Dom harei tapa, blah rup thaot di anek kumei sit umo 12 thun daok angaok bàn thờ  khim klao biak anit, ngak ka sa-ai Nguyễn Thị Hải Vân uan lô, mboh yau nyu daok di anak meta. Urang amaik umo 51 thun ini oh var hu caong khin di Vân Nhi lac jeng bác sỹ. Sa-ai Hải Vân khan lac, dalam 10 thun mesruh haong ruak u nhú dây thanh quản, adei Vân Nhi tuk halei jeng kham merat yam tapa pandik harao di ruak kik, kham merat bac da-a, caong khin jeng gru jru pasiam ruak ka drei saong ka urang karei:

  “Yaok mbang nao sang iek ruak, anek nyu nyu drum naih lô, dom bác sĩ jeng meyaom lac Vân Nhi naih lô. Tuk klauk jru, rilo anek naih ruak preo haiy, min Vân Nhi tok sraiy hasit ia meta. Tuk dahlak tangi sua anek praong tagok caong ngak hagait, anek lac caong jeng bác sĩ piah iek ruak ka drei saong daong ka menuac sia”

Bruk adei Hải An umo 7 thun daok di quận Nam Từ Liêm, Hà Nội alin  giác mạc hadei di tuk metai ngak megei tal baoh hatai di sa-ai Hải Vân saong adei Vân Nhi. Tuk nan, sa-ai Hải Vân oh khin brei ka anek thau bruk ruak kik dak harei dak jhak nan ye duah jalan tangi anek sahneng mboh yau habar ka bruk alin giác mạc ye Vân Nhi klao lac nan sa bruk siam njauk ngak.  

   “Harei anek jaik metai não, bác sĩ biai haong dahlak lac sang sa-ai khin alin giác mạc di anek, njauk halei oh? Tuk nan dahlak tame biai haong anek, dahlak mboh anek sraiy ia meta, tapa nan dahlak mboh lac anek nyu thau bruk dahlak biai. Tuk nan, dahlak tok thau kua anek bloh haiy. Anek lac menuac hu hatai siam saong hu anai gru, ayut sahabat anit ranam. Dahlak sahneng njauk ngak bruk siam ini piah daong ka urang karei. Sang dahlak jeng caong alin  tạng anek ka y học kayua urang hallei nan diuk hu haong baoh hatai, baoh thận di Vân Nhi ye dahlak mboh yau anek daok diuk, min dom bác sĩ lac urang meng 18 thun tagok meng hu alin tạng…”  

Vân Nhi palang lahik, min bruk alin giác mạc daong brei hadah meta di sa urang sup meta halei nan lac bruk biak hu yaom glaong. Tui panuac khan di Ngân hàng Mắt, Sang iek ruak meta Trung ương ye bruk khik piah giác mạc lavik di abih lac 14 harei. Yau nan, dalam dom harei tra, giác mạc di Vân Nhi hu diuk veik dalam dua gah meta di urang karei. Nan jeng lac bruk an ủi, chreih bui ngan saong amaik ame gauk gar di Vân Nhi tuk bruk siam mekre di adei saong sang di adei hu hadah tagok meng sa “cửa sổ tâm hồn” bahrau./.