Bhumi
# Tui Mintri Y tế, ComBE Five lac vaccine kayua Công ty Biological E. Ltd Ấn Độ ngak, nyu dreih gauk saong salih ka vaccine Quinvaxem dalam bruk klauk jru peih praong. Vaccine ComBE Five hu klauk ka anek naih piah pacang caga dom ruak njom mbak, hu: bạch hầu, ho gà, uốn ván, viêm gan B, viêm phổi, viêm phổi/viêm màng não mủ kayua vi khuẩn Hib.
#Dahlau di tuk hu Mintri Y tế brei ba tame danak dak klauk jru peih praong piah salih ka vaccine Quinvaxem, vaccine ComBE Five hu WHO taong yaom dahlau saong pandar labaih 400 triệu mbang di 43 taneh ia. Yaok sa lô vaccine mai Việt Nam, dahlau di tuk ba tabiak klauk, jeng hu pasang iek gah chất lượng, mboh hu siam mekre salamat meng hu ba tame klauk.
#Anak bruk lac hu rilo anek naih njauk phản ứng hadei di tuk klauk vaccine ComBE Five, dalam mbang pasang iek bahrau ini ka bruk klauk jru di Hà Nội, Akaok Mintri Y tế Nguyễn Thị Kim Tiến brei thau, taong abih dom janih vaccine, kuhria gam jru pasiam ruak hu klauk tame menuac ye meda hu phản ứng meng hanjul tal trak, meng phản ứng pak di labik, pandiak, klaak mbang, tal preo hia, rối loạn trị giác, tím tái... Min dom amaik ame njauk ba anek naih nao klauk jru kayua bruk tai biến biak takik, lingiu di nan meyah anek naih oh hu klauk jru ye mbuan si njauk dom jit ruak kan kandah.
#Dalam tuk nan, GS-TS Đặng Đức Anh brei thau, dom anek naih njauk phản ứng hadei di tuk klauk vaccine ComBE Five meng bloh lac dom kadha bhian mboh tuk klauk vaccine. “Vaccine ComBE Five hu pasang iek chất lượng, mboh hu siam mekre salamat saong yaok rituh triệu anek naih di dunya hu klauk. Urang ngak amaik ngak ame jhui huac rilo saong njauk ba anek naih nao klauk njauk harei”, ong Đặng Đức Anh kakei lac yau nan.
#Daok PGS-TS Trần Minh Điển, Phó Giám đốc Sang iek ruak Nhi Trung ương kakei lac, hadei di tuk klauk vaccine ComBE Five, anek naih bhian mboh: pandik, brah bhong di labik klauk saong pandiak. Bhian di nyu dom phản ứng hadei di tuk klauk meda rah tabiak dalam 24 – 48 tuk, rilo meng lac pandiak saong pandik di labik klauk, njauk brei ka anek naih menyum jru patrun pandiak, patrun pandik, menyum rilo ia saong tui iek anek naih gam dalam tuk melam ndih. Tuk anek naih nyu pandiak glaong labaih 38,5oC, oh pang jru patrun pandiak, preo hia, klaak mum, kan suak yava … , njauk pasamar ba anek naih nao tal bilai iek ruak jaik di abih, jhui caik nyu daok di sang, jhui eng drei nao blei jru mai ka nyu menyum./.
Viết bình luận