam drak bo salih taneh pala padai tapa pala njam patam, phun mbang boh ba mai kein laba  kinh tế glong jang. Ni jeng lac sarak di  tỉnh piah lagaih song langik pandiak, ia njom mbak . Abih di nyu nan lac bruk pala hareik pagam song rong limo lagaih haong biến đổi khí hậu urak ni yau nan ye hu rilo bhap bini palih rua. Tui  Sở ngak nong song patagok palei pala tỉnh Bến Tre, urak ni dalam tỉnh tam drak hu labaih  11,4 ribau  ha padai, trun jang 1.000 ha dut song bruk batabiak  song trun labaih 2.000 ha dut song bilan Hè thu thun bloh.

Harei roya Trung thu ban Phan Thiết thun 2020 tui kuhria hu peih tabiak di harei 29/9/2020 (lac harei 13/8 saka ia bulan). Min, kayua jit Covid-19 urak ni daok rah tabiak sarau kadhau, nan ye tỉnh Bình Thuận oh peih harei roya Trung thu thun ni piah pataom prien saong jien ka bruk pacang caga jit. Dahlau di nan, UBND tỉnh hu ba tabiak harak brei padieh dom bruk ilamo - thể thao pataom rilo manuac, dom harei roya, adat cambaih agama praong, harei pataom darak pasa, nyaom biai … dalam tỉnh meng harei 8/8/2020.

Di dunya hu jaik  26 triệu urang njom, labaih  854.000 urang metai kayua  nCoV; urang njom dok tagok di rilo negar hadei di tuk vak katut jit ruak hu tani tanat. Mỹ - bhum jit prong abih di dunya hu labaih  6 triệu urang njom song jiak  187.700 urang metai. Rilo sang bac đại học pak ni  hu urang njom  nCoV glong hadei di dom harei peih mbang bac bilan thu. Jabat khik ramik pandap mbang song jru tavoa  Mỹ (FDA) hu panuac lac daok caga brei adat  pandar chip ka  vaccine Covid-19 dahlau di tuk tamat bruk ngak iek mbang ka  3 di yaok ribau urang. Panuac ni njauk dom  chuyên gia y tế Mỹ cagar veik kayua lac oh hu hagait piah brei mboh bruk siam mekre song siam lagaih.

Hong Kong harei ni peih bruk dut iek Covid-19 tabiak praong, meng bruk daong di Bắc Kinh piah pacang caga njom mbak mbang ka klau dalam vaktu brei paatah di gauk ngak kan kandah tal kinh tế. Hu 510.000 urang tut angan dut iek oh mek jien, meblah 7% dalam abih tih 7,5 triệu bhap bini di Hong Kong. Min, dom chuyên gia y tế brei thau lac hu tal 5 triệu urang njauk dut iek piah duah mboh dom kakn kandah daok kandauk dalam saong padieh dom bruk mbuan njom mbak di urak ni. Hong Kong hu labaih 4.800 urang njom tuk Covid-19 mbang camriep tamuh tabiak di ban di puac bilan 1, min meng akaok bilan 7 tal urak ni, pak ni hu rilo jang 75% dom urang ruak nan.

Dalam adit ni, negar Prang  meda ba tabiak langyah dom bruk tong mbom bak  drah rah tabiak di bilam  1/2015, abih di nyu nan lac bruk khủng bố mong tame tòa soạn mbao  Charlie Hebdo di ban ine Paris, ngak brei 5 urang metai, dalam nan hu sa urang kamei lac cảnh sát. Tui Mintri Nội vụ Prang, meng thun  2013, 61 bruk kuhria khủng bố njauk tong tayah, dalam nan hu 32 bruk meng thun  2017 mbiah tal ni; abih di nyu lac sa bruk  khủng bố prong daok kuhria ngak hu tong tayah di akaok thun  2020. Kuhria tal harei  31/8, labaih 8.100 urang njauk ị cảnh sát Prang  ba tame angan njauk tui iek, pacang caga bruk sahneng oh njauk mbuan ba tal khủng bố./.

Urang lang: Thu Thảo & H.Pha  1/9/2020 15:42:25