Viện Huyết học Tame darah pakat negar hu ba jaik 3.000 đơn vị darah tal 10 tỉnh, ban di taneh ia dalam mbang pa-atah di gauk. Meng akaok bilan 7 tal ini, dom darah taduan hu dalam taneh ia duk haong bruk ba tabiak tok hu 40% min. Jaik abih dom tỉnh, ban brei salih tapa harei karei, atau klaak, oh peih bruk halan hatian brei darah kayua jit Covid-19. Piah ka bruk taduan mek darah hu siam lagaih saong salamat dalam tuk pacang caga jit khang di abih, Viện Huyết học Tame darah pakat negar brei dui atah tukvak peih bruk halan hatian brei darah. Dom labik hu meng 20 rahra tagok di sa labik tut angan brei darah, Viện brei menuac di drei trun tapak dom labik daok, dom tổ dân phố piah mek darah.

Mesup ini (9/8), dom urang pan akaok Sang iek ruak Dã chiến ka 1 TP.HCM brei thau, meng tuk padang tagok di harei 26/6 tal harei ini, hu abih tih 9.000 urang taong ruak di Sang iek ruak Dã chiến ka 1 abih ruak hu nao sang veik, tui kuhria biar harei ini hu 300 urang tra hu mai sang veik. Dahlau di nan, Sở Y tế TP.HCM hu peih ngak iek bruk dui katut panak tukvak taong ruak F0 oh hu triệu chứng di sang iek ruak. F0 dut iek RT-PCR harei ka 10 mboh âm tính atau dương tính min hu virus biar hu brei nao daok karei di sang meyah sang hu labik daok, pacang caga hu njaom mbak.

Dalam tuk dom menuac njauk Covid-19 tagok glaong, Sở Kế hoạch Đầu tư tỉnh Bình Dương peih bruk taduan mek harak gar, hồ sơ saong bayar veik taong abih tapa mạng. Meng puac bilan 5, Sở ini brei padeih bruk tacei pato, taduan mek harak gar hồ sơ di Pasak ngak bruk di tỉnh. Tui yaok pataom mboh lac, dalam 7 bilan thun ini, Bình Dương hu 3.624 doanh nghiệp padang bahrau, ngan saong yaom phun jien tut angan lac labaih 26 rabau tỷ đồng. Dom doanh nghiệp peih bruk brei thau, tut angan tapa mạng điện tử hu labaih 98%.

Harei 9/8, UBND tỉnh Bà Rịa - Vũng Tàu  hu harak brei thau lac oh ka peih bruk pahadar 30 thun harei padang tỉnh (12/8/1991 – 12/8/2021). Dahlau di nan, danak dak tui kuhria hu peih tabiak meng harei 10/8 ngan saong rilo bruk hu makna, peih pakak rilo danak dak, bruk ngak praong. Min kayua jit ruak Covid-19 daok srau kadau, saong Bà Rịa-Vũng Tàu jeng daok dalam tukvak pa-atah di gauk tui Sarak 16, pataom tame pacang caga jit, sangka raidiuk bhap bini. Kayua yau nan ye, danak dak pahadar meda hu peih tabiak ngak di tukvak mboh lagaih, hadei di tuk pasang iek hu jit ruak Covid-19.

Kapul ngak bruk đặc biệt tỉnh Hải Dương bahrau hu harak ieu dom gah peih ngak chip dom jalan pacang cakak, jhul kadun likuk bruk mbuan njaom mbak jit ruak Covid-19 dalam bruk mbang menyum. Jaik di ini, dalam tỉnh hu dom urang njaom Covid-19 pambuak tal labik pablei pandap mbang, abih di nyu lac, dom sruh jit meng dom labik pablei ralow sau, mengiu hu pabak meng gah meraong. Tỉnh Hải Dương tacei pato brei pasang iek, padang angan saong brei padeih dom bruk pajeng ba, pablei salih, sik ngak ralow, ngak pandap mbang meng ralow sau, mengiu hu ba mai meng gah Meraong, peih bruk mek mẫu dut iek ka taong abih menuac pambuak tal meng harei 26/7 tal urak ini.

Tuk biến thể Delta ba tal mbang jit Covid-19 bahrau di dunya, ye dom urang oh ka klauk vaccin, dalam nan hu rilo dam dara njom virus SARS-CoV-2 tagok rilo. Rilo taneh ia brei jhul khang bruk klauk vaccine ka uranaih bahrau praong. Di Mỹ, jaik 40% uraniah umo meng 12-17 thun hu klauk takik di abih 1 mbang vaccine pacang Covid-19. Dom taneh ia karei yau: Prang, Tây Ban Nha, Italia, Hà Lan, Campuchia…hu brei adat pandar vaccine pacang Covid-19 ka uranaih umo meng 12-17 thun. Ixrael daok brei adat klauk vaccine ka uraniah umo meng 5-11 thun.

Kol pan phao di Taliban meblah mek hu jaik abih pasak di tỉnh Kunduz, sa tỉnh praong di Apganixtan haong 1 pasak di tỉnh karei daok jaik nan hadei di tuk peih bruk pacang veik dalam 1 bilan tapa. Bruk Taliban meblah mek Kunduz lac bruk catang tagok bahrau di mblang mesruh Apganixtan dalam tuk Mỹ haong dom taneh ia phương Tây ba lin di drei tabiak abih. Min gah rajaei ndom lac, pasak di dom tỉnh oh ka njauk kol Taliban meblah mek saong dom bruk mesruh gauk jeng daok rah tabiak.

Tui hãng tin Reuters, sa pathau khan kandauk di Liên hiệp quốc brei mboh lac, dalam meteh thun 2021, Triều Tiên daok patagok dom danak dak tên lửa đạn đạo haong hạt nhân di taneh ia ini, ngak suan dom jalan taong phạt di dunya. Kapul pasang iek daok duah thau bruk pambuak gauk di Triều Tiên dalam bruk ngak di mạng dunya saong bruk pambuak gauk di dom sang bac đại học saong viện roh duah di Triều Tiên haong dom viện khoa học di taneh ia langiu. Kapul Triều Tiên di Liên hiệp quốc daok di New York ka oh hu panuac ndom halei ka pathau khan ini./.

Urang lang: M.Phuong -09/08/2021