Urang taong ikan Lê Văn Bông

Labaih 30 thun nao tasik jeng lac du nan thun ong Trương Văn Toàn – daok di phường Bình Hưng, bal Phan Thiết, tỉnh Bình Thuận kak kajap rai di drei haong pulao kaoh Trường Sa. Meteh rai manuac kak kajap haong tasik ba mai ka ong rilo bui sambai jeng yau duh hatai di rai urang taong ikan. Ong nan lac sa dalam kapul nyaom jaik 10 po gilai di bal Phan Thiết bhian nao taong mek di bhum tasik pulao kaoh Trường Sa. Sruh gilai 380 CV kayua tangin ong peih nduac bhian pambuak bruk haong sa gilai 350 CV nao taong mek kaya iken di bhum tasik Trường Sa.

  Dalam dom mbang tabiak tasik, ong jeng daok kanar hadar cambaih dom mbang methuh haong gilai negar langiu, atau dom mbang gaok riyak praong, dom mbang ribuk khang. Khan veik ka dom mbang methuh haong gilai negar langiu, ong Toàn brei thau, dom mbang daok taong ikan di mblang tasik Phúc Nguyên (jaik taphia sang giàn DK1) ye gaok gilai negar langiu. Ong iew phon khan brei gah chức năng thau, blaoh khan brei dom sruh gilai dalam kapul thau piah khik siam mekre salamat: “Drei taong mek di bhum tasik hu jalan tapen negar jaik taphia, oh lih tapa gah negar langiu, min hu dom sruh gilai negar ayut lih tame tasik di drei. Adei sa-ai tuk halei jeng khan brei ka gauk thau, brei gilai nao tame dalam bhum tasik di Việt Nam piah oh gaok cuang kandah dalam bruk ngak mbang”.

Piah paglaong kein laba bruk taong mek ikan saong abih di nyu lac daong gauk dalam yaok kapul nyaom haong gauk dalam yaok Tổ, Đội pambuak gauk. Nao tabiak jaik pulao, ye dom gilai mai meng dom tỉnh, bal karei pambuak gauk veik jeng sa njaom prong piah gam taong ikan, gam khik iek brei ka gauk.

Baoh sang urang taong ikan Lê Văn Bông, phường Đức Long, bal Phan Thiết hu 5 rai nao tasik. Dalam 9 adei sa-ai likei di ong Bông ye hu tal 6 urang kak kajap haong tasik angaok 5 sruh gilai. Yaom lac tukvak taong mek ikan di mblang tasik Trường Sa oh rilo yau dom urang taong ikan karei, min meng pasiam veik jalan taong mek nan ye dom adei sa-ai di ong jeng samar cak rok patagok jien mek tame ka baoh sang. 11 thun dahlau diah, dom adei sa-ai di ong Bông kham merat pasiam veik sruh gilai di drei meng bruk taong mek di mblang aia dhang tapa mblang aia nduac, ta-eng ong patagok gilai hu pren khang 700 CV saong pagam pabak rilo janih pandap bahrau yau mac dò ngang, pandap pasang iek jalan nao, bộ đàm atah VX1700 atau mac halang aia tasik jeng aia taba… Meng nan, kapul nyaom gilai di ong nao tabiak atah taong mek ikan di dom mblang tasik yau pulao kaoh Trường Sa, labik sang giàn, dom mblang kaoh…, labik hu rilo kaya ikan.

Ong Bông khan lac, lavik lavik ong saong dom ayut dom gilai taom gaok gilai negar langiu hu mbaok jaik taphia labik taong mek. Kayua hu thau dahlau, gilai ikan di ong jeng daok taong mek ikan dalam mblang tasik njauk adat hukum: “Hu rilo mbang jeng hu áp lực. Min nyu ngak hagait nyu ngak, drei taong mek ikan tok tai drei, bo juai ba cuang kandah mai ka drei lac hu paje. Tasik lac tasik di drei, drei taong mek ikan”.

Patui jalan di ong muk amaik ame, dom urang taong ikan ranaih umo jeng halan hatian nao atah hadiuk anek piah tabiak tasik atah rilo harei. Sa-ai Nguyễn Văn Tài – sa urang taong ikan ranaih umo daok di phường Phú Tài, bal Phan Thiết lac: “Drei nao tasik rilo harei rilo bilan,  hadiuk anek daok pak sang jeng duh hatai, bruk ngak mbang gaok tuk mai jeng kan kandah”.

Yaom lac daok hu dom kan kandah, glaih glar, min kham merat yam tapa abih, dom sruh gilai Bình Thuận jeng daok harei melam kak kajap haong tasik. Dom sruh gilai ba gauk tabiak tasik gam taong mek kaya ikan, gam khik iek quyền ngak po pulao tasik di taneh aia Việt Nam./.

Urang lang: Jasi-28/5