Bruk ginum biai hu peih ngak online

Ủy ban Bangsa birau mbaoh tangin tame harak pambuak bruk saong Tập đoàn FPT ka bruk salih tapa số. Tapa nan, piah padang bruk pandar cong nghe số khang kajap, peih ngak dom bruk hu ba tabiak dalam Danak dak pakat negar patagok kinh te – xa hoi ka bhap bini bangsa takik saong bhum ceik vaktu 2021 -2030. Sa kadha hu makna praong dalam danak dak pambuak bruk, lac: jhul patagok bruk pandar cong nghe tame pato megru ka bhap bini bangsa takik saong bhum ceik; Jhul  patagok bruk pandar blah web pablei salih piah jhul khang bruk pablei pandap ka bhap bini dom bangsa; pambuak bruk pathau khan saong yam takai nao gam dalam dom bruk daong tani tanat raidiuk…

Mintri Y tế hu panuac ieu dom labik ngak tabiak – blei tame meng negar lingiu pandap dut iek SARS-CoV-2 pathau khan dom bruk pabak saong yaom pablei di tukvak urak ini; gam haong dom kan kandah, tavak tavaiy dalam tuk ngak mayah hu. Dom harak gar, asal kadha hu pambuak tal payua tal Mintri Y tế dahlau di maong 4 bier harei 17/10. Mintri Y tế meda pataom viek, pathau khan  Rajaei, gam tui di nan jeng pathau khan haong dom kapul, tinh, bal piah pasang iek dalam bruk blei pandap dut iek SARS-CoV-2.

Viện kiểm sát bhap bini pakat glaong di abih birau brei bayar hồ sơ iew pasang iek pabak veik ngan saong Trần Văn Nam, dahlau daih ngak bí thư tỉnh ủy Bình Dương saong dom urang dahlau diah ngak praong di tỉnh ini. Sa bilan dahlau, Gah Cảnh sát điều tra Mentri Công an tabiak panuac tamat, tui nan ong Nam saong dom urang karei dalam tuk daok ngak bruk ngak suan bruk khik iek taneh riya, ngak khat lahik jien karja labaih 1.063 tỉ đồng. Dalam nan, hu bruk pablei salih taneh praong 43 ha cagar veik jalan ngak di Tỉnh ủy saong suan hukum karja.

Hadei di tuk Ban raya HCM brei pacadu meng harei 1/10 ngan haong dom bruk pacang caga jit ruak tui Sarak 18, dom bala jalan mbak di ban raya tagok jang. Tui jabat CSGT (PC08) Công an ban raya, bahrau dalam 1 adit camriep  rahtabiak 32 mbang bala jalan mbak, ngak ka 12 urang metai. Makna di nyu lac kayua peih radaih biak samar, lih tame jalan karei...  Hu 3.757 urang peih suan njauk ngak biên bản, taong phat labaih 8 tỉ đồng. Jabat PC08 brei thau meda jak ba rilo abih dom kapul, radaih, paglaong bruk pasang iek piah langyah catang dom bruk ngak suan adat ka pacang caga jit ruak saong ngak suan adat jalan mbak.

Công an tỉnh Bà Rịa- Vũng Tàu birau chap khik 4 urang pambuak tal bruk chap mek po bein li-u ndok 4ti 500 trieu dong jien ngak ka manuac sia duh hatai di puac thun 2020. Nan lac Lê Minh, Trần Bá Vương, Trần Văn Sang saong Lê Hoài Bảo Nam, daok di  TP.HCM. Abih 4 urang nan dahalu daih hu duis pambak tal bruk pametai manuac atau co blah drap ar. Dahlau di nan, puac thun 2020, công an chap khik Trần Anh Tuấn saong Trần Văn Tín. Tapa duah thau, mboh lac, Tuấn krein ong T.Q.V daok huyện Xuyên Mộc, kayua kurang jien mbang me-in nan ye nyu chap mek ong V ndok jien. Oh ka bak dua harei hadei, ong V hu daong pa-klah tabiak dalam salamat.

Meng 168/193 phiếu pachreih tui, Mỹ hu paok ngak viek Hội đồng quyền anek manuac Liên hiệp quốc. Urang lambuak negar Mỹ di pak ni hupanuac lac Washington meda pataom tame rilo bruk, meng dom bruk hu brei thau lac ngak suan quyen anek manuac di Trung Quốc, Afghanistan saong Syria; tal dom asal kadha praong jang yau ye quyen di urang kumei, bruk neh rabha bangsa, jang yau bruk taong paoh ngan haong dom kapul takik manuac. Washington tabiak truh jabat ni di bilan 6/2018 hadei di rilo panuac di tổng thống Mỹ tuk nan lac Donald Trump oh njuak hatai haong Liên hiệp quốc.

Hãng Reuters harei 15/10 brei thau Tổng thư ký Liên Hiệp Quốc Antonio Guterres hu panuac ieu brei padeih nyaom ginum biai online  saong akaok metrin dom taneh ia ASEAN jaik tal tuk tame, piah plaik njiak bruk lac yau taduan karja quân sự Myanmar. Hu thau, ASEAN njauk hatai 5 paka saong Tổng tư lệnh quân đội Myanmar Min Aung Hlaing di bilan 4, min dom taneh ia ndem puac Myanmar oh ngak tui. Karja quân sự Myanmar oh taduan đặc phái viên ASEAN mai taneh ia ini tui kuhria meng harei 11-14/10.

Mintri Du lịch saong Thể thao Thái Lan caong lac meda hu 500-600 triệu baht (labaih 18 triệu USD) piah peih 2 mbang hòa nhạc di Bangkok saong Phuket piah uan bruk  peih pambang gilac taneh ia di tuk uan thun bahrau. Dalam nan, 200 triệu baht hu mek meng gilang pariak kanja, daok viek kayua tư nhân daong. Taneh ia hu brei pandar pato tacei bahrau ka tuai hu klauk vaccine ginup hu tame negar bo oh njauk brei daok karei meng harei 1/11; brei peih dom bruk hu tal 500 urang hu mbaok tame di Bangkok./.

Urang lang: Thu Thảo -Ái Nghiêm -16/10