Kapul urang praong thun xã Hàm Phú, huyện Hàm Thuận Bắc, tỉnh Bình Thuận urak ini hu 675 urang. Tui jalan abih drei ka bruk dak padang, cakrok patagok palei negar, dom thun tapa, Kapul oh padeih salih bahrau bruk ngak, tuk halei jeng nao gam haong bruk di puk palei, brei thau hatai caong di hội viên urang praong thun tal pakat cấp ủy, karja. Tui bruk “Thun glaong, camin hadah”, dom asal kadha hu Kapul ba tabiak ngak, dalam nan brei mboh labik dang di urang praong thun di yaok gah dalam raidiuk: hu mbaok tame khik caga alam môi trường saong padang ngak palei pala bahrau, tame bruk pachreih bac, pachreih megru, khik ramik an ninh trật tự, dak padang Đảng, karja saong hệ thống chính trị di puk palei. Yaom lac praong thun min rilo ong muk jeng daok chreih chrai ngak bruk.

Ong Phan Viết Quang lac hội viên urang praong thun hadah krah dalam bruk cakrok patagok kinh tế di xã Hàm Phú. Ong Quang lac menuac ba akaok nao dahlau dalam bruk pala phun thanh long di bhum taneh ini. Urak ini, bein sang ong hu labaih 1.000 got thanh long.Meng tari taring glang iek, phun thanh long di sang ong hu năng suất glaong saong ba jien tame yaok rituh triệu đồng yaok thun. Ong Quang brei thau: Khin hu kein laba glaong jang, njauk truac gom ka thanh long tabiak bingu ndam baoh. Sa thun truac gom 3 mbang, truac gom thanh long tabiak baoh samu jang, rilo baoh jang. Thanh long ba jien tame glaong jang 3 mbang dut saong ngak padai.

Gam song bruk  salih phun pala ba mai kein laba, dom hội viên kapul urang praong thun daok khang hatai buh jien tabiak blei limo mai raong. Piah raong limo hu kein laba kinh tế, dom hội viên tuk halei jeng sangka pilih ruah anek pajaih.  Piah ka limo hu khang kadang, praong siam, dom ong muk bhian hu mbaok tame rilo tal pasram ilamu glang iek, phối giống, pacang caga jit ruak saong klauk jru pacang ruak ka limo njauk tukvak. Dalam dom thun tapa, bruk raong limo menek hu daong ka rilo hội viên hu jien mek tame tani tanat. Urak ini, yaok sang hội viên hu labaih 10 drei limo. Amuk Nguyễn Thị Thanh Nhàn - hội viên kapul urang praong thun xã Hàm Phú brei thau: Meng raong limo, sa thun pablei hu 4-5 drei hu jien mbang cai saong raong anek taco nao bac.

Lingiu di bruk ngak mbang, pala drak, raong glang, urang praong thun di xã Hàm Phú daok hu sap ndom saong bruk ngak piah padang talei pambuak bruk siam mekre, jum pataom, kak kajap  talei rohim puk paga. Amuk Lê Thị Cống, hội viên kapul urang praong thun xã Hàm Phú brei thau: Kol dahlak pachreih ba urang đoàn, dam dara, jak ba mikva rik daong piah blei gom truac hadah dom jalan dalam palei. Meng nan bruk nao mai di mikva hu mbaun lagaih.

Meng dom siam mekre bo kapul urang praong thun xã Hàm Phú ngak hu dalam tukvak tapa nyu brei mboh cambaih ka labik dang di urang jakar, hội viên urang praong thun dalam bruk rik daong haong puk palei peih ngak brei jayah dom bruk kinh tế, xã hội, quốc phòng, an ninh. Ong  Đồng Tài, akaok kapul urang praong thun xã Hàm Phú, huyện Hàm Thuận Bắc lac: Tukvak tapa, dom pakat, dom ngành hu pambuak gauk sangka tal raidiuk di urang taha, praong thun. Dom ong muk yaom lac praong thun min tuk halei jeng ba akaok nao dahlau dalam dom bruk ngak. Lingiu di nan, kapul jeng hu padang kadung jien piah daong ka dom hội viên kan kandah. Abih tih jien mesraiy urak ini lac 85 triệu đồng piah cakrok patagok kinh tế baoh sang.

Urang praong thun tuk halei jeng lac kreih camin hadah ka anek taco maong tame bloh ngak tui, llac menuac mẫu mực dalam sang saong lingiu xã hội, khik ramik saong patagok dom yaom glaong ilamu meng kan, lac gilang ilamu saong jalan diukrai piah ka anek taco bac megru, njauk haong  18 akhar meh bo Đảng saong Karja pok brei ka urang praong thun, tui sap Yuan lac "Tuổi cao chí càng cao, nêu gương sáng vì sự nghiệp xây dựng và bảo vệ Tổ quốc", lang tapa sap Cam lac: “Umo thun glaong akaok sahneng dak glaong, hadah krah piah dak padang saong khik caga taneh ia./.