Urang trak hatian di capi bangsa

Palei di nghệ nhân Danh Yên daok di xã Mỹ Thuận, huyện Mỹ Tú. Umo 12 thun ông tui gru dalam kapul phleing Tum Pók Sók (Tam Sóc) piah bac. Ông Danh Yên khan lac: njauk lac dahlak hu duyen saong phleing mengkan di bangsa. Dalam sa melam, gru pato 5 ragu, dahlak jeng hadar saong mein biak gheih. Akaok mereip gru brei ka dahlak pan đàn cò, hadei nan mboh dahlak gheih me-in nan ye pato dahlak mein dom janih phleing karei saong brei nao tui kapul nhạc nao me-in grauk phum sóc. Gam tui kapul nhạc mein, gam bac nan ye oh suai livik taong abih dom kadha daoh dahlak jeng thau mein abih. 

Ông daok brei thau lac, tuk nan dalam kapul phleing Tum Pók Sók rilo meng lac dom urang praong thun, tok hu ông lac urang mein nhạc sit di abih dalam kapul. Hu gru pato abih hatai, yau nan ye hadei di sa tukvak ông jeng hạt nhân di kapul. Oh mein hu dom janih capi mengkan ye đờn cò bo ông daok thau mein đờn cha-pay-đon-veang.

Tuk dom nghệ nhân di kapul phleing Tum Pók Sók taha saong metai nao, ông lac urang pato veik ka dom rairah hadei saong khik ramik kapul phleing danei angan tal harei ini. Ông Danh Yên jeng hu padang kalup kapul phleing capi di xã Lâm Tân saong hu mbaok tame rilo mbang pakacah di huyện, tỉnh saong bhum. Dom mbang tame hội diễn, harei pataom daoh tamia, ông jeng mek hu giải, abih di nyu nan lac di Hội diễn nghệ thuật quần chúng saong parang iek khan ao angui cuk Khmer tỉnh thun 2014, ông Danh Yên mek hu giải cá nhân xuất sắc ngan saong kadha “bhum palei Lâm Tân urak ini”. Barau ini, di harei pataom ragu daoh bhap bini VN mbang yaka 6 thun 2015 bhum Nam Bộ, ông mek hu giải C.

Oh lac thau mein capi, nghệ nhân Danh Yên daok thau ngak dom janih capi ye đờn cò, pì-o, cha-pay-đon-veang, sko (trống)… piah duh brei kapul nhạc. labaih 40 thun kak kajap saong capi mengkan, bruk bo ông daok pandik akaok abih di urak ini lac oh hu menuac megru. Ong lac, capi mengkan mbuan si mein, kayua hu dom nốt nhạc saong kadha daoh đàng hoàng. Đờn Cha-pay-đon-veang kan me-in jang, kayua gam daoh gam đờn oh tui bruk paneh, ragu ragam, urang mein tok thau asal kadha blaoh pandar từ ngữ dien dat ka nyu hu makna nan ye njauk thau akhar Khmer. Urak ini, kapul capi Tum Pók Sók saong Lâm Tân jeng lac dom tangin mein capi hu umo thun labaih 50 saong oh ka duah hu uranng ranaih umo halei piah pato saong kak kajap suai livik yau nan ye dahlak huac lac harei hadei meda lihik nao/.

Thúy Linh