20 thun dahlau, thương binh Nguyễn Minh Quốc tabiak truh palei, xã Mỹ Lợi, huyện Phù Mỹ, tỉnh Bình Định nao tagok Tây Nguyên padang kinh tế barau. Ong tame tal bhum atah bayah di abih dalam tỉnh Lâm Đồng piah padang mbang ngui, nan lac xã Rô Men, huyện Lâm Hà –urak ini lac Đạ Rsal, huyện Đam Rông.

Di bhum taneh ini, bhap bini rilo meng lac urang dom bangsa takik, daok prai rai tapen dom mbon, ceik. Rai diuk di mikva biak kan kandah, daok dalam dom baoh sang kreim, hala, taik tahak, bruk bac daa di anek kamuan jeng oh tani tanat. Thương binh Nguyễn Minh Quốc hadar veik:

Labaih 10 thun daok di kreh glai ram, thương binh Nguyễn Minh Quốc oh huac rambah rambup, glaih glar, harei melam peih taneh, pasiam dom dom bãi sậy, glai le, mbon ceik hreik hareim, ngak ka bhum taneh thu lagu patau randaih jeng dom bein njam patam that siam. Livik livik harei, bhum taneh atah bayah ini menuac sia dak harei dak ralo, bruk caong bac daa di anek kamuan dak harei dak praong, min piah duah labik tapak, samu, lagaih ka bruk padang ngak sang bac lac biak kan. Mboh yau nan, dalam rilo thun gam, thương binh Nguyễn Minh Quốc  halan hatian brei dom mblang taneh siam bo ong patuh ia hauk, haok ia meta jah ngak hu piah karja saong gah pato megru padang ngak sang bac. 

 “Mboh anit, phòng pato megru oh hu jien ndo hagaiti, sang bac rambah lô jien padai jeng oh hu, bo taneh di labik ini urak ini biak kan duah, drei halan hatian brei taneh ka anek kamuan drei nyu bac. Thun 2005 brei ka huyện Lâm Hà 4.300 mét vuông piah padang ngak sang bac pakat 1 saong pakat 2. Thun 2006 tuk kaoh huyện Đam Rông ye sang hu brei taneh ka huyện Đam Rông 697 mét vuông piah padang ngak sang bac pakat 2. Tal thun 2008, mboh sang bac sit lo nan ye brei 2.000 mét vuông tra piah ngak sang bac barau saong mblang sang bac”    

 Yau nan labaih 8.000 mét vuông dang angan ong Nguyễn Minh Quốc hu po barau dang angan lac:  Sang bac Tiểu học Lương Thế Vinh saong sang bac Trung học cơ sở Lê Hồng Phong. Gam saong dom baoh sang bac barau, ye labik daok di dom gru pato jeng hu padang ngak jaik taphia. Dom gru pato ranaih umo nao tapa labaih 50km jalan đèo meng ban sit Đinh Văn, huyện Lâm Hà, tỉnh Lâm Đồng tal ini pato, dalam ralo thun gam njauk daok dalam dom sang hala sit sot, sup palup, urak ini hu labik daok tani tanat. Bui sambai kayua anek kamuan hu sang bac siam mekre, gru pato hu labik daok barau, anai gru Lê Thị Hoa, sang bac Trung học cơ sở Lê Hồng Phong, xã Đạ Rsal, huyện Đam Rông ndom lac:

 “Sang wa Quốc biak siam hatai, brei taneh ka karja palei bo cambaih laih nan lac brei tane padang sang bac Lê Hồng Phong hu yau nan, bhap bini saong xã hội biak iek praong. Lac sa gru pato dahlak biak thau dhar phon sang wa saong jia lac menuac sia meda bac megru wa rik daong ralo jang  ka gah pato megru piah bruk bac da-a di anek naih dak harei dak siam jang”.

Nan jeng lac bruk iek praong, hatai thau dhar phon di dom amaik ame hu anek kamuan daok bac di dom sang bac ini. Amuk Nguyễn Thị Mộng Kiều – amaik di adei Nguyễn Thanh Tâm, anek saih sang bac Trung học cơ sở Lê Hồng Phong, xã Đạ Rsal, huyện Đam Rông khan lac:

 “Lac sa urang amaik hu anek bac dalam sang bac Lê Hồng Phong, likau ndua dhar phon wa Quốc hu brei labaih 1.000 m2 taneh ka sang bac piah dom kamuan hu labik me-in, daong dom kamuan bac daa siam jang”.

Labaih 20 thun meng bhum kreih negar nao tagok Tây Nguyên padang kinh tế barau, thương binh Nguyễn Minh Quốc oh lac ngak ka dom bãi sậy, glai le thu lagu jeng dom bein njam patam that siam, bo daok brei labaih 8.000 m2 taneh piah padang ngak sang bac. Tui ong, dom mblang taneh siam hu meng ia hauk ia meta, oh lac piah pala phun saoh, bo daok piah pandih dom  pajiah siam ka bruk pala menuac./.